1Jo 2 | SuqSC | STEP | Erroa ganyuye, bhee kɔgɔdhdhagɛung ngalɔktaye, keni ngamesigi lɔga gɛrsa. Na nɔng hunde hir kona keme lɔga gɛrsa, nɔng hira tɔrriy agge na tɔllɔhɛsɛna Baba Na Tumu ihe. Nɔng a Hira Ridhing Ningginɛna kènno Yesus Kirisos.

1 John 2

1 Erroa ganyuye, bhee kɔgɔdhdhagɛung ngalɔktaye, keni ngamesigi lɔga gɛrsa. Na nɔng hunde hir kona keme lɔga gɛrsa, nɔng hira tɔrriy agge na tɔllɔhɛsɛna Baba Na Tumu ihe. ^{▼▼Ngalɔkta a bhɛa kènɛa hunde kesea kème lɔga gɛrsaye, lɔga ga ale marak :Tumu na ujjuk na sennagiy any kagarayɛ ke ngaya Yesus Kirisos tɔrriy agge na tɔllɔhɛsɛn Baba na Tumu na keseagiy, “Any kagarayɛye.”} Nɔng a Hira Ridhing Ningginɛna kènno Yesus Kirisos. 2 Na a hira bere ibhbhana :Tumu na sɛrɛa bhɛa na, na rɛsɛiy agge na kotonyo ridhingɛa ga na kagaratɔ. Nɔng bhee bere kìbhbhanɛ na kotonyoiy ridhingɛa ga sɔng ngayo. Bere kènno kotonyo chɔɔ ridhingɛa zuga bhakkɛa ba kumulɔng.

3 Nɔng agge hunde kɛ̀bhɛgɛ lɔga ajjiy :Tumu, anda kàggayɔ hunde kàn zuga kàggaa nɔng dhereye. 4 Nɔng inde se, “Anye Tumu kaggayɔ,” na lɔga ajjɛa :Tumu ngamessoye, a butogi na lɔga Tumu ku dhere bhɛa nɛnɛ ninggɛ. 5 – 6 Nɔng inde bhɛk lɔga ajjɛa :Tumuye, a hira ibhɛsɛna Tumu hini dhere na urrugɛsɛna lɔga hinnono :Tumu dib. Na hunde lɔ hirre se, “Anye kɛllo ko Tumu kari ke dhɔnɛye,” maya bhak ba damiya bere bhagɛa :Yesusi. Nganda a bhee kàggaɛ bhɛa kànɛa zuga kɛ̀lla ko Tumu kariye.

7 Ngazukta gany kibhbhagung hiniye, yɔk ngalɔkta kɔgɔdhdhagung :anyoye ga ngani ɛrrinyana ngayo. A lɔga bere kinginye ajjungu :Tumu bɛrgua bere ngani yɛbhbhanɛo Yesus. Na chɔɔ bere shikto na gaoyɔ. 8 Na yɔk ngagiya kɔgɔdhdhagung mɛa toye na kajjungge, agga ngani ɛrrinyana. Yɔk ngalɔkta agga ku dhere bere korro :aggeu bhɛa Yesusi ko bhɛa nu kari. Bhee anɛ dhereye a ngaya kɔrrɔyn bhɛa nu dha bɔɔ kɔ̀ggɔytay na goore tawalɛ :hɔldina Tumu ku dhereye.

9 Nɔng inde se, “Anye kemesi lɔga hinno :Tumu na kihi hɔldinɔ,” na mar zuga yɛbhbhɛa kamannaa Yesusi konaye, nɔng dhaa ngani i kɔrrɔynɔ. 10 Na nɔng inde ibhɛsɛn zuga yɛbhbhɛa kamannaa Yesusi hiniye, ɛl ko Tumu na bhak ba hɔldinɔ na lɔkte gɛrsi bhɔdhɛ nɔng sabba na kɛddɛ lɔgɔ ninggɛ. 11 Nɔng inde mar zuga yɛbhbhɛa kamannaa Yesusi konaye, bhak ba kɔrrɔynɔ na dhaa ngani yiri ngonu. Na chɔɔ gɔrre kɔɛye imag ke ngaya kawarɛ dhiyɛ :kɔrrɔynɔye.

12 Erroa ganyuye, anye kɔgɔdhdhagung ngalɔkta
ke ngaya bere rɛssɛung :Yesusi na lɔga gu gɛrsa ujjugɛ :Tumu na sennagɛung, “Any kagarayɛye.”

13 Na ko igge ngazukta ku babachinaye, bhee kɔgɔdhdhagɛung ngalɔktaye,
a ngaya gayɛo Yesus hunde a hira bere ihono kingi huna chɔɔ ba ko tumu ngani kètegenydoayoye.

Na ko igge ngatɛgɛnda, bhee kɔgɔdhdhagɛung ngalɔktaye,
a ngaya bere mɔggɛo Moldoyte.

Na ko igge ngaerroya, bhee kɔgɔdhdhagɛung ngalɔktaye,
a ngaya gayɛo Baba na Tumuye.

14 Na ko igge babachina, bhee kɔgɔdhdhagɛung ngalɔktaye,
a ngaya gayɛo Yesus hunde a hira bere ihono kingi huna chɔɔ ba ko tumu ngani kètegenydoayoye.

Na ko igge ngatɛgɛnda, bhee kɔgɔdhdhagɛung ngalɔktaye,
a ngaya anɛo dhandali
na lɔga Tumu ɛlɛ hinisiya gu toye,
na bere mɔggɛo Moldoyte.

