1Th 2 | SuqSC | STEP | Gochonginyaye, huna bere kàssanungngu na kɛ̀lla kari, igge gaoyɔ hunde hɔlɔng hung ngani kòbottogungngo na kedheshshano lɔga bere kènno kèmesso shɛɛye.

1 Thessalonians 2

Lɔga Kayɛa :Bhaulosi Zuga Tɛsɛlongke

1 Gochonginyaye, huna bere kàssanungngu na kɛ̀lla kari, igge gaoyɔ hunde hɔlɔng hung ngani kòbottogungngo na kedheshshano lɔga bere kènno kèmesso shɛɛye. 2 Chɔɔ huna bere sabbɔ kɔ̀chɔllanɛno Bhilibhisɔ na dhɔmiyɛa :zugu, na ɛaniy :Tumu, igge gaoyɔ. Na ko hunde chɔɔ kadaktao lɔkte bu gɛrsi, agge ngani kàmadhdhagung kamannaa Tumu challa dhɛ dhɛ hung. 3 Agge huna bere kàmadhdhagungu lɔgɔ, lɔga ku butomo kɛsɛdhdhano :aggeu na kenno kàtabtɛung na kèmesɛung gɛrrɛng, ngani kàmadhtagungngo. 4 Nɔng agge kamannaa bere ajjiy :Tumu challa kamadhɛsɛno zugo ke ngaya kanɛo zuga bere marakkɛiy na ibhbhagɛiy hinisiye. Bhee koyogɛsɛno zugo lɔgɔ na kɛdɛldɛ :yɔkku ninggɛ. Koyogɛsɛno lɔgɔ na kɛdɛl :Tumu ke ngaya anɛ hira marakkɛiy hinisiya gayoye. 5 Agge hunde ngani kùssogungngo tugi choyn na kàtabhtaungngo na kìchirkandoyo ahaa guye, ko igge gaoyɔ. Nɔng chɔɔ Tumu ko nɔng ngalɔkta gayɔ. 6 Chɔɔ bhɛa nu ko bhɛa zug gennuny diram ngani kɛ̀tɛhɛndoyo.

7 Huna bere kɛ̀lla kari, annaa bere kɔ̀lɔmungngu shɛɛ huna erroa lɔmma :jɔnɛ. Nɔng hunde bere kɛ̀tɛhɛndo aha gena bhɛa nu anda bere kighindongɔ ke ngaya kanɛo zuga bere ekkiy :Yesus Kirisosiye. 8 Nɔng annaa bere kèyelungu goore na kàmadhdhagungu kamannaa challa hinisiya bo hɔla. Na chɔɔ kamanna sɔng ngayo. Bere kɛ̀anungu hinisiya bo hɔla ke ngaya kèyelɛung na kìbhinɛnɛ hinisi gooreye. 9 Gochonginyaye, huna bere kemesso zinggo goore na kaargareo igge gaoyɔ. Annaa bere kemesinɛno bar ko kali ke ngaya kenno ngakàmargiyɛo hir konaye na kàmadhdhagungu kamannaa Tumu challa sɔng.

10 Nɔng huna bere kɛ̀lla kari, lɔga kemesso bhɛa nu hunde agga bo hinno :Tumu ridhing ningginɛna hɔla ku dhereye, igge, ngazukta yɛbhbho lɔga Yesusiye bere artao kawarre. Na chɔɔ ko nɔng Tumu gayɔ. 11 Na chɔɔ gaoyɔ huna bere kɔ̀lɔmungngu huna erroa lɔmma :chɔgɔnɛ shɛɛ. 12 Nɔng annaa kali kali kìrishongngu na kìlalungngu na kɔ̀tɔllɔhagungngu na mesigi lɔga hinno :Tumu, Komoruya bere hinnongu na senno kɔtɔlɔmung :nɛa na tɛldi bhɛa nɛnɛ lɔmma diram.

13 Na ko agge keterrisanno Tumu kali kali ke ngaya bere shigɛo lɔga gɛnyɛ bhɛa nayo na yɛbhɛoye. Na igge ngani yɛbhɛto huna lɔga yokkono :hiriyɔ. Na annaa bere kàmadhtagungɔ na yɛbhto ke ngaya anɛ lɔga ajjiy :Tumu ku dhereye. Na a ngagiya ko mɛa toye ɛyanungɛ ga yɛbhbho na kɔbhɔ shɛɛye. 14 Gochonginyaa gayoye, igge dha bere artao lɔga zuga bhakkɛa baa Yudha yɛbhbhɛa lɔga Yesus Kirisosi. ^{▼▼Tuga Giriki se “...Kirisos Yesusi...”} Na ngaya yɛbhɛo lɔga gɛnyɛye, a bhɛa bere chɔllanɛnɛo bhɛa zuga bhora nu damiya bere chɔllanɛnɛa :zuga yɛbhbhɛa lɔga Tumu ɛlla baa Yudha bhɛa bhora nɛ Ayhudhi. 15 Yɔk agga bere kɔdhdhɛa Komoru Yesus ko zuga yogɛsɛnɛa zugo lɔga dhugunono :Tumu na hangiyɛa chɔɔ agge na ajjɛa Tumu munyu. Na chɔɔ kɔnkɔnnɛa na marrɛa zugo kumulɔng 16 na senno ngakòyoktɛsɛo zuga bhora anaa lɔgɔ na kabayɛ. Yɔk hunde ngani messɛ ngangaye, idhigisɛɛ lɔga gɛ gɛrsa dirr. Nɔng Tumu annaa nyima kɛr na mɛa teu kolea senno katɛɛ yɔk.

Lɔga Kadhɛa :Bhaulosi Zuga Tɛsɛlongke Bhɛa Senno Karɛ

17 Na nɔng mɛa gochonginyaye, huna bere kegenɛna ko igge, kegennɛ rɛhichinne sɔng. Na annaa bɔɔ killobto bhɛa kenno kìtinyandɛy na kɛ̀tɛldɛ kari sɛgɛn ke ngaya kagadhɛung igge gooreye. 18 Na bere kènno kàyto bhɛa nu na taganyɛiy :Moldoyɔ. Na chɔɔ anye Bhaulos sabbaa nanu rɛ bere killobba bhɛa keni kassayɛung igge kɛr. 19 Na hunde Komoru Yesus ale kunde, lɔkte ngani kɔlɔmmo hinisiye na ale kɔjɔanɛo diram bhɛa nɛnɛ na hinisiya gayo anɛ hɔliye a ngaya bere yɛbhɛo lɔga gɛnyɛ sɔngge. 20 Nɔng agge ngahinisi hɔldinda ko ngadiramba kɔlɔmmoye kumulɔng anno :iggeu dhere chi.