Luk 3 | SnqSC | STEP | Ve bile Tibere Sesar ne digumi di bilime ne bilime biranu ve dinyange gu Rome, Pose Pilate abile yivunde gi musengi wu Sudé, ne Irode Atipase abile yivunde gi musengi wu Galile; Filipe mwane ngwandi, abile yivunde gi tsengi yi Ituré ne Trakonite, kere Lisani yivunde gi Abilene.

Luke 3

Mabigu malonze Sa Batiste

1 Ve bile Tibere Sesar ne digumi di bilime ne bilime biranu ve dinyange gu Rome, Pose Pilate abile yivunde gi musengi wu Sudé, ne Irode Atipase abile yivunde gi musengi wu Galile; Filipe mwane ngwandi, abile yivunde gi tsengi yi Ituré ne Trakonite, kere Lisani yivunde gi Abilene. 2 Ane ne Kayife babile bivunde bi bavegitsi ba malagu, dikyesi dyene re di Nzambi ayambile ne Sa mwane Sakari gu yigangi. 3 Sa ayendenge gu musengi wotsu wu Surde nulonzenge re: «Kalulanu buyedi, batuswanu mure yenu dikesingulu kokolu mu mabi menu.»

4 Nave tendu dyo mu mugande wu Isayi mubigitsi Nzambi re:
«Mutu agonebwamugu gu yigangi re
kunzanu banzile tsi Fumu mu mirime myenu,
sungiganu mikinde myandi.
5 Ba mbengi botsu babasu,
mikongu ne bikukune byotsu bisengu,
maroku motsu masungugu,
banzile tsi mamanyi tsisengu
6 Ne batu botsu bagulaba muyobulitsi wukesindige Nzambi. ^{▼▼Isayi 40.3-5.}»

Mutsundu

7 Ve ruge batu ba mbili mubatusu ne Sa, ayambile yawu re: «Dibure di bambisi wutselonze yenu disuge diwurine kabu Nzambi yikarugi nde nyi? 8 Vaganu nde mambu mamanyi mulonze re yenu dimekalule bitsagilitsi. Diyameme mu yenu bene re Abaram tayetu, mumbare mayambile yenu re, nisi mamanyi mame Nzambi arungule wukaluse mo baane ba Abaram. 9 Dirambile, pivi yikoke yisingugu mutabule mikange mi miri; kagu mwiri wotsu wugabure milunde miminyi wugugwangu ne wuveru gu mbawu.»

Milunde mi diburu di mone

10 Ve yulu mbili batu mambu mene batombenge Sa re: «Ake yetu divagi nde tsenyi?» 11 Ayagule yawu re: «Mutu wukebile ne mangoyi mabeyi avegi dimoosi gu wugabile ne dyo, wotsu wune kure, avegi wugabile ne yo.»

12 Babongitsi ba lepu ne yawu baruge mubatusu nandi, ne batombe Sa re: «Mulonzi yetu divagi nde tsenyi?»

13 Agabusile yawu re: «Diyabonge gu batu bagundige ve yulu birumu yenu.» 14 Migole ne yawu batombe yandi re: Ake yetu divage nde tsenyi? Ayagule yawu re: «Diyabonge badole ne mbabu, vo wufurigile mutu dyambu muronde wuyibile yandi, te labanu wunyi mu futu yigonevegu yenu.»

Sa ayambile tsangu yi wukarugi

15 Batu botsu bavingilenge, ne batasange mu mirime myawu mu dyambu di Sa re: «Wuwu sakebile re mutu wusoolu ne Nzambi wugonevingulwa?» 16 Sa ayagule yawu botsu re: «Me, mabatise yenu ne mambe, te wukayitsi re wuvyogilile me bungudu. Masandi ne dinyange di wunyangule mikudu mi matambi mandi. Yandi agubatise yenu ne Dinyunyi di Sungeme ne mbawu. 17 Yandi agangile yisanyulu ve dikake mubale yitsige ne musanyi bakodu bakeyange yandi gu butale bwandi. Te bipupu byotsu biguveru gu mbawu yigatsime.» 18 Kere vane Sa akonde mbili bandongi tsimosi nulonzenge batu musamu wumunyi.

