Luke 5

Wulobe wu yimwile

1Wisi wumoosi, Sesu abile ve tungu mudibe wu Senesarete. Piti yiduge ve mbarandi mu yulu mambu ma Nzambi. 2Alabe mbungu beyi ve tungu mudibe, balobitsi basunde mutsuke masinge mawu. 3Sesu apeke mu mbungu moosi yi Simu, ne ayambile yandi re gogule pesu gu time mambe. Sesu atsagele gu mbungu ne abande wulonze piti.

4Ve mane yandi wulonze, arume Simu re: «Gogule gu tselu yidonge, ne yalanu masinge menu mugange bibere.» 5Simu agabusile yandi re: «Mulonzi, yetu ditselobe dibati dyotsu gugagange nisi mutsoongu; te mu dirumu dyagu makevage.» 6Ve yale yawu masinge, bagange mbili bibere ne masinge mawu mabande wukakugu. 7Batsitse bambatsi bawu bababile gu yine mbungu mu yamune yawu. Yawu nuruge babase mbungu tsyotsu tsibeyi ne bibere, ne bambungu bene tsibande wunyyonge. 8Ve labe Simu Pyere nane, asume makotulu ve wusu Sesu nuyambile yandi re: «Fumu, yiyagogule ve mbarami, make mutu wu mubi!» 9Simu ne botsu bababile nandi bagangu ne wone mumbare badile mbili bibere. 10Sesu atsitse bayikitsi bandi bamarege Sake ne Sa baane ba Sebedé babakingenge ne Simu ne yawu bagangu ne wome. Te Sesu ayambile Simu re: «Yiyalabe wome, bande ne mapape yigubile mulobitsi wu batu.» 11Kerevane basabule bambungu gu simu, basise byotsu, balande Sesu.

Sesu abeluse nge makyedi

12Wisi wubile Sesu gu divule dimoosi, dibagele dibile ne makyedi aruge. Ve labe yandi Sesu, agudeme ve wuswandi mbalenge gu mutambe atombe yandi re: «Fumu, ga yironde yirungule wubeluse me.» 13Sesu asukule dikake dyandi, agangile yandi ne ayambile re: «Maronde, beluge.» Vane ne vane makyedi maburugu. 14Sesu ayambile nandi re: «Yiya yambile dyambu dyene gu mutu, te yende muritsige manyuru magu gu muyakitsi wu malagu, nuvege dilagu dilonze Muyise mure batu botsu bakeyabe re yitsebeluge.» 15Batu bayambilenge mbili mu yandi, ne bapiti bambili badugesene mu yulu nave lonzenge Sesu, ne mu belusu mabelise mawu. 16Te Sesu ayende yapinze ve yitsige gigabile batu, musambile.

Sesu abeluse yikate

17Wisi wumoosi Sesu alonzenge batu gugare ndagu. Bafwarisi ne basupulitsi ba migage mi Muyise barugenge mu mimbu ma Sudé, ne mu mimbu ma Galilé, ne gu divule di Serusaleme. Re banyingene gu ndagwene yilonzenge Sesu, ne batsagele ve mbarandi mu yulu musamu wandi. Sesu ne ngudi yi Fumu yibile nandi abelusenge babetsi. 18Vane ne vane batu baruge ne yikate gipapu mu pube, baronde wunyingise yandi ne wusunze yandi ve wusu Sesu. 19Te baserungule wunyingene mu piti yibile vane, yawu banakeme nandi gu yulu ndagu, batube mune, basundise yikate mu pube ve ganegare piti ve wusu Sesu. 20Ve labe Sesu gitu gyawu, ayambile yikate re: «Mabi magu mamesingulu kokolu.» 21Bafwarisi ne batenditsi ba migage mi Muyise batasenge mu mirime re: «A wuwu munongu mutu nde nyi? Wugonevongule Nzambi? Nde nyi wurungule singile batu kokolu mu mabi vengu Nzambi yapinze!» 22Sesu wuyabenge mabilenge mu mirime myawu, ayambile yawu re: «Sabwedi mubile ne munongu matase mane. 23Gi page muyambile vane nde gi? Wuyambile re: “Mabi magu mamasingulu kokolu”, vore nde wuyambile re: “Teleme yendenge?” 24Te maronde re yenu diyabi re, Mwane mutu ane dinyange mu tsi yi musingile kokolu mu mabi.» Ve mane yambile yandi nane, Sesu arume yikate re: «Teleme, bonge pubagu, ne yende gu ndagwagu!» 25Vane ne vane yikate ateleme ve misu ma batu botsu, atole pubandi, ayende nugitse Nzambi. 26Ve labe yawu nane, botsu bagibeme mbili. Bayulu wome, bagitse Nzambi re: «Nemunyi ditselabe mambu mavyogilile wunyi!»

Sesu atsitse Levi

27Ve yulu vane, Sesu avate ne alabe muyakitsi lepu, dine dyandi: Levi, matsagele ve yitsige gi dyanzenge yandi, ne amuyambile re: «Lande me.» 28Levi ateleme, asise byotsu, ne alande Sesu. 29Kerevane Levi alambile Sesu yilambu giginene gu ndagwandi, mbili bayakitsi balepu ne batu bamosi bayi nawu. 30Ve labe bafwarisi ne bivunde bi batenditsi ba migage nane, basembe bayikitsi ba Sesu re: «Mugi yenu digoneyi, nunu ne bayakitsi ba lepu, ne batu bababi?» 31Sesu ayagule yawu re: «Batu babane buvinyi basandi ne nzale mubugitsi, te nde bange mabelise. 32Maseruge mu bene babasugeme, maruge nde mubene bange mabi, mure bakekalule buyedi.»

Sesu alonze mu dyambu di wumine kugi

33Bafwarisi bayambile Sesu re: «Bayikitsi ba Sa Batise bakavure mine kugi ne wusambile, ne betu bakavagi munongu wumoosi, te bagu bayatsi ke wuyi ne wunu.» 34Sesu agabusile yawu re: «Yenu ditase re bambatsi ba mutu wumadage mugyetu bagubuse wuyi ne wunwa? 35Te vekepule dikyesi dikeburulu mulumi, yawu bagu mini kugi.»

36Sesu averile yawu nongu re: «Gusandi mutu wukerungule wukake yirende mu yidwari gimone nurarige gyo mu yidwari gikale, mbe yidwari gikale gigukakugu. 37Gusandi mutu wukerungule wuyitile malamu mamone gugare bakyeki tsikale, mbe malamu mene magubule bakyeki, mareyitige, ne bakyeki tsirebungene. 38Te bwedi nde wuyitile malamu mamone mu bakyeki tsimone. 39Gusandi mutu wukarondi nu malamu mamone agamemane nu malamu mametsinge. Mumbare bakayambili re: “Matsinga, re mamanyi.”»