Luk 14 | SnqSC | STEP | Mu wisi wumosi wukaloogi basifu, Sesu anyingene gu ndagu yi yivunde gimoosi gi bafwarisi muyi. Batu bababile vane babeminenge yandi ne nzwu.

Luke 14

Sesu abeluse mubetsi mu wisi wukaloogi basifu

1 Mu wisi wumosi wukaloogi basifu, Sesu anyingene gu ndagu yi yivunde gimoosi gi bafwarisi muyi. Batu bababile vane babeminenge yandi ne nzwu. 2 Vane ne vane mutu wubile ne wubele wurandisenge manyuru ateleme ve wusu Sesu. 3 Kere vane Sesu atombe basupulitsi ba migage ne bafwarisi re: «Mugage wetu wukasingisi vo wukakari wubeluse mutu mu wisi wukaloogi basifu?» 4 Te yawu baseronde wuyagule. Sesu agangile mubetsi, abeluse yandi ne arume yandi mu wugabugu. 5 Ve yulu vane Sesu ayambile yawu re: «Ve ganegarenu mutu agabile ne mwane wumoosi wu dibagele wurelage gu dibile di mambe vore yiboodu, asakeyende mbangu mbangu mu puse yandi mu wisi wukaloogi basifwa?» 6 Te baserungule wuyagule.

Wusoole yikudu gi masukise

7 Sesu alabe re batu ga bamatsitsu mu mayayi ma monge bakarondi wusoole ke bikudu bi marege bi digobe mu tsagele; kere vane Sesu atwile yawu nongu re: 8 «Mutu agatsitse yu muyi mu diyayi di dyonge, yiyabile ne yifu gi wusoole yikudu gi marege gi digobe gane ve ganegarenu guyi mutu wuvyogilile yu digobe. 9 Ga yivage nane, wutsetsitse yenu botsu babeyi agurungule yambile yu re: “Sile wuwu yitsige.” Ne vane yiguteleme ne tsonyi muyende tsagele gu yikudu gi masukise. 10 Te veketsitswa yu, bwedi mu yetsagele gu yikudu gi masukise mure vekeruge wutse tsitse yu akeyambile yu re: “Wayi make gu wusu mu tsagele ve yikudu gi digobe.” Ne vane, batu botsu babave take nagu bagugobise yu. 11 Re dibandu, wotsu wukemakise manyuru mandi agugulumusu ne wotsu wukegulumugu, agumakusu.»

12 Ve yulu vane, Sesu ayambile ne mutu wutsitse yandi gu yi re: «Vekelambe yu yilambu giginene ve ganegare wisi vo ne tsisige, yiyatsitse bambatsi bagu, yiyatsitse baane bangwagu, yiyatsitse bakinde bagu, yiyatsitse nisi bikiti bidukelene nagu. Ga yivage nane ne yawu mbe bagugabusile yu munongu wumoosi. 13 Te vekelambe yu yilambu giginene, tsitse nde masaandi ne bikate ne bange wutekugu ne bange pafu. 14 Ne ga yivage nane, yigubile ne yinyunge mumbare yawu basakerungule wugabusile yu munongu wumoosi. Te Nzambi agusende yu wisi wukerambugu babagobisenge yandi.»

Nongu yi yilambu giginene

15 Ve mane yulu babatsitsu mambu mene, mutu wumoosi ve ganegare bababile ve take ayambile Sesu re: «Wunyi gu wotsu wukeyi yilambu gikevegu gu Bufumu bu Nzambi.» 16 Sesu ayagule yandi re: «Mutu wumoosi alambe yilambu giginene ne atsitse mbili batu. 17 Ve dikyesi diwuyi asindige musalitsi wandi muyambile benyi bandi re: “Yitsanu guyi yilambu gimavi.” 18 Te botsu babuse, mutu mutu avege wandi mukalu. Ve ganegare babatsitsu, wu marege ayambile musalitsi re: “Matsesumbe nungi, bwedi mareyelabe yo, singile me kokolu.” 19 Wu mubeyi ayambile re: “Matsesumbe digumi di bibodu mu wudyanze gu nungyami, bwedi mareneneyeyelige byo, singile me kokolu. ^{▼▼Mu dikyesi dyene, basifu babilenge ne bibodu bidutenge myange mu wufundule mutambe mu wudyanze gu banungi bawu.}” 20 Wu mureru ayambile re: “Makike ne muyonge, masakerungule mwitsu, singile me kokolu.” 21 Musalitsi agabugu ne anyigule mikalu myotsu gu fumwandi. Kere vane fumu ndagu alabe kabu ne ayambile musalitsi re: “Yende mbangu gu dikase ne mu mimbambe myotsu mi divule, yirugi gunu ne masaandi ne bikate ne bange pafu ne bange wutekugu.” 22 Ve vyoge dikyesi pesu, musalitsi agabugu nuyambile re: “Mulonzi, matsemanevage diyitserume me, te gukike bitsige bigane batu.” 23 Ne mulonzi ayambile gu musalitsi re: “Yende mu banzile ne mu bebele ne banungi. Botsu babakebengunu nagu kungise yawu gunu mure ndagwami yikebase. 24 Re dibandu mayambile yenu re gusandi mutu nisi wumoosi gu botsu babatsitsu ne digobe wukeyi yilambu gyami.”»

Wusise motsu mulande Sesu

25 Wisi wumosi, yinombu giginene gi batu gilandenge Sesu ne yandi agyelugu nuyambile yawu re: 26 «Wotsu wuronde lande me, arondi me vyogilile tayandi ne ngwandi, mugatsyandi, baane bandi, baane bangwandi ba babagele ne ba bagyetu, nisi monyu wandi wotsu. Gasabile nane, asakerungule bile muyikitsi wami. 27 Wotsu wuronde bile muyikitsi wami bwedi apapingi kuruswandi. ^{▼▼Range 9.23.} 28 Mutu nde nyi ve ganegarenu ga aronde runge ndagu yiyinene, asakenene tsagele muyabe difunu di badole ba wumane ndagwena? 29 Te ga abande wurunge ndagu gugamanisile, botsu babakelabenge yandi, baguseve yandi ne wuyambilenge re: 30 “Labanu dibagele didi atsebande runge ndagu ke bwedi, te atselembu wumanisile.” 31 Munongu wumoosi ne fumu tsengi moosi aronde lwane ne fumu tsengi yimosi, akanene tsagele mulabe ga arungule wulwane ne digumi di tosini di migole ne fumu tsengi yimosi wune magumi mabeyi ma tosini tsi migole. 32 Gasabile nane agusindige bakime bandi mu yelembe yine fumu ga akike guvale muyulusunu mubile ne polu.» 33 Kere vane Sesu abekonde re: «Mutu ve ganegarenu ga asasise byandi byotsu, aserungule wubile muyikitsi wami.

34 Kyebu nde yivave giginyi. Te kyebu ga yisage mugangu, bagugabuse mugangwene nde ne gi? 35 Kyebwene yisage ne tsongu nisi muputesene ne mutambe mubendise bivaru nisi gu dibumbu; te yo yikaveru gu kane. Wotsu wune maru muyulu, anyigugulu.»