1Th 5 | SuqSC | STEP | Gochonginyaye, bhee kòyokkogɛung kolea ale wokkonɛa :Komoruyɔ oo bɛrguye ale kunɛye na kɔ̀gɔdhdhagɛung dadab ninggɛ.

1 Thessalonians 5

1 Gochonginyaye, bhee kòyokkogɛung kolea ale wokkonɛa :Komoruyɔ oo bɛrguye ale kunɛye na kɔ̀gɔdhdhagɛung dadab ninggɛ. 2 Nɔng hunde ale kun dari huna ɔgɔrchagiya kunno barɔye, igge gaoyɔ. 3 Chɔɔ hunde zugo ngani sennɛ, “Ba a challi hung na agge kɛ̀l ke na bo challaye,” lɔga bo gɛrsa dhullanɛ dari huna tɛriya ilagasana na senno kuhudhugɛ na yɔk chɔɔ bhee jorɛ ninggɛ.

4 Gochonginyaye, igge anno zuga kɔrrɔynɔ toye ngaɛlloo. Na ngakaldonu nɔng ale huna ɔgɔrchaginy dari ngadhullagungo. 5 Igge kumulɔng anno erroa hɔldinuny. ^{▼▼Tuga Giriki se, “...hɔldinuny ko kaliine...”} Zuga kɔrrɔynuny ngakanno. ^{▼▼Tuga Giriki se, “Zuga baruny ko ga kɔrrɔynuny ngakanno.”} 6 Na mɛa any kɛ̀bhɛgɛ rɛhi na kɛ̀tɛldi tunɔ. Ngakɛ̀tɛhɛyɛ ko ga ungussɛa. 7 Zuga ungussɛa, yɔk ungussɛ barɔ, na ga dhuttiyɛa ko yɔk dhuttiɛ barɔ. 8 Nɔng agge kan zuga hɔldinuny. Na ga kɛ̀bhɛgɛ rɛhi na kɛ̀yɛbhɛ Yesus na kèteyele zugo. Na ngalɔkta kèmesɛ ngangaye, kɛɛnggiy rɛhi huna ahaa kìchibɛa banggurachin saginɛgiye. Na kìbhtɛsɛ lɔga ale ibbaysiyɛiy :Yesusi hinisi na aynde kɛngiyɛ sabbi huna kuguriya chibbɛa :zuguye. 9 Tumu nɔng wolok ngani keliogiysho. Bere eleey na kɔ̀jɔya bassey bhɛa Komoruya na Yesus Kirisosi. 10 Nɔng Kirisos annaa bere rɛsɛiy agge. Na ko hunde kɛtɛldi basseyɔ oo bere kergiyɛ, se kɛ̀tɛldi kari ko nɔng. 11 Na mɛa igge kɛngɔ iriytɛ na yɛbhɛ Tumu goore na te dhandali ngadamita ngani iriynɛnɛoye.

Lɔga Wurtune Kàmadhɛsɛna Na Uturronɛa

12 Na mɛa gochonginyaye, kɔ̀tɔllɔhagung na zukte mɛdhdhanɛ lɔga Tumu bhɛa nuye ayɛ diram. Aggee allinɛnɛungɛ na ibbashungɛ lɔga gɛrsaye. 13 Ayɛ diram na teyele ke ngaya allinɛnɛungɛ na ɛanɛungɛye. Na igge tɛldi shɛɛ na bhaga ba ke na bo challa.

14 Na mɛa kɔ̀tɔllɔhagung na ibbaya gɔngga na kemesigi zinggo! Na zuga ɛngɛrsɛa bho iriytɔ na ga tɔlgɔnya ɛyayɔ! Na igge bhɛa zugony kumulɔng hinisiya gu ojjigi ke bibi! 15 Na hunde hir kona ɛddɛ lɔgɔye, lɔga gɛrsa ngayagɛsɛno. Na igge kɛngɔ mesigi shɛɛ na zugo kumulɔng mesɛsɛ lɔga challa.

16 Hinisiya gu any kete hɔli kali kali. 17 Tii tii alliyɛ ko Tumu na ngadhɔtto. 18 Eterrisana Tumu lɔkke kumulɔng. Yɔk ngagiya a lɔkte hinnogung :Tumuye ke ngaya yɛbhɛo Yesus Kirisose. ^{▼▼Tuga Giriki se “...Kirisos Yesuse...”} 19 Lɔga messo :Kuloya Tumu ngalammo. 20 Lɔga yokkonɛa :zugu senno ajjɛa :Kuloya Tumu, ngakɛo. 21 Maraga kumulɔng na gee chalde ibhtɛsɛ hinisi. 22 Na bhɛa lɔga gɛrsa kumulɔng tɛldi rɛna.

23 Na mɛa Tumu Komoruya yakkana ba chaldin, any keme lɔkte hin :nɛaye kumulɔng bhɛa nu na te zuga ridhing ningginɛna. Na Komoru Yesus Kirisos hunde ale kunde, kɛbhɛk kulyaa gu ko basseya lɔmmo :iggeu ko rɛhiya gu na kete ga bo ɛlla hurr kumulɔng. 24 Na Yesus Komoruya bere eleongu, nɔng anna kìbhɛsɛna hinisi. Na lɔkte se kemese, ale me na bhugɛsɛn dhere.

25 Gochonginyaye, ogoldogiy Tumu. 26 Na zuga yɛbhbhɛa Yesus kumulɔng issa goore. 27 Na anye kɔtɔllɔhagung sara Komoru Yesusi na ngalɔkta ɛl dadabɔ kìttonnogungge, toyɛɛsɛ zuga yɛbhbhɛa Yesus kumulɔng. 28 Komoruya na Yesus Kirisos any kichirbhiseong igge.