1Jo 4 | SuqSC | STEP | Ngazukta gany kibhbhagung hiniye, zukte se yokkonɛ lɔga dhugunɛsɛna :Kuloya Tumuye kumulɔng nganga hung ngayɛbhbho. Maraga shɛɛ na tagatɔ hunde lɔga gɛ agga dhugunɛsɛna :Tumu dhereye. Bhee maya maragɛo ngangaye, a ngaya zuga ku butoga bhɔdhdhɛa lɔgɔ na yokkonɛa huna naa dhugunɛsɛna :Kuloya Tumu dha bɔɔ banda na asanydɛsɛ ba kumulɔngge.

1 John 4

Lɔga Maya Kàmaragɛa Lɔga Kuloya Ku Dhere Ko Ga Naa Ku Butomo

1 Ngazukta gany kibhbhagung hiniye, zukte se yokkonɛ lɔga dhugunɛsɛna :Kuloya Tumuye kumulɔng nganga hung ngayɛbhbho. Maraga shɛɛ na tagatɔ hunde lɔga gɛ agga dhugunɛsɛna :Tumu dhereye. Bhee maya maragɛo ngangaye, a ngaya zuga ku butoga bhɔdhdhɛa lɔgɔ na yokkonɛa huna naa dhugunɛsɛna :Kuloya Tumu dha bɔɔ banda na asanydɛsɛ ba kumulɔngge. 2 Nɔng gangguye maya maragɛo lɔgɔ na gayɛo bhɛa anɛa ga dhugunono :Kuloya Tumuye a ɛnɛnggeo, hunde shikto lɔkte yokkono :hiriyɔ kuloyɔ na sennɛ, “Yesus Kirisos huna bere kunno ba, bere hudhukkinyana ke hiriye,” ngangaye ngalɔktonu dhaa agga dhugunono :Kuloya Tumu dhere. 3 Na yɔk gee yokkono :hir konnɔ kuloyɔ na sennɛ, “Yesus Kirisos huna bere kunno ba ngaya, bere ke hiri ngani kuhudhukkiayoye,” ga dhugunono :Kuloya Tumu ngayo. Nɔng kuloyte yokkono lɔkte ku ngangaye, anna mirogiya Kirisosi bere shikkano :iggeu kingi kènno ale kuni. Na chɔɔ bɔɔ kowa na mɛa ihe.

4 Na mɛa ngaerroya ganyde, igge anno erroa Tumu. Na annaa bere tamarto lɔga ngazukta ku butogaye dhul na dhɔtto, ke ngaya Kuloya Tumu lɔmmo :iggeu anɛ na jorrono ɔnneya ngakuloyta allinɛnɛ zuga marrɛa Tumuye. 5 Yɔk ngazukta ku butogaye a zuga marrɛa Tumu na lɔgɔ yokkonɛ damiya zuga marrɛa Tumu na aynde zuga marrɛa Tumu shigɛ lɔga gɛye. 6 Nɔng agge kanno zuga Tumu. Na zukte gaɛ Tumuye, lɔga gayo shikkɛyɔ. Na yɔk gee zuga Tumu ngayoye, agge ngashikkeyɛo. Ngaya a bhee kàggaɛ lɔgɔ hunde agga kuloya ku dhere oo hunde agga kuloya ku butogiye.

