1Ti 2 | SuqSC | STEP | Na mɛa lɔkte kɔtɔllɔhagɛiny inye ko zuga yɛbhbhɛa kamannaa challa goore na mesigite a ɛnɛnggeo, keni alliyɛ ko Tumu na ogolottɔ, na ogoldɛsɛ zugo kumulɔng na ayɛ nɔng diram na tuhutɔ.

1 Timothy 2

Lɔga Kàmadhɛsɛna Timotiyos Hunde Maya Zugo Ko Tumu Allinɛ Ɛnɛngge

1 Na mɛa lɔkte kɔtɔllɔhagɛiny inye ko zuga yɛbhbhɛa kamannaa challa goore na mesigite a ɛnɛnggeo, keni alliyɛ ko Tumu na ogolottɔ, na ogoldɛsɛ zugo kumulɔng na ayɛ nɔng diram na tuhutɔ. 2 Na ogoldɛsɛ chɔɔ komortɛn ko zukte bibi lɔmmɛ zugoye Tumu kumulɔng, na agge kɔ̀tɔlɔmɔ zany na kàbhaga ba lalala na kɛ̀bhɛgɛ lɔga hinno :nɛa shɛɛ na kɛ̀tɛngɛrɛtɔ. 3 Lɔkte ku ngangaye, a gee chal hin :Tumu Komoruya na Ibbayseiy agge na ajjɛ nɔng hini hɔldinde. 4 Nɔng hin bhɛa senno kabayɛ :zugu kumulɔng na kataktɛ kamannaa nɛnɛ bhɛa anɛa dhere. 5 Bhee anɛ ngangaye, a ngaya Tumu anɛ dhɔnɛ sɔng, na gɔldanga itinynyanna Tumu ko zugo na idhochcho, anɛ dhɔnɛ sɔngge. Nɔng ngagɔldangga rɛ, a hira kèleo Kirisos Yesus, 6 bere ibhbhana rɛa nɛnɛ ke yekkuya zugony kumulɔng. Lɔkte bassɛ :zugu kumulɔng bere dhugunnogiy :Tumu kolea bere sennanɛa :nɛaye, a ngagiya. 7 Na ngagiya a lɔkte bere kìbhbhanɛany anye na kàjjɛany buyna koyogɛsɛni zugo kamannaa challa na kòjjɛany ke hira ekonyi :Yesusi, kamadhɛsɛni bhorinyaa anaa bhɛa kɛ̀yɛbhɛa kamannaa challa ku dhere dibte. Nɔng anye koyokkon lɔga ku dhere, butomo ngakɛmɛzziiyo.

8 Na zuga maya hande ɛlɛye kumulɔng, any kalliyɛ ko Tumu ke na bo dhɔngɛa sɛnɔ tumɔ dɛmney oo ɛkkɛnyan ninggɛn na ridhing ngalɔmmɛayo. 9 Na ko yɔk zuga ngaha any kamalugu ruminyaa gɛ na kɛchɛbtɛ shɛɛ na zugo liya ngaajjɛ. Na yɔk maya shɛɛ shɛɛ ngayisinɛo na chibinɛo worginyaye oo chalanyaa bo gaw dhandala oo ruminyaa bo gaw dhandala ke bhɛa ganɛna ko rɛhiya gɛ. 10 Yɔk maya messɛ lɔga challa huna zuga ngaha ɛngɛrsɛa Tumu na kɔdhdhɛsɛnɛa kɔmma na ganɛna ko yɔk.

11 Na hira ngaha nɔng any kichirar lɔkte kàmadhɛsɛnde laay, na hirre madhɛsɛn nɔng lɔgɔye kɛtɛngɛrtɔ. 12 Na anye kaganyɛ nɔng bhɛa madhɛa zugo lɔgɔ oo bhɛa allinɛnɛa hira maya. ^{▼▼hira maya Ngalɔkta sennɛ hira mayaye, Girikichɛn hologun kona a bhɛa kèsenɛa “hira nɛnɛ.”} Nɔng maya dhiynɛ rib. 13 Bhee anɛ ngangaye, a ngaya Adam bere kèghendonɛ sabbɔ, na Ngahɛwan kèghendonɛ wurtɔye. 14 Na sɛgɛn hira bere kìtabhbha na koo lɔmma ridhing Adam ngayo. A hira ngaha. 15 Na chɔɔ ko hunde kete nganga, nɔng hira ngaha ale basɛ bhɛa hudhukkonɛa erro, hunde yɛbh Tumu goore na ibhɛsɛn zugo hini na me lɔga challa ridhing ningginɛna kali kaliye.