Luk 8 | SnqSC | STEP | Ve yulu vane, Sesu ayendenge mu mavule ne mu mimbu. Alonzenge musamu wumunyi wu Bufumu bu Nzambi. Digumi ne babeyi di bayikitsi bandi, babile nandi.

Luke 8

Bagyetu babakingenge ne Sesu

1 Ve yulu vane, Sesu ayendenge mu mavule ne mu mimbu. Alonzenge musamu wumunyi wu Bufumu bu Nzambi. Digumi ne babeyi di bayikitsi bandi, babile nandi. 2 Gubile ne dikabu dibagyetu babapunzulu manyunyi mamabi ne wubelusu bambedu bawu. Yawu bayendenge yilonge ne Sesu. Bile re Mari mwisi Magedala wupunzulu manyunyi tsambu mamabi. 3 Gubile ne Sane, mugatsi Suse mukyelitsi bivave bi Irode, ne Susane ne mbili bagyetu basusu babavegenge manyi mawu muyamune Sesu ne bayikitsi bandi.

Sesu alonze mu dyambu di nongu yi muvaritsi

4 Batu baburugenge mu mavule mavule, mu yitselabe Sesu. Ve duge piti, Sesu atu nongu re: 5 «Gubile mulagitsi wumoosi, ayende mulage bambi gu nungyandi. Ve mwakenge yandi bambi, tsine tsilage mu tungu nzile ne tsyo tsitsaru ne tsidoku ne banyyonyi. 6 Tsimosi tsilage mu mamanyi, tsibende te tsiyumugu mu dikambi di mambe. 7 Tsisusu tsilage veganegare batsende. Batsende tsipite bivaru mumbare tsibende dikyesi dimoosi ne bambi. 8 Te dine dikabu di bambi dilage ve dinyengi. Ve bende bivaru, bibangugu ne bibure milunde. Yivaru gimoosi gibure kame milunde.» Sesu abekonde re: «Wotsu wune maru muyulu, akunzi wuyulu.»

9 Bayikitsi ba Sesu batombe yandi divindugulu dinongwene. 10 Ayagule yawu re: «Yenu divegu buyedi buyabe mambu maswegu magu Bufumu bu Nzambi; te gu bamosi, mambu mene malonzu ne banongu. Mure bakebeminenge guga labe ne bakeyulungu guga nyigugulu. ^{▼▼Isayi 6.9.}

Sesu asupule nongu yi muvaritsi

11 Yulwanu divindugulu di nongwene: bambi re mambu ma Nzambi. 12 Tungu nzile yilage bambi tsidoku ne banyonyi, re yibagunu gi batu babakayulu mambu ma Nzambi, te mukolitsi ga amitse, akaburuli mo mu mirime myawu, mure bakerebile ne gitu muyobulu. 13 Mamanyi malage bambi re yibagunu gi batu babakayulu mambu ma Nzambi ne wusinge mo ne yinyunge; te bake ga bivaru bine myanzi migakunze wusunde gu mutambe. Bayi ne gitu mu ma dikyesi, te vekarugi dimangu, bakalagi. 14 Gugare batsende tsilage bambi re yibagunu gi batu babakayulu mambu ma Nzambi te mirime myawu mike mipitu ne matase ne busine ne mugangu mambu ma tsi yi. Re dibandu milunde mikaburi yawu misakayeli. 15 Dinyengi dilage bambi, re yibagunu gi batu babagoneyulu mambu ma Nzambi ne murime wumunyi wusunde, nu rangimine. Bayi munongu wumoosi ne bivaru bibure milunde miminyi.

Nongu yi pâge

16 Gusandi mutu wukabangisi pâge, nuswege yo gutsi mulumbu, vo gutsi tangi. Te akasunzi yo muyikobugulu mure batu botsu babake nyingenenge, bakelabange yivele. 17 Mumbare gusandi dyambu di diswele disakeyabunu, gusandi dyambu diswegu disakeyulunu. 18 Kagu yenu dikunze yulu mambu mami. Mumbare wotsu wune yivave, agukondu vegu, te wugane gyo agudumbu nisi gigonetase yandi re ane gyo.»

Nguyi ne baane ba nguyi ba Sesu

19 Wisi wumoosi, nguyi ne baane nguyi ba Sesu baruge mudagise yandi, te baserungule wugogule ve mbarandi, mumbare piti yibile yirage. 20 Mutu wumoosi amuyambile re: «Ngwagu ne baane ba ngwagu bayi gu kane, bagoneronde wulabe yu.» 21 Te Sesu ayambile gu botsu bababile vane re: «Mame ne baane ba mame nde babagoneyulu mabigu ma Nzambi ne wugobise mo.»

Sesu asikige mukunge

22 Wisi wumoosi, Sesu yane bayikitsi bandi bapeke mu mbungu. Ayambile yawu re: «Wokanu gu disimu dine di mudibe.» Ne yawu bayende. 23 Ve dugenge yawu, Sesu alame gyolu. Vane ne vane mukunge wumunene wuruge ne mambe mabande wubase mbungu, bayikitsi balabe re dyambu di page dikerugile yawu, bayulu wome, mumbare mbungu yikusugu wunyyonge. 24 Bayende ve mbare Sesu, barambuse yandi, nubwamugu re: «Mulonzi! Mulonzi! Dikefu!» Sesu arambuge. Ve rambuge yandi, abetile mukunge. Divuge ne mingibe, byotsu birumbe. 25 Kerevane atombe yawu re: «Gitu gyenu gi nde gunyi?» Balabe wome ne bagibeme bayambilenenge yawu ne yawu re: «A wu munongu mutu nde nyi wugonebetile divuge ne mambe, ne byo bigonegobise yandi?»

