1Ti 1 | SuqSC | STEP | Ngadadabta kɔgɔdhan :anyo Bhaulosi, hira ekonyi :Kirisos Yesusi bere ibhbhananyi :Tumu hira bere ibbayseiy agge ko :Kirisos Yesusi hira kìbhɛsɛna lɔga gɛnyɛ hinisi, na yokkogonyɛa lɔgɔ.

1 Timothy 1

1 Ngadadabta kɔgɔdhan :anyo Bhaulosi, hira ekonyi :Kirisos Yesusi bere ibhbhananyi :Tumu hira bere ibbayseiy agge ko :Kirisos Yesusi hira kìbhɛsɛna lɔga gɛnyɛ hinisi, na yokkogonyɛa lɔgɔ.

2 Na kɔgɔdhdhaginy inye Timotiyos. Inye hɛtto ko eriya nanu ku dhere, ke ngaya yɛbhɛ Kirisos hunde nande.

Any kɛdhdhɛttandiny :Babaa Na Tumu ko :Komoruya Na Kirisos Yesusi na kichirbhisiyeny na kayiny zany na bhak ba ke na bo challa.

Lɔga Kìbbayɛa Timotiyos Na Katamarɛ Zuga Madhdhɛa Zugo Lɔga Ku Butomo

3 Na damiya bere kɔtɔllɔhagɛinyi huna bere kɔgɔyi Mekedoniyagiye, mɛa ga tɛ Ebhesonɔ ngonu na yogɛsɛ ngazuktonu madhɛsɛnɛ zugo kamannaa ku butomoye, na ngamadhɛsɛnɛ. 4 Na yogɛsɛ na kɔdhɔyɔ lɔga dhagɛa kali ku butomo ko bhɛa kɔbhɛa sara bere kokonginyaa gɛ kinginye hɛa na ngauturronɛayo dhul. Yɔk ngalɔkta ku ngangaye, ga irishshɛa zuga yɛbhbhɛa Tumu na kɔɔbhtɛ lɔga gɛnyɛ na kemesɛ zinggoa gɛnyɛ ngayo. Agga honynyɛa ɛkkɛnyan. 5 Yɔk lɔkte keni madhɛsɛ zugoye hologun a ɛnɛnggeo, kèe zugo kibhtɛsɛ lalugɛ hinisi dhere. Yɔk zuga ibhɛsɛnɛa lalugɛ hinisi dhere, agga hinisiya gɛ ɛlla hurr na ɛsɛdhdhɛa lɔga challa na yɛbhbhɛa kamannaa challa dhere. 6 Na yɔk ngazukta madhɛsɛnɛ zugo kamannaa ku butomoye gena bere kɛnggaa rɛhi bhɛa ngalɔkta ku dhereye, na ayta gɔra lɔga hologun ningginɛna. 7 Yɔk ngazukta hinnɛ bhɛa senno keteyɛ zuga madhdhɛa zugo damiya Tumu bere kàjjɛa Muse, na nɔng hologuna ngalɔkta madhɛsɛnɛ zugoye, oo hologuna ngalɔkta yokkɛ na sennɛ a dhereye, imaggɛ dhul.

8 Nɔng damiya Tumu hunde kɛbhɛgɛ :zugu shɛɛ, na kamadhtɛy dib, kàggayɔ hunde a challiye. 9 Na sɛgɛn agge kàggayɔ hunde damiya Tumu na bere kàjjɛa zuga ridhing ningginɛna ngayoye. Nɔng ngadamita Tumuye, bere kàjjɛa zuga damiya Tumu ngabhɛkkɛayo ko ga bhoriyɛa ba ko ga Tumu ngaɛngɛrsɛayo ko ga messɛa lɔga gɛrsa ko ga lɔmmɛa ridhing na lɔga Tumu ngatɔgiyɛayo ko ga kɔdhdhɛa choynggɛ ko jugɛ ko ga nissɛa zugo 10 ko ga messɛa lollumo ko ga maya assanɛa ga maya lalugɛ ko ga talnɛnɛa zugo ko ga tallɛa ko ga alliyɛa butomo ko ga mallɛa lɔga bhiigɛsɛnɛa zugo ku dhere ko lɔkte imaginɛ ko lɔga ku dhere kàmadhinɛnɛaye kumulɔng. 11 Yɔk ngalɔkta chal ku dhereye, agga ganɛna ko kamannaa challa dhugunɛsɛna zugo lɔga dirama Tumu, Komoruya bo tuhinɛna bere yɛbhbhaganyi anye na ajjanyi.

Lɔga Bhaulos Ɛdhdhɛttanɛa :Komoruyɔ Yesus Kirisosi

12 Anye kutuhi Komoruya Na Kirisos Yesus, na bere ɛananyi na irishshonyi na yɛbhbhanyi na bɛrrananyi na kàtagay nɔng. 13 Nɔng anye bere kingi kani na kɔdhɔmi nɔng, na kahangi zuga yɛbhbhɛa nɔng, na kobhorii ba. Na chɔɔ ko hunde anye kète nganda kemesi ngangaye, nɔng bere chirbhiseonyɔ ke ngaya bere kimagɛ lɔga kemesi :anyo na nɔng ngani kɛ̀yɛbhɛoye. 14 Na koo ɛdhdhɛttanany :Komoruya na goore dhogoy na tɔrrɛany bhɛa kɛyɛbhɛi kamannaa challa ko bhɛa kibhɛsɛni zugo hini ke ngaya kɛlɛo ko Kirisos Yesus kari ke dhɔnɛye.

15 Yɔk ngalɔkta sennɛ, “Nɔng Kirisos Yesus annaa bere kowa ba, na kibbaysi zuga lɔmmɛa ridhingge,” a dhere na maya kɛ̀yɛbh kumulɔng. Nɔng bhɛa zuga lɔmmɛa ridhing kumulɔng, inde kɛddɛi lɔga gɛrsa gooreye, kani anye. 16 Na ngaya kanɛ na kemesi gɛrrɛng na chɔɔ kojorroni zuga mesɛa lɔga gɛrsa kumulɔngge, nɔng Kirisos Yesus chirbhiseony anye, na ibhagany na ojjony ke hira senno kɛlɛhɛnɛsɛ zugo lɔgɔ na kɔdhɔlɛsɛ zuga ale yɛbhbhɛa nɔng na jɔanɛa basseya iho dhul bhɛa nɔng hinisa nɛnɛ anɛa bu na nyimmɛa lɔgɔ goore. 17 Na mɛa Tumu Komoruya dhɔnɛna, ngakorroo iho dhul ko kingi, na ngarɛssao, any kɔdhɔngɛ na kɔtɔlɔ diram kali kali! Amen.

18 Na mɛa eriya nanu Timotiyose, anye koyokkoginy ngalɔkta kumulɔng damiya bere yokkɛinyɛa :zugu na kadha ngalɔktonu na mɛdha na tamar lɔga ku butomo na ɔdhɛ huna bansanayny. 19 Na yɛbh kamanna challa dhogoy na ibh tii na te hira kɔbhi lɔga challa lɔmi hinisɔ. Yɔk zug gena bere tamarta bhɛa yɛbhɛa kamannaa challa na tɛhɛtta ko gonggula ɛddɛnɛna yirisiyɔ na guynɛna. 20 Yɔk bhɛa ngazuktonu messɛ ngangaye, kona a Hemenes ko Iskindir rɛ. Na yɔk bɔɔ kibhau na kaynɛu Moldoy na kamadha rɛhi na kɔdhɔyɔ bhɛa dhɔmɛa Tumu.