Luk 9 | SnqSC | STEP | Wisi wumoosi, Sesu agukige digumi ne bayikitsi babeyi ne avege yawu ngudi ne dinyange di wupunze manyunyi motsu mamabi ne wubeluse bambedu.

Luke 9

Sesu asindige digumi di bayikitsi ne bayikitsi babeyi

1 Wisi wumoosi, Sesu agukige digumi ne bayikitsi babeyi ne avege yawu ngudi ne dinyange di wupunze manyunyi motsu mamabi ne wubeluse bambedu. 2 Kerevane asindige yawu mulonze mambu ma Bufumu bu Nzambi ne mubeluse babetsi. 3 Ayambile yawu re: «Mu munyalu diyabonge mupangu, diyabonge pengi, diyabonge mape, diyabonge badole nisi kure. Mutu nisi wumoosi ayabonge kape beyi. 4 Ndagu tsyotsu tsikeyakwa yenu, bilanu gwune kwange ne ve bugabugulu bwenu. 5 Bitsige byotsu bisakeyakwa yenu, buruganu, kuremusanu ne difufundu di divule dyene di mu byoru byenu. Dyambu dyene re mulubuse yawu re batsevage dibi.» 6 Bayikitsi bayende, bavyogenge mu mimbu motsu nulonzenge musamu wumunyi nubelusenge babetsi mu bitsige byotsu.

Irode aronde wulabe Sesu

7 Mu dikyesi dyene, Irode akumenge gu tsengi yi Galilé. Ayulu tsangu yi motsu mavyoge ne aseyabe divindugulu di mambu mene mumbare bamosi bayambilenge mu Sesu re: «Sa Batiste atsefwangugu.» 8 Bane bayambilenge re nde Yili amelabene, bamosi re: «Nde mubigitsi wukale atsefwangugu.» 9 Te Irode atasenge re: «Matsetabulise muru wu Sa. Ake wuwu mutu nde nyi wugonevage mambu mamanene magoneyulu me batsangu?» Ne vane abande wubene Sesu.

Sesu yane bayikitsi bandi babungule piti

10 Ve gabugu Bakime banyigule Sesu motsu mavage yawu. Ayende nawu gu tselu yi divule dilugu re Betasayida. 11 Te mbili batu nuyabe dyo, balande yandi. Sesu ayake yawu, ayambilenge yawu mu dyambu di Bufumu bu Nzambi ne abeluse bababile ne nzale wubelusu. 12 Ve bande yide wisi digumi ne babeyi bagogule bebele ne Sesu ne wuyambile yandi re: «Gabuse batu botsu mure bayendi gu mimbu ne mu bitsige bi bebele mulame ne mudile kure, mumbare manenu gunu dike gu kumu.» 13 Te Sesu ayambile yawu re: «Veganu yawu kure yenu bene.» Bagabusile yandi re: «Dike ne mape maranu pinze ne bibere bibeyi. Yironde gotsu nde re yetu bene diyendi gusumbe kure yi batu babe botswa?» 14 Vane vebile bebele ne tosini yiranu tsi babagele. Sesu ayambile ne bayikitsi bandi re: «Tsigisanu yawu mu makabu ma magumi maranu ma batu.» 15 Bayikitsi bagobise ne batsigise yawu botsu. 16 Sesu abonge mape maranu ne bibere bibeyi, asimbule misu gu yulu, agabuse dinyi gu Nzambi mu kurene. Kere vane avege byo gu bayikitsi bandi mu gabile piti. 17 Batu botsu bayi ne bayikure. Babage digumi ne ponzi beyi tsi birini bisalulu.

Pyere asupule re Sesu re Wusoolu ne Nzambi

18 Wisi wumoosi, Sesu asambilenge ve yitsige giyapinze ne bayikitsi bandi babile nandi. Atombe yawu re: «Batu bakatasi re mande nyi?» 19 Bayagule yandi re: «Bane bakayambile re yinde Sa Batise. Bamosi bakayambili re yinde Yili. Basusu re yinde mubigitsi wu kale wufwangugu.» 20 Sesu abetombe yawu re: «Ake yenu, dikatasi nde re mande nyi?» Pyere ayagule yandi re: «Yire Wusoolu ne Nzambi.»