Disukusulu di yisalu gi Sa Batise

19 Irode murumitsi gu Galilé adumbe mwane tayandi mugatsi ndugandi Irodyade, avagenge ne mbili mambu mamosi mamabi. Re dibandu Sa asembe yandi mu mo. 20 Dibi dimosi dikonde yandi ve yulu mabi motsu ma marege re dinyingise yandi Sa gu tsugu.

Sesu abatusu

21 Sa ne gi nene sunzu gu tsugu, abatisenge batu. Wisi wumoosi ve mane yandi wubatise batu, Sesu aruge gu batusu nandi. Ve sambilenge Sesu, yulu yitsibuge. 22 Dinyunyi di Sungeme disunde mu yandi mu yibagunu gi dibembi, dufi diruge gu yulu re: «Yire Mwanami wu murime, makalabi wunyi mu yu.»

Bukulu bu Sesu

23 Ve bande Sesu yisalu gi Nzambi, abile ve pwase magumi mareru ma bilime, batu batasenge re abile mwane Susefu, Susefu mwane ^{▼▼Mu bine bitsige ditsesunze mwane sake wu ve digumbe te nde gu dibure.} Ili. 24 Ili abile mwane Matate, Matate mwane Levi, Levi mwane Melki, Melki mwane Sanayi, Sanayi mwane Susefu. 25 Susefu abile mwane Matatyase, Matatyase mwane Amose, Amose mwane Nawume, Nawume mwane Esli, Esli mwane Nagayi; 26 Nagayi bile mwane Mate, Mate mwane Matatyase, Matatyase mwane Semeyi, Semeyi mwane Yoseke, Yoseke mwane Yoda. 27 Yoda abile mwane Yowanane, Yowanane mwane Resa, Resa mwane Sorobabele, Sorobabele mwane Salatyele, Salatyele mwane Neri. 28 Neri abile mwane Melki, Melki mwane Adi, Adi mwane Kosame, Kosame mwane Elmadame, Elmadame mwane Ere. 29 Ere abile mwane Sesu, Sesu mwane Elyesere, Elyesere mwane Yorime, Yorime mwane Matate, Matate mwane Levi. 30 Levi abile mwane Simeyo, Simeyo mwane Suda, Suda mwane Susefu, Susefu, mwane Yoname, Yoname mwane Elyakim. 31 Elyakime abile mwane Melya, Melya mwane Mena, Mena mwane Matate, Matate mwane Nata, Nata mwane David. 32 David abile mwane Isayi, Isayi mwane Obede, Obede mwane Bose, Bose mwane Sala, Sala mwane Nakone. 33 Nakone abile mwane Aminadabe, Aminadabe mwane Ademine, Ademine mwane Arni, Arni mwane Ersone, Ersone mwane Perese, Perese mwane Suda, 34 Suda abile mwane Sakob, Sakob mwane Isaak, Isaak mwane Abaraam, Abaraam mwane Tera, Tera mwane Naore. 35 Naore mwane Seruge, Seruge mwane Rewu, Rewu mwane Pelege, Pelege mwane Ebere, Ebere mwane Kela. 36 Kela abile mwane Kenane, Kenane mwane Arpakesade, Arpakesade mwane Seme, Seme mwane Nowé, Nowé mwane Lemeke. 37 Lemeke abile mwane Matusaleme, Matusaleme abile mwane Enoke, Enoke mwane Yerede, Yerede mwane Malale, Malale mwane Kenane. 38 Kenane abile mwane Enose, Enose mwane Sete, Sete mwane Adam, Adam wuswundu ne Nzambi.