Luk 24 | SnqSC | STEP | Wisi wumarege wu tsonu, bagyetu bene bayende gu ngile, babage matsi ne miyombu bi tsulu yiyinyi bigumbe yawu.

Luke 24

Sesu arambugu gu difu

1 Wisi wumarege wu tsonu, bagyetu bene bayende gu ngile, babage matsi ne miyombu bi tsulu yiyinyi bigumbe yawu. 2 Badagise dimanyi ditsibugu ngile dimabundumusu ne ve tungu. 3 Yawu banyingene, te basedagise nyuru yi Fumu Sesu. 4 Babile bamatsapulu. Vane ne vane babagele babeyi ne bidwari bingayime basundigile yawu. 5 Bagangu ne wome ne bavindige bambalenge bawu mutsi; babagele bene babeyi bayambile yawu re: «Mugi yenu digonebene ve ganegare babafu wuyi monyu? 6 Asa gugu, atsefwangugu. Bangulanu mabigu mayambile yandi yenu ve nenebile yandi gu Galilé: 7 “Bwedi re Mwane mutu aregabu mu makake ma batu bababi, aregomunu mu kurusu ne mu wisi wu mureru, agufwanguge.”»

8 Ne vane, bagyetu babangule mabigu ma Sesu. 9 Baburugu gu ngile ne bayende nyigule motsu mane gu digumi ne muyikitsi wumoosi ne gu bayikitsi bane botsu. 10 Bile re Mari mwisi magedale ne Sane ne Mari nguyi Sake ne bagyetu bamosi bababile nawu. Banyigule munongu wumoosi gu bakime ba Sesu. 11 Te bakime ba Sesu batasenge ke re magoneyambile bagyetu ke magyayugu ne basebile ne gitu mu yawu. 12 Ne vane Pyere arambugu ne ayende bambangu gu ngile. Apule, avindeme ne alabe keke birende bifwuge bikatu nyuru Sesu ve tsi. Kere vane, agabugu gu mbugandi, agibeme time mbili mu dyambu divyoge.

Bayikitsi babeyi babengunu ne Sesu

13 Mu wisi ke wo, bayikitsi babeyi bayendenge gu dimbu dilugu re Emayuse, vale ne Serusaleme mu magwere mabeyi ma mwendu. 14 Bayambilenge yawu ne yawu mu mambu motsu mavyoge. 15 Ve yambilenge yawu ne yawu, Sesu yabene agogule ne apute yilonge nawu. 16 Bayikitsi balabe Sesu, te basebeyabe yandi. 17 Sesu atombe yawu re: «Magoneyambile yenu digwende nde gi?» Ne basikeme ne munyongu. 18 Wumoosi ve ganegarawu wulugu re Kelopase, ayagule yandi re: «Bisi Serusaleme botsu bayatsi mambu matsevyoge mu batsufu tsitsi! Ne yipinze yiseyabe mo?» 19 Ayagule yawu re: «Mo nde gi?» Bayagule yandi re: «Matsevyoge mu Sesu mwisi Nazarete, betsi nde mubigitsi wumunene. Mabigu mandi mabetsi ne ngudi ne atsevagenge time mambu ma bimwile ve wusu Nzambi ne ve wusu batu botsu. 20 Bivunde byetu bi basambilitsi ba malagu ne bivunde byetu bi buloongu bagabe yandi mure akeboku nugomunu ve kurusu. 21 Yetu dibetsingi ne gitu re yandi re wukeyobule Israel. Te labe gukende tsufu yireru vetsevyoge mambu mene. 22 Nungyenze, dikabu di bagyetu ve ganegare manenu batsevure gibemise yetu. Babetsi ne gayipali gu ngile. 23 Basadagise nyuru Sesu ne batsitse yambile yetu re: “Bakime ba Nzambi batsetutugile yetu ne batseyambile yetu re: Sesu ayimonyu!” 24 Dikabu di batu bababile netu bayende gu ngile. Yawu gandi badagise ke naveyambulu yawu ne bagyetu, te baselabe Sesu.» 25 Ne vane ayambile yawu re: «Batu bagane buyedi be, mirime myenu mike page wubile ne gitu mu motsu malubuse babigitsi! 26 Wusoolu ne Nzambi ne giwunene nyingene gu bundumbe bwandi, bwedi arenenelabe maguge ma munongu wene.» 27 Kere Sesu anyigule yawu motsu matendu mu dyambu dyandi, gu migande mi Nzambi. Bande gu migande mi Nzambi arume Muyise mutende, kwange ne gu migande myotsu mirume yandi babigitsi mutende. 28 Ve pule yawu bebele ne dimbu diyenda yawu, Sesu aregile mawusu mu wuyelige yande vale nawu. 29 Te babagele babeyi bayambile yandi re: «Bile netu! Wisi wumayide ne dibati dimagogule.» Sesu anyingene gu gare ndagu mubile nawu. 30 Atsagele ve take nawu mu wuyi, abonge dipe nugabuse dinyi gu Nzambi. Kere atabule dyo ne wuvege yawu. 31 Ne vane misu ma bayikitsi mabalugu ne bayabe Sesu. Te, vane ne vane, atsyemugile yawu. 32 Bayambelenenge yawu ne yawu re: «Nungyenze, betsi time ga mbawu yitselulenge gugare mirime myetu ve yandi atseyambilenge yetu mu nzile ne wusupulile yetu mirendu mi mambu ma Nzambi.» 33 Barambugu ne bagabugu mu digwere dyene gu Serusaleme. Badagise digumi ne muyikitsi wumoosi mbure moosi, yawu botsu ne batu bababile nawu. 34 Botsu bayambile bayikitsi babeyi re: «Nungyenze, Fumu atsefuanguge! Simu atselabe yandi.» 35 Bayikitsi babeyi banyigule bambatsi mambu mavyoge mu nzile ne bayambile re: «Ditseyabe Sesu keke mu dikyesi di yandi atsegabile yetu dipe.»