Sesu ayambile mu dyambu di difu dyandi ne di bufwangugulu bwandi

21 Sesu ayambile yawu re diyapuke wuyambile dyo gu mutu nisi wumoosi. 22 Ne abeyambile yawu re: «Bwedi Mwane mutu alabi maguge mambili, abusu ne bivunde bi basifu ne bivunde bi bavegitsi ba malagu ne batenditsi ba migage. Abekonde yambile re Mwane mutu aguboku ne mu wisi wu mureru, agufwangugu.»

Ga dilande Sesu

23 Kere vane ayambile ne botsu re: «Ga mutu aronde wulande me, abusi dironde diyabene, apapingi kuruswandi wisi wotsu ne alandingi me. ^{▼▼Apapingi kuruswandi: Sesu aronde wulonze re, wotsu wulande me agwarili mu maguge kwanga ne ve difu.} 24 Yabanu re wotsu wukeronde kyele monyu wandi agutsyemuse wo. Te wotsu wuketsyemuse monyu wandi mu me, aguyobulu. 25 Ake tsongu nde gi gu mutu mudile bukiti bwotsu butsengi yiyi, ga atsyemuse monyu wu mubu ne mubu? 26 Ga mutu alabe tsonyi mu me ne mu mabigu mami, me gandi magulabe yandi tsonyi vekeruge me gugare bundumbe bune Tate yane bakime bandi ba rele. 27 Mayambile yenu nungyenze bamosi veganegarenu basakenenefu gugalabe Bufumu bu Nzambi.»

Yidimu gi Sesu gi kalugu

28 Yandi numane yambile mambu mene, tsufu pombu nuvyoge, Sesu abonge Pyere ne Sa ne Sake bayende gu yulu mukongu musambile. 29 Ve sambilenge yandi, yidimu gyandi gikalugu ne bidwari byandi bibile keke bifuge ne vee. 30 Vane ne vane gubile babagele babeyi bayambilenge ne Sesu. Bile re Muyise ne Yili. 31 Yawu balabunu gugare bundumbe bu Nzambi. Bayambilenge ne Sesu mu dyambu di difu dyandi gu Serusaleme. 32 Pyere ne bambatsi bandi babile bametobe byolu; te ve rambuge yawu, balabe bundumbe bu Sesu ne babagele babeyi babile mitele ve mbarandi. 33 Mu dikyesi dironde wuyagene babagele bene ne Sesu, Pyere ayambile yandi re: «Mulonzi, bwedi dibilyanu vave. Yetu dirungili yenu masambe mareru: dimoosi dyagu, dimoosi di Muyise, dine di Yili.» 34 Ve yambilenge yandi nane, dibungi disunde ne yilunze gi dyo gidibigile yawu. Bayikitsi balabe wome ve labe yawu dibungi dyene. 35 Dufi diyulunu gugare dibungi re: «Wuwu re Mwanami wusoole me muvage naronde me. Yululwanu yandi.» 36 Mu dikyesi dimane yulunu dufi, Sesu asale yapinze. Bayikitsi barumbe, baseyambile mambu motsu malabe yawu gu mutu nisi wumoosi.

Sesu abeluse mwane wubile ne dinyunyi di dibi

37 Ne ngwali yine, Sesu ne bayikitsi bandi basunde mukongu ne piti yiyinene yiruge mu bengusune yawu. 38 Gugare pityene, dibagele dimoosi abwamugu re: «Mulonzi, kokolu, monige mwanami, mwanami wu dikike! 39 Makyesi mamosi dinyunyi didibi dikagangi yandi. Dikayasisi yandi vane ne vane nutsukimise yandi ne ngudi. Dikavatisi yandi difutsi gu mune ne wutsogise yandi. Vekarugi dinyunyi dyene, disakaberonde wupule mu mwane. 40 Matselende bayikitsi bagu mu wupunze dyo, te basarungule.» 41 Sesu abetile batu botsu re: «Yenu nde batu bababi bagane gitu. Magubebile nenu nde makyesi makwe? Magubesindile yenu nde makyesi makwe?» Kere vane ayambile ne tayi mwane re: «Ruge ne mwanagu gugu.» 42 Mu dikyesi digogule mwane, dinyunyi didibi diberuse yandi ne wuyambuse yandi ne ditsukimise mwane pepe. Te Sesu abetile dinyunyi didibi. Abeluse mwane nugabuse yandi gu tayandi. 43 Batu botsu bagibeme mbili, mulabe ngudi yiyinene yi Nzambi.