Sesu abeluse mutu wune manyunyi mamabi

26 Sesu ne bayikitsi bandi bapule gu tsengi yi Seraseni; simu ne simu ne mudibe wu Galilé. 27 Ve sunde Sesu ne bayikitsi bandi mu mbungu, mutu wumoosi gu divule dyene aruge ve wusu Sesu. Mutu wene abile ne mbili manyunyi mamabi. Makyesi mambili mutu wene asebedwara bidwari nisi wutsagele gu ndagu, vengu keke gu manyime. 28 Ve ruge yandi ve wusu Sesu, asume magonungu ne wubwamugu re: «Yigoneronde vage me nde tsenyi, Mwane Nzambi Pungu? Kokolwagu, yiyakilise me.» 29 Ve labe Sesu nane arume dinyunyi dibibi muvate mu mutu wene mumbare dyo diyungisenge yandi makyesi motsu. Re dibandu atungungu ne bapange ne milunge mi myange. Te apabenge bapange ne milunge ne ayenzungu ne dinyunyi didibi mu bakumu. 30 Sesu atombe yandi re: «Ndugagu nde nyi?» Ayagule Sesu re: «Dibadi.» Ayagule nane mumbare mbili manyunyi mamabi manyingene mu yandi. 31 Manyunyi mene mabande wulende Sesu mure akeresindige yawu gu mbengi yikakilusu manyunyi mamabi.

32 Vane vekyegulu digande di bangulu bayangenge gu yulu mukongu ne manyunyi malende Sesu mu singise yawu mu nyingene gugare bangulu bene. Sesu asinge. 33 Manyunyi mamabi mapule mu mutu wene ne manyingene mu bangulu ne tsyo tsigulemugu mukongu bambangu ne tsitondeme gu mudibe ne tsifu. 34 Ve labe babakyelenge tsio dyambu dyene, barine, tsangu yi yulunu gu divule ne mu mimbu. 35 Batu bayende muyelabe dyambu divyoge gune. Ve pule yawu ve mbare Sesu, badagise mutu wu pusulu manyunyi mamabi matsagele ve wuswandi, adware bidwari ne bagangu ne wome wu mbili. 36 Babalabe mambu mavyoge gune, banyigule batu nave yobulu mutu wubile ne manyunyi mamabi. 37 Mbili batu ba musengi wu Sereseni balende Sesu mu burugu ve yawu mumbare bagangu ne wome wu mbili. Sesu ne bayikitsi bandi banakeme mu mbungu ne bagabugu. 38 Mutu wupusulu manyunyi mamabi aronde keke re Sesu abilingi nandi, te Sesu asesinge. Ayambile yandi re: 39 «Gabugu gu ndagwagu yeyambili motsu matsevagulu yu ne Nzambi.» Agabugu, ne ayambile mu divule dyotsu, motsu mavagulu yandi ne Sesu.

Sesu abeluse mugyetu ne afwangule mwane Sayiruse

40 Ve gabuge Sesu gu yine simu mudibe wu Galilé, piti batu yisangile yandi mumbare batu botsu bavingilenge yandi. 41 Vane ne vane dibagele di nduge re: Sayiruse atsombugu. Abile yivunde gi ndagu disambulu. Asume makotulu ve wusu Sesu mulende yandi mu nyingene gu ndagwandi. 42 Ayambile nane mumbare abile ne mwane wu dikike wu mugyetu ne wubele wurage, bebele ne difu. Mwane wene abile ne digumi ne bilime bibeyi. Ve yendenge Sesu gune, abamugungu ne piti. 43 Gugare pityene gubile mugyetu wubelenge muvuve digumi ne bilime bibeyi, agudise busine bwandi bwotsu gu babugitsi, te asebelusu ne mutu nisi wumoosi. 44 Agogule ne ve nzime Sesu ne agangile dibogu dikapandi, vane ne vane muvuve wandi wukanyi. 45 Kere vane Sesu atombe re: «Wumebembulunu nami nde nyi?» Te botsu barune. Pyere ayambile yandi re: «Mulonzi! Yinde wutsingu ne piti yigonebamige yu.» 46 Te Sesu ayagule yandi re: «Guyi mutu wutsebembulunu nami mumbare mameyabe re ngudi yitsevate mu me.» 47 Ve labe mugyetu re ameyabunu, aruge nuregeme, asume makotulu ve wusu Sesu. Ayambile ve misu ma batu botsu disine ditsegangile yandi Sesu, ne natse belugu yandi mu dikyesi dyene. 48 Sesu ayambile yandi re: «Gitu gyagu gimebeluse yu. Yendenge ne polu.»

49 Ve yambilenge Sesu, mutu aruge gu yambile Sayiruse yivunde gi ndagu disambulu re: «Mwanagu wu mugyetu amafu, yiyabegolu wukingise mulonzi.» 50 Te ve yulu Sesu dyo, ayambile Sayiruse re: «Yiyalabe page. Te bile ke ne gitu, mwanagu agubelugu.» 51 Ve pule Sesu gu ndagu yi Sayiruse, akale batu botsu mu nyingene gu yirini nandi, vengu ke Pyere ne Sa ne Sake, ne tayi ne nguyi mwane. 52 Batu botsu bagu ndagu balilenge, nukayigene mu mwane. Sesu ayambile yawu re: «Diyalile, asafu akegyolu.» 53 Yawu basevenge Sesu, mumbare bayabenge re mwane wutsefu. 54 Te Sesu agangile dikake di mwane nuyambile ne dufi didinene re: «Mwane, rambuge!» 55 Dinyunyi dyandi digabuge mu yandi, vane ne vane ateleme. Sesu arume bakinde mu vege yandi kure. 56 Nguyi ne tayi mwane bagibeme mbili ne akale yawu mu yambile mutu nisi wumoosi dyambu ditsevyoge.