1Th 4 | SuqSC | STEP | Na mɛa gochonginyaye, annaa bere sabbɔ kàmadhtagungɔ bhɛa bhagɛo ba na hinisa Tumu keteɛ hɔli. Na ko mɛa toye igge ngani bhakko ngadamitonu chi. Na nɔng mɛa kògollung na kɔ̀tɔllɔhagung sara Komoru Yesusi na kalda chɔɔ jarta kolea bɔɔ bhagɛo ba sabbɔ.

1 Thessalonians 4

Lɔga Kàbhagɛa Ba Na Hinisa Tumu Keteɛ Hɔli

1 Na mɛa gochonginyaye, annaa bere sabbɔ kàmadhtagungɔ bhɛa bhagɛo ba na hinisa Tumu keteɛ hɔli. Na ko mɛa toye igge ngani bhakko ngadamitonu chi. Na nɔng mɛa kògollung na kɔ̀tɔllɔhagung sara Komoru Yesusi na kalda chɔɔ jarta kolea bɔɔ bhagɛo ba sabbɔ. 2 Yɔk lɔga bere ajjiy :Komoru Yesusi buyna nɛnɛ na kàmadhdhagungu sabbɔ, gaoyɔ. 3 Tumu se te zuga kɛnginyano hɔla ridhing ningginɛna na dhɔyɔ lollumo 4 na bhɛgɛ rɛhiya gu shɛɛ na te zuga ridhing ningginɛna lɔmmo diram. 5 Na igge huna zuga imaggɛa Tumu, lollumo ngachirkanno. 6 Na ngakona kɛddɛ ngalɔkta bhɛa gochonga nɛnɛ na kadak jagarɛ. Komoru Yesus ale atti zukte messɛ ngalɔkta gɛrɛ ku ngangaye kumulɔng damiya bɔɔ kìbbashshɛunggu na kòyokkogɛunggu sabbɔ. 7 Nɔng Tumu ngani lollumo keliogiysho. Bere eleey na kabhaga ba na kète zuga hɔla ridhing ningginɛna. 8 Na nɔng hirre mar ngalɔkta na kɛye, hiri ngakɛyo. Nɔng kɛ Tumu hira ajjungu Kuloya nɛnɛ kɛnginyana barara.

9 Na yɔk ngalɔkta yelnɛnɛo kɛngɔ kɛngɔye bhee kɔ̀gɔdhdhagɛung dadab na kàmadhdhagɛungu ninggɛ. Annaa bere madhungɔ :Tumu kɛr. 10 Na chɔɔ mɛa toye a nganda yello gochonginyaa gu ɛlla Mekedoniyagiye kumulɔngge. Na mɛa kɔ̀tɔllɔhagung na teyele goore. 11 Na damiya bere kòyokkogɛunggu sabbɔ, kènno mɛtta na bhaga ba shɛɛ. Na huuhuu ngamesso na woyɛo lɔgɔ gɔrɔ. Mesigi zinggo na tagaya rɛhiya gu. 12 Nɔng hunde messo ngadamitaye, orrungɛ :zuga ngani Yesus kɛyɛbhtao na lɔmmo diram bhɛa nɛ ke ngaya kayɛo rɛhiya gu na zugo rɛhi ngaibhɛsɛnooye.

Kolea Ale Kunɛa :Komoru Yesusi

13 Gochonginyaye, agge kenno taga lɔga zuga bere rɛssɛa sabbɔ hunde a ɛnɛngge, na ngamunyu huna zuga ngani Yesus kɛyɛbhtao na kedhdhɛa hinisi. 14 Nɔng agge kɛ̀yɛbh bhɛa bere rɛsɛa :Yesusi na bansanɛa ko bhɛa zuga bere yɛbhbhɛa nɔng sabbɔ na rɛssɛa hunde ale ibbaniseono :Tumu na dhɛanɛ ko Yesus kariye. 15 Komoru Yesus anna bere senno, se kèe hunde ale wokkonoye, agge ngazukta kɛ̀yɛbh nɔng na ngani kɛ̀l basseyɔ ko bhee ale kunɛ :nɛaye, ale kɔ̀ɔbh ngazuktonu bere yɛbhbhɛ nɔng na rɛssɛ sabbɔye. 16 Nɔng Komoru ale kun tumɔ na yogɛsɛn zugo lɔgɔ goore na hira ekko :Tumu ku gulsa yogɛsɛn zugo lɔgɔ na turumbaya Tumu shikkɛ :zugu na zuga yɛbhbhɛa Kirisos bere rɛssɛa bansanɛ sabbɔ. 17 Na agge ngagiya ngani kɔ̀dhɔynɛ na kɛ̀l basseyɔye kɛ̀hɛ ko yɔk kari na kìtinyandɛ ko Komoru tumɔ idhogiye toye na kɛtɛldi kari ko kingi. 18 Na mɛa igge ɛsɛdhɛ ngalɔkta na iriytɛ kɛngɔ.