Sesu abekonde wuyambile mu dyambu di difu dyandi

Ve gibemenge batu botsu mu mambu mavagenge Sesu, ayambile bayikitsi bandi re: 44 «Yulwanu bwedi mabigu makeyambile me yenu ne mapape. Mwane mutu agugabu gu batu.» 45 Te bayikitsi basenyigugulu dyambu dyene, mumbare Nzambi aswege yawu dyo ne balabe wome mutombe Sesu divindugulu di dyambu dyene.

Ngyebe ne yivunde gu Bufumu bu Nzambi

46 Bayikitsi ba Sesu babande wutswake mugalene buvunde ve tsugu yawu botsu. 47 Sesu nuyabe natasenge yawu mu mirime, abonge mwane ngyebe, nutelige yandi ve mbarandi. 48 Kere ayambile yawu re: «Wotsu wukeyake mwane ngyebe wuwu mu ndugami, ameyake mabene ne wotsu wukeyake me, ameyake yandi wusindige me, mumbare wuyi ga mwane ngyebe ve ganegare yenu botsu, re yivunde.»

Wusakakoli yenu re wenu

49 Kere vane Sa ayambile Sesu re: «Mulonzi yetu ditselabe mutu atsepunzenge manyunyi mamabi mu dine dyagu ne ditseronde wukubise yandi mumbare asandi gu dikabu dyetu.» 50 Te Sesu ayagule yandi re: «Diyakubise yandi, mumbare wusakakoli yenu re wenu.»

Bisi Samari babuse wuyake Sesu

51 Ve gogulenge dikyesi di Sesu mumake gu yulu, ne bukidi bwotsu ayende gu Serusaleme. 52 Aregisile bakime gu dimbu di Samari. Yawu bayende mukunze byotsu mu mwitsu wwandi. 53 Te bisi dimbu dyene babuse wusangile yandi mumbare ayendenge gu Serusaleme. 54 Ve labe yawu nane, bayikitsi Sake ne Sa bayambile Sesu re: «Fumu, yironde re ditombi Nzambi mu sindige mbawu yi yulu mu wuyoke yawwa?» 55 Te Sesu agyelugu gu yawu ne asembe yawu. 56 Kere vane bayende gu dimbu dimosi.

Babagoneronde wulande Sesu

57 Ve yendenge yawu mu nzile, dibagele dimoosi ayambile Sesu re: «Magulandenge yu mwotsu mukeyendenge yu.» 58 Sesu ayagule yandi re: «Banganyi bane bitsige bikalami yawu, ne banyonyi bane mufu mawu, te Mwane mutu asandi ne yitsige gi wulame ne gi wulooge.»

59 Sesu ayambile dibagele dimosi re: «Lande me.» Te dibagele dyene ayagule re: «Fumu, singise me, mayendi kire gu yevere tate.» 60 Sesu ayagule yandi re: «Sise babafu mu dinyunyi baveringi bafumbi bawu, te yu, yende mulonze dyambu di Bufumu bu Nzambi.»

61 Mutu wususu abeyambile re: «Magulandenge yu, Mulonzi, te singise me kire mayelagile bakinde bami.» 62 Sesu agabusile yandi re: «Wotsu wumagangile tsopu ^{▼▼Tsopu: wuregile wutende musamu asunze chariot, yivave gi dutungu ne bangombi mu wufundule mutambe ne gi wuvare.} nubebemine misu manzime asandi wuyelimine mu Bufumu bu Nzambi.»