1Ti 4 | SuqSC | STEP | Nɔng Kuloya Tumu, dhugunnono lɔgɔ dib na se kee bɛrgunyaye ale wurtuneye, zug gena ale dhɔttɛ bhɛa yɛbhɛa kamannaa Yesusi. Na kɔbhbhɛ lɔga tabhɛa :nyamanɛɛnu ko lɔga madhɛsɛnɛa :mɛnɛngu.

1 Timothy 4

Lɔga Kàmadhɛsɛna Timotiyos Lɔga Zuga Madhdhɛa Zugo Lɔga Ku Butomo

1 Nɔng Kuloya Tumu, dhugunnono lɔgɔ dib na se kee bɛrgunyaye ale wurtuneye, zug gena ale dhɔttɛ bhɛa yɛbhɛa kamannaa Yesusi. Na kɔbhbhɛ lɔga tabhɛa :nyamanɛɛnu ko lɔga madhɛsɛnɛa :mɛnɛngu. 2 Yɔk lɔkte ku ngangaye, agga madhinɛnɛa :butoga tabhbhɛa zugo nigite. Yɔk ngazukta hinisiya gɛ heo bere kɔ̀shɔgɛ goa tomogiya bo awurno kɔ̀ssa na anna dildili na bhɛa gayɛa lɔga challa ko ga gɛrsa ningginɛna dhul. 3 Yɔk ngazukta, madhdhɛ zugo na kanyɛ bhɛa senno kagambɛy na chɔɔ adhɛsɛnɛ lɔgɔ na kingidhi amissɛynyaa bere ghendono :Tumu gena. Yɔk ngaamissɛynyaonu, agga bere ghendono :nɛa na kibhta :zuga yɛbhbhɛa kamannaa nɛnɛ ku dhere na gayɛa, na kutuhu nɔng na kusigitɔ. 4 Yɔk ahaa bere ghendono :Tumu kumulɔng a challi. Na hunde kìbhta na kùtuhu nɔng na te ushaye, bhee kàmarɛ na kùjugɛ ninggɛ. 5 Bhee anɛ ngangaye, a ngaya Tumu ojjɛ amissɛ ke tuhinɛ ke bhɛa kallinɛnɛa ko nɔng ko bhɛa tuhɛa :nɛa lɔga gɛnyɛye.

6 Na inye madhɛsɛ zuga yɛbhbhɛa Yesus ngalɔkta. Hunde mesi ngangaye, ale ani hira challa kayi Kirisos Yesus. Na ale iriynɛn lɔga ku dhere bere kɔbhbhani kingi, dhugunnogiyɛa bhɛa kɛ̀yɛbhɛa Yesus ko lɔga challa bere madhdhaginyɛa :zugu. 7 Na lɔga dhagɛa :zugu kali ku butomo Tumu diram ngaajjɛayo ko lɔginyaa hologuno ningginɛna yokkɛa :zugu, ngachirari. Na dhagɛsɛ rɛ bhɛa kɔbhɛi lɔga Tumu dib na mesɛi lɔga gɛnyɛ. 8 Nɔng hunde kàragɛsɛn rɛhi bhɛa kèmesinɛnɛa na kànɛa dhɔrɔgɔsiye, ɛaniy bhe chinyi hung. Na nɔng hunde kàragɛsɛn rɛhi bhɛa kɔ̀ɔbhɛa lɔga Tumu dib na kèmesɛa lɔga gɛnyɛye, ɛaniy lɔkke kumulɔng ke ngaya lɔmɛ lɔga bhiikagɛiy :nɛa kɔ̀jɔana mɛa toye hunde ngani kàbhak ba ngayaye ko gee ale kinginyeye. 9 Yɔk ngalɔkta agga ku dhere maya yɛbhbhɛa :zugu kumulɔng. 10 Na aynde maya kɛ̀mɛnyɛsɛn goore dhogoy na kɔ̀mɔdhɛye. Nɔng agge bhee kèmesɛ ngangaye, a ngaya kɛ̀yɛbhɛ Tumu, Komoruya iho basseyɔye. Nɔng a Komoruya ibbayseo zugo kumulɔng. Na chɔɔ goore ibbaysi zukte yɛbhbhɛ nɔngge.

11 Na mɛa inye yogɛsɛ zugo ngalɔkta na madhɛsɛ shɛɛ. 12 Na ngakatamayiny :konɔng ke ngaya ngani anɛ chinyiye. Te hira mɛzzii lɔgɔ shɛɛ na mesi lɔga hinno :Tumu na ibhɛsɛni zugo hini na yɛbhi kamannaa challa na ihi hurr. Na hunde orrɛa :zuga kɛ̀yɛbhbha Yesus kariye, orronɛa na messɛa. 13 Na ko bhee ale kassanɛiny :anyo, ga mɛdha goore dhogoy na toyɛɛsɛ zugo lɔga Tumu, na madh na dhugunɛsɛ hologun dib. 14 Na ngakargarɛɛsɛ lɔga bere ɛdhdhɛttanɛinyi :Tumu yokkoginyɛa :zuga bibiyo lɔmmɛa zuga yɛbhbhɛa Yesus kala bere tadhdhɛinyɛa sɛnɔ.

15 Na mɛdha na mɛnyɛsɛ ngalɔkta tii kargari ninggɛn, na lɔga gunyu kargi :zugu kumulɔng hunde dhaa mɛnyɛsɛn na mesi gooreye. 16 Na lɔkte mesi hunde bhagi baye ko ga madhinɛnɛi, marak shɛɛ na bhɛk na mɛnyɛsɛ na me kargari ninggɛn. Hunde mesi ngangaye, aynde ale ibbaysɛɛ rɛa nunu ko zukte shikkenyɛye.