Sesu atsombugile bayikitsi bandi

36 Ve yambilenge yawu nane, Sesu yabene atsombugile yawu ve ganegare ne ayambile yawu re: «Polu yibili nenu!» 37 Bayikitsi baparemugu ne balabe wome, batase re bamalabe nde mukuyi. 38 Te ayambile yawu re: «Mugi yenu dimaparemugu? Mugi yenu dine bapage mu mirime myenu? 39 Beminanu makake mami ne byoru byami, ke time me! Gangilanu me ne moniganu me! Mukuyi asandi ne musonyi, nisi ne bivisi navegonelabe yenu me!» 40 Mu mabigu mene, Sesu aritsige yawu makake ne byoru byandi. 41 Bayikitsi babase ne yinyunge ne bagibeme mbili; basenene kunzebile ne gitu. Kere Sesu atombe yawu re: «Yenu disandi ne biwuyi gugwa?» 42 Bavege yandi yirini gi yibere gi gangu. 43 Yandi abonge gyo ne ayi ve wuswawu. 44 Kere vane ayambile yawu re: «Ve betsingi me kike nenu, mayambile yenu re: motsu mayambile migage mi Muyise ne migande mi babigitsi ne migande mi Mimbu mu dyambu dyami, byotsu bine gabiselabene.» 45 Ne vane, Sesu atsibule buyedi bwawu mure bakeditige mabigu ma Nzambi, matendu. 46 Ayambile yawu re: «Yulwanu mabigu matendu mu migande miminyi: Wusoolu ne Nzambi agulabe maguge ne mu wisi wumureru, afuanguge. 47 Bwedi re musamu wumunyi wulonzu mu ndugami mu batsengi tsyotsu, bande gu Serusaleme re: “Kalulanu buyedi ne Nzambi agusingile yenu kokolu mu mabi menu!” 48 Yenu re bimwenyi bi motsu mane. 49 Magusindigile yenu ndagi yisise Tate, te gu yenu, bilanu gugare musengi, kwanga ne vekesundugulu yenu ne ngudi yi Nzambi.»

50 Kere Sesu abage yawu gu tselu yi Betani. Asimbule makake mandi muvege yawu myule. 51 Mu dikyesi disimbule yandi makake mu wuvege yawu myule, ayagene nawu ne amake gu yulu. 52 Mu dikyesi dyene bayikitsi bagitse Sesu. Kere vane, bagabugu gu Serusaleme ne yinyunge gi mbili. 53 Ve pule yawu gune, babilenge makyesi motsu ke gu ndagu Nzambi ne wugitsenge Nzambi.