1Th 1 | SuqSC | STEP | Ngadadabta kɔ̀gɔdhdhagung :aggeu, Bhaulosi ko Silasi ko Timotiyosi. Na kìttonnogung igge, zuga bhakko Tɛsɛlongke yɛbhbho Baba Na Tumu ko Komoru Yesus Kirisos. Any kichirbhiseong :Tumu na bhaga ba ke na bo challa.

1 Thessalonians 1

1 Ngadadabta kɔ̀gɔdhdhagung :aggeu, Bhaulosi ko Silasi ko Timotiyosi.

Na kìttonnogung igge, zuga bhakko Tɛsɛlongke yɛbhbho Baba Na Tumu ko Komoru Yesus Kirisos.

Any kichirbhiseong :Tumu na bhaga ba ke na bo challa.

Lɔga Yɛbhbhɛa :Zuga Tɛsɛlongke Kamannaa Yesusi Na Eterrisanɛa :Bhaulosi Tumu

2 Agge hunde kallinɛno ko Tumu kali kaliye, kàgadhdhanung igge kumulɔng na kògollogung Tumu na keterrisanno goore. 3 Na kali kali hunde kògollogung Baba na Tumuye, kagadhdhano bhɛa bere yɛbhɛo Yesus na messɛo zinggo shɛɛ, ko bhɛa bere hinisi annɛungu bibi na yelɛo zugo na ɛanɛo, ko ngaya yɛbhɛo bhɛa ale kunɛa :Komoru Yesus Kirisosi na mɛdhdhanɛo lɔga gɛnyɛye.

4 Na ngagochonginyaa gayo yellung :Tumuye, hunde dha bere bɛrranung :Tumuye, kaggaoyɔ. 5 Bhee kaggayɛoye, a ngaya bere ɛanɛiy :Kuloya Tumu ko barartina nɛnɛ na kàmadhdhagɛung kamannaa challa kɛyɛbhbho hurr hinisichinne toyeye. Lɔga bere kàmadhdhagungu tugichinne sɔng ngayo. Chɔɔ kala bere kàbhagɛa kari hunde bere kɛanung ɛnɛngge, igge gaoyɔ. 6 Na chɔɔ huna bere dokkono chɔllaa bo goore, igge annaa tɛhɛndo kamannaa challa hinisiya bo hɔla ajjungu :Kuloya Tumu na yɛbhto na artao lɔga bere kemesso :aggeu ko ga bere messo :Komoru Yesusi.

7 Na bhɛa zuga Mekedoniya ko gaa Akaya yɛbhbhanɛa kamannaa Yesusi kumulɔng, igge annaa bere teyo zuga dhɔlɛsɛno zugo gɔrɔ. 8 Na zuga bere yogɛsɛno kamannaa Komoru Yesusi, zuga Mekedoniya ko ga Akaya sɔng ngaanno. Annaa bere yoktɛsɛo zugo kumulɔng na tɛhɛtiyɛyɛa ko ba huna turumbaya kɛ̀bbɛkka na shikkɛa :zugu bhoy. Na chɔɔ hunde bere Tumu yɛbhbhano ɛnɛngge, zugo kumulɔng gaɛyɔ. Na lɔkte kɔtɔrɛo :aggeu, gena ninggɛ. 9 Kolea bere kàssanɛungu na lammanɛiy na dhɔyɛo gala bere ibhbho ke barari na kayɛo Tumu Komoruya ku dhere iho basseyɔ hunde a ɛnɛngge, bere yoktoa :zuga Mekedoniya ko gaa Akaya. 10 Yɔk dha bere yogɛsɛnɛ zugo bhɛa reyɛo Yesus, eriya Tumu, bere dhɔngngana :chɔgɔnɛ rɛsɛyɔ na mɛa iho basseyɔ tumɔ. Na nɔng anna ibbayseiy agge hunde ale Tumu ken lɔga zugony na atti gee ɛddɛɛ lɔga gɛnyɛye.