Luk 6 | SnqSC | STEP | Mu wisi wukaloogi basifu, Sesu ne bayikitsi bandi bayendenge mu nzile yivyogenge mu pwase banungi. Bayikitsi bandi badokenge milunde nuyange.

Luke 6

Sesu alonze mu dyambu di wisi wukaloogi basifu

1 Mu wisi wukaloogi basifu, Sesu ne bayikitsi bandi bayendenge mu nzile yivyogenge mu pwase banungi. Bayikitsi bandi badokenge milunde ^{▼▼Milunde myene mibagunu misu ma muresi. Banyigenge myo mu wulambe mape.} nuyange. 2 Dikabu di bafwarisi bayambile yawu re: «Mugi yenu digonedoke milunde mu wisi wukaloogu?» 3 Sesu ayagule yawu re: «Mayatsi re yenu dirange dyambu divage David, wisi wu yane batu bandi bayulu nzale. 4 David ne batu babile nandi banyingene gu ndagu Nzambi. Abonge mape mayakusu Nzambi ayi, ne avege bababile nandi, nisi nave singise mugage dyo ke gu bavegitsi ba malagu.» 5 Sesu akonde wuyambile nawu re: «Mwane mutu, re Fumu wisi wukaloogu.»

Mutu wubile ne dikake dikateme

6 Wisi wususu wulooge, Sesu anyingene gu ndagu disambulu, ne alonzenge. Ve ganegare batu babayulungu musamu, gubile mutu ne dikake dimabagele dikateme. 7 Batenditsi ba migage ne bafwarisi babeminenge Sesu, mulabe re gane agubeluse mutu wene mu wisi wulooge, mumbare babenenge disuge di wufurigile yandi. 8 Te Sesu wuyabenge matase mawu ayambile dibagele dibile ne dikake dikateme re: «Teleme ve ganegare batu.» Ne ateleme. 9 Kere Sesu ayambile nawu re: «Mugage wugonerume manenu nde muvage dinyi, vo nde muvage dibi mu wisi wulooge? Bwedi nde muyamune mutu vo nde mubokise?» 10 Abemine yawu botsu, kere ayambile dibagele dibile ne dikake dikateme re: «Sukule dikake dyagu!» Asukule, ne dikake dyene dibelugu. 11 Te basupulitsi ba migage ne bafwarisi babasu ne kabu, ne bayambilenge yawu ne yawu mubene disuge dikevage yawu Sesu.

Sesu asoole digumi ne kime beyi

12 Ve dikyesi dyene Sesu ayende gu yulu mukongu musambile. Amane dibati difwimbe nusambile Nzambi. 13 Ve gi wisi, Sesu atsitse bayikitsi bandi, asoole digumi ne babeyi, avege yawu nduge re: bakime. 14 Mine mawu bile re: Simu yilugu ne Sesu re Pyere ne André mwane ngwandi, Sake ne Sa, Filipe ne Batlemi, 15 Mati ne Tome, Sake mwane Alfé ne Simu yironde yobule tsengyandi, 16 Sude mwane Sake ne Suda Yiskaryote wugabe Sesu.

17 Sesu asunde nawu ne asikeme ve mulandu. Dikabu dimbili bayikitsi bandi dibile vane. Ne vane ve bile piti yi batu bababurugu gu tsengi yotsu yi Sudé ne gu Serusaleme. Bamosi baburugu gu mavule ma Tire ne Sido gu tungu mubu. 18 Baruge muyulu mambu malonzenge yandi, ne mure Sesu akebeluse yawu bambedu bawu. Babaritsugungu maguge ne manyunyi mamabi, ne yawu gandi babelusu. 19 Batu botsu babene wugangilenge Sesu mumbare ngudi yivatenge mu yandi, yibelusenge yawu botsu.

Myule ne milogu

20 Ve yulu vane Sesu abemine bayikitsi bandi nuyambile re:
«Myule gu yenu masaandi,
mumbare Bufumu bu Nzambi nde bwenu!
21 Myule gu yenu badigonerape nzale ne mapape,
mumbare yenu digudile kure yimbili.
Myule gu yenu badigonelile ne mapape,
mumbare yenu diguseve.

22 Myule gu yenu ga batu bakole yenu, ga barune yenu, ga basenge yenu, ga bapunze yenu, ne wuvagile yenu bumwenyi bububi mu dyambu di Mwane mutu. 23 Veke labenge yenu mambu mene motsu, labanu wunyi ne bilanu ne yinyunge, mumbare yenu diguvegu misende mimbili gu yulu. Yabanu re nane re naritsugungu babigitsi maguge ne batayi bawu.
24 Te milogu gu yenu bikiti,
mumbare yenu dimamane wudile menu manyi.
25 Milogu gu yenu badimayikure ne byotsu ne mapape,
mumbare yenu diguyulu nzale.
Milogu gu yenu badigoneseve ne mapape,
mumbare yenu digubilenge ne rungile nulile mbili.