Lɔga Maya Kàmarɛa Lɔga Ku Kuhu Messɛa :Zugu Bay Ngaya Na Hinisi Ngakìbhɛsɛnao

15 Yɔk lɔga ku kuhu messɛa :zugu ko ga ku kuhu ɛlla bay ngaya kumulɔng hinisi ngaibhɛsɛno. Na nɔng hunde tɔlɔ inde ibhɛsɛn lɔga ku kuhu hiniye, ngangaye dhaa Baba Na Tumu hini ngaibhɛsɛnno. 16 Anye bhee kesennagɛung ngangaye, a ngaya lɔga ku kuhu ɛlla bay ngaya messɛa :zugu kumulɔng ga bere ajjiy :Babaa Na Tumu ngaanɛo na anɛ ga tissanɛa :yɔkkuye. Yɔk ngalɔkta tissanɛ :yɔkkuye agga ku kuhu messɛa damite hinnonɛye ko ga chirkanɛa ahaa zugony na yɛbhɛa ahaa gɛ na dhɔngɛa rɛhi. 17 Yɔk ngalɔkta ku kuhu messɛ :zugu bay ngayaye ko ga ku kuhu chirkannɛa :zugu, ale garsɛyɔ. Na yɔk zuga messɛa lɔga hinno :Tumu, ale kàjjɛ basseya iho dhul ko kingi.

Lɔga Kènno Kɛ̀tɛldɛ Kɔk Bhɛa Kènno Ngakitabhtɛiy :Mirɔga Kirisosi

18 Erroa ganyuye, nɔng mɛa toye nganda a kolea senno kuturoy ba. Nɔng mirogiya Kirisosi hunde ale kunde annaa bere shikto. Na chɔɔ mɛa toye mirɔga Kirisosi ga bo mɛra bɔɔ bandaa. Na ngalɔkta dhugunnogiyɛ bhɛa kàggayɛa hunde nganda a kolea uturronɛa baye. 19 Yɔk ngazukta ku mirɔga Kirisosiye bere anna zuga ga kàgachcha Tumu kari. Na koo dhɔttiy na ago ke ngaya dha bere zuga ga dhere ngaanɛoye. Yɔk hunde bere kete zuga ga kàgachcha Tumu kari dhere, anda bɔɔ ngadhɔttiyɛo na hɛyo. Na yɔk ngaya bɔɔ dhɔttɛiyɛ na hɛɛye, dhugunnono bhɛa yɔk zuga ga kàgachcha Tumu kari dhere ngaanɛayo.

20 Na nɔng igge annaa bere kùhudhtongngɔ Kuloya Hira Kullɛna na lɔga ku dhere gao kumulɔng. ^{▼▼Dadabinyaa Lɔga Tumu tuga Giriki gena sennɛ, “...lɔgɔ kumulɔng gaoyɔ.”} 21 Nɔng anye bhee kɔgɔdhdhagɛung ngalɔktaye, ke bhɛa imagɛo lɔga ku dhere ngayo. Kɔgɔdhdhagung ke ngaya gayɛo lɔga ku dhere ko bhɛa lɔga ku dhere ko ga ku butomo anɛ ga imaginɛnɛaye. 22 Na nɔng inde mal lɔga Yesusi na se, “Yesus Hira Bere Bɛrrana :Tumu ku Kirisos ngayoye,” a inde ku butogiya bo dhogoyte. Nɔng ngandonu a mirogiya Kirisosi na chɔɔ imag Baba Na Tumu ko Eriya Nɛnɛ tɔllɔng. 23 Yɔk zukte imaggɛ Eriya Tumu tɔllɔngge kumulɔng, bhee ɛlɛ ko Baba Na Tumu kari ke dhɔnɛ ninggɛ. Na yɔk gee yɛbhbhɛ Eriya Nɛnɛye ɛl ko Baba Na Tumu kari ke dhɔnɛ.

24 Na mɛa igge lɔga bere shikkano sabbɔ bɛrgua bere ngani yɛbhbhanɛo Yesus tɔlɔmɔ hinisichinne dhul! Hunde lɔmmo ngangaye anno zuga ɛllo ko Baba Na Tumu ko Eriya Nɛnɛ kari ke dhɔnɛ. 25 Na hunde kɛ̀l kari ke dhɔnɛye, kɔ̀lɔ basseya iho dhul bere bhiikkagiy :Kirisosi.

26 Anye bhee kɔgɔdhdhagɛung ngalɔktaye, keni taga lɔga ngazukta madhdhagungɛ lɔga ku butomo na se kitabhtungge. 27 Nɔng igge anno zuga bere kùhudhtongngɔ Kuloya Hira Kullɛna na ngani ɛllo ko nɔng kari ke dhɔnɛ na bhee madhdhɛung :hir konnɔ ninggɛ. Nɔng ngakuloytonu madhdhagung lɔgɔ kumulɔng. Na lɔkte madhdhagungge agga ku dhere, ga ku butomo ngayo. Na mɛa igge tɛldi ko Kirisos kari ke dhɔnɛ damiya bere dhugunnogɛungu :Kuloya Tumu.

Lɔga Erroa Tumu

28 Na mɛa ngaerroya ganyde, igge tɛldi ko Yesus tii ke dhɔnɛ na aynde ale kolea wokkonɛa :nɛa agge bho ngakɛ̀ngɛrsɛo na liya amɛiyshoye. 29 Nɔng igge hunde takto bhɛa Yesus anɛa hira ridhing ningginɛnaye, ngangaye takto hunde zuga messɛa lɔga ridhing ngaannao dhaa a erroa gɛnyɛ kumulɔngge.