Lɔga Ibhbhagɛiy :Tumu Hini Ko Ga Maya Kìbhinɛnɛa Hinisi Kɛngɔ

7 Na mɛa ngazukta gany kibhbhagung hiniye, ga kìbhtɛ hinisi kɛngɔ ke ngaya bhɛa kìbhinɛnɛa hinisi ajjɛiy :Tumuye. Nɔng inde ibhɛsɛn zugo hiniye, ngandonu a eriya Tumu na ngangaye dhaa a hira gaa Tumu. 8 Na nɔng inde zugo hini ngaibhɛsɛnnoye, a hira Tumu ngagaayo ke ngaya Tumu anɛ na ibhɛsɛna zugo hini kali kaliye. 9 Nɔng bhee bere dhugunnogɛiy :Tumu bhɛa ibhbhagɛiy hiniye, a ngaya bere ibhbhanɛ Eriya Nɛnɛ dhɔnɛna na ittonnonɛ ba na kɔ̀jɔyayɛy :aggeu basseya iho dhul bhɛa nɛnɛye. 10 Nɔng ngaya ibhbhagɛiy :Tumu hiniye, ke bhɛa bere kìbhɛsɛna :aggeu hinisi ngayo. A ngaya ibhbhagɛiy :nɛa hini na ittonnonɛ Eriya Nɛnɛ na sɛrɛɛ bhɛa lɔga ga gɛrsa na kàttiyɛ na rɛsɛiy aggeye. 11 Na mɛa ngazukta gany kibhbhagung hiniye, Tumu hunde a nganda ibhbhagiy hini goore ngangaye, ko agge maya kìbhinɛ hinisi kɛngɔ. 12 Nɔng hirre bere or Tumu chɔɔ dhɔnɛ ninggɛ dhul. Na nɔng agge hunde kìbhtɛ hinisi kɛngɔ, anda kɛ̀l ko Tumu kari ke dhɔnɛ na ajjiy bhɛa kìbhɛsɛna zugo hinisi goore dhogoy hunde nɛnde.

13 Nɔng bhee kàggaɛ bhɛa kɛ̀lɛa ko nɔng kari ke dhɔnɛye, a ngaya bere ajjɛiy Kuloya Nɛnɛye. 14 Na chɔɔ nɔng ^{▼▼Tuga Giriki se, “...Baba Na Tumu...”} huna bere ibhbhana Eriya Nɛnɛ na ittonnono ba na kibbaysi zugo kumulɔng, agge bere kàrto kawarre na aynde kɔɔbhɛsɛno zugo ngalɔktaye. 15 Yɔk gee yɛbhbhɛ bhɛa Yesus anɛa Eriya Tumuye kumulɔng, a zuga ɛlla ko Tumu kari ke dhɔnɛ. 16 Na agge kàggayɔ hunde kan zuga ibhbhagiy :Tumu hiniye. Na ngaya ibhbhagɛiy hiniye kɛ̀yɛbh na kibhagiy tii.

Nɔng Tumu anna ibhɛsɛna zugo kumulɔng hini. Na ko nɔng hirre ibhɛsɛn Tumu ko zugo hiniye, ɛl ko Tumu kari ke dhɔnɛ. 17 Na hunde kɛ̀l ko Tumu kariye, nɔng ajjiy bhɛa kìbhɛsɛna zugo hinisi goore dhogoy hunde nɛnde. Na kala ale kedhdhɛa lɔga zugony, agge bho ngakɛ̀ngɛrɛso ke ngaya hunde ngani kɛ̀l bay ngayaye, kɛ̀lɛ ko nɔng kari ke dhɔnɛ damiya bere Yesusiye. 18 Yɔk zukte ibhɛsɛn :Tumu hiniye, bho ngaɛngɛrsɛo. Na ko agge hunde kìbhɛsɛn zugo hinisi damiya ibhbhagɛiy :Tumuye, bhee kɛ̀ngɛrsɛ bho ninggɛ dhul. Na yɔk zugo hunde ɛngɛrsɛ bhoye, ngangaye dhaa ɛngɛrsɛ lɔga ale attiyɛa :Tumu. Na mɛa inde ɛngɛrɛ bhoye, nɔng ngangaye dhaa huna :Tumu, zugo hini dhere ngaibhɛsɛnno.

19 Nɔng Tumu annaa bere ibhagiyɔ hini sabbɔ, na aynde mɛa ko agge kìbhɛsɛn nɔng ko zugo hinisiye. 20 Nɔng inde se, “Anye kibhɛsɛn Tumu hini” na mar hira yɛbhbhɛa Yesus kariye, a butogi. Nɔng hunde a nganda mar ngahirra or kawariyɔ yɛbhbhɛ Yesus kariye, na anda chɔɔ Tumu, hira kawariyɔ ngani karrao, hini ibhɛsɛn ɛnɛng? 21 Nɔng annaa bere ayiyɔ lɔga gɛnyɛ sennɛa, “Inde ibhɛsɛn Tumu hiniye, ko nɔng maya ibhɛsɛn zuga yɛbhbhɛa Yesus hini.”