26 Milogu gu yenu, ga batu bayambilile gu yenu ke mambu mamanyi. Nane gandi re navagenge batayi bawu gu babigitsi ba wufure.

Dironde gu bakolitsi

27 Te mayambile yenu badigoneyulu mambu mami re: rondanu bakolitsi benu, vagilanu manyi gu babagonekole yenu. 28 Veganu myule gu yawu babagonedigene yenu. Sambilanu mu yawu babagonegyele yenu. 29 Mutu ga adimbe yu mu dibuge dimoosi, ritsige yandi ne dine, amanisili wudimbe. Mutu ga abongile yu yigubuku gyagu ne mbabu, vege yandi ne kapagu. 30 Gu wotsu wukevonde yu yivave, vege. Mutu ga abongile yu yivave gyagu, yiyatombe yandi mu gabuse gyo. 31 Motsu makarondi yenu re batu bavagili yenu, vaganu munongu wumoosi gu yawu. 32 Yenu ga dironde ke babakarondi yenu, ditase re Nzambi aguvege yenu myula? Mumbare ne bange mabi bakarondi ke babakarondi yawu. 33 Yenu ga divagile manyi ke gu babakavagili yenu manyi, ditase re Nzambi aguvege yenu myula? Mumbare ne bange mabi bakavagi munongu wumoosi. 34 Yenu ga disombise badole ke gu batu babakerungule wugabusile yenu, ditase re Nzambi aguvege yenu myula? Nisi bange mabi bakasombisi gandi bange mabi mu gabusulu nzi yisombise yawu. 35 Te rondanu bakolitsi benu, vagilanu yawu manyi. Sombisanu gugatase wugabusulu, kerevane Nzambi pungu aguvege yenu musende wumunene. Ne yenu digubile baane bandi, mumbare ayi wumunyi gu batu botsu ne babanyi ne bababi. 36 Labanu batu botsu dingyebe nakalabi Tayenu.

Diyasosise bambatsi

37 Yenu diyasosise ne yenu dikeresosusu. Diyavege batu mbele ne yenu dikerevegu mbele. Singilanu batu kokolu ne Nzambi akesingile yenu kokolu. 38 Vegenganu bivave bibinyi gu batu ne Nzambi aguvege yenu bimbili. Ne yandi agubase ponzyenu ne tsutsuru ^{▼▼Tsutsuru: bigu gare ponzi bivyogilile mubilulu.}. Nzambi aguyetsige manenu ne gyetsugu gi dikayetsigi bambatsi.»

39 Sesu abetwile yawu nongu re: «Nge pafu arungule wuyenze nge pafu ga yandya? Yawu botsu babeyi mbe bagulage gu dibile. 40 Wuki muyikitsi asakerungule wuvyogilile mulonzi wandi. Te muyikitsi wotsu wumaditige motsu malonzu yandi, agubile ga mulonzi wandi. 41 Mugi yigonebemine yigyegise gi gu disu di mbatsyagu, te yisegonelabe murwale wu gu dyagu? 42 Tsenyi yirungule yambile mwane ngwagu re: “Mwane mame, sise maburuli yigyegise gi gu disu dyagu”, te murwale wu gu disu dyagu, yisegonelabe wo? Ga yisalabe murwale wu gu disu dyagu, tsenyi yigurungule burule yigyegise gi gu disu di mbatsyagu? Yifutsi, burule kinde murwale wu gu disu dyagu, kerevane yigulabe yigyesise gigu disu di mwane ngwagu ne vele.»

Muyikitsi wungyenze

43 Sesu abekonde wuyambile yawu re: «Mwiri wumunyi wuserungule wubure milunde mimibi, vo mwiri wumubi wurebure milunde miminyi. 44 Mwiri wotsu wukayabunu ke mu milunde myandi. Basakerungule wudoke banyinge mu dikwake di yifundi, vore bilili gu dikwake di misumbe. 45 Mutu wumunyi akapusi mambu mamanyi mabase gu murime wandi; ne mutu wumubi akapusi mambu mamabi mabase gu murime wandi. Mumbare mambu mabase gu murime, re makayambili mune.

Ndagu beyi

46 Mugi yenu dikatsitsi me re: “Fumu, Fumu!”, ne mane yenu disakavagi makayambili me? 47 Maguritsige yenu yibagunu gi mutu wotsu wukayitsi gu me: Akayulu mambu mami ne akavagi mo. 48 Ayi ga mutu wugonerunge ndagu: adongise mikikile mi yibuge gyandi ngwu ne mu dimanyi, nubande makise ndagu. Ve ruge nyidu, mwambe wubase ne mambe magubegene mu ndagu, te yisetsukeme, mumbare yo, yirungu bwedi. 49 Te wutseyulu mambu mami, nubuse wuvage na yambile mo, ayi ga mutu wurunge ndagu ve yibuge gigabuku mikikile, ve ruge nyidu, mwambe wubase, mambe magubegene mu ndagu, vane ne vane ndagu yotsu yibundugu.»