1Ti 5 | SuqSC | STEP | Na hira bo, gɔny huna babaa nunu na lɔgɔ madhɛsɛ haalɛ. Goore ngaɛggɛyɛsɛni na wologi. Na tɛgɛn, gɔny huna gochonginyaa gunyu.

1 Timothy 5

Lɔga Kàmadhɛa Timotiyos Lɔga Tɛrroa Ku Bhoyoga Ko Ga Zuga Bibiyo Ko Ga Gaymanyauny

1 Na hira bo, gɔny huna babaa nunu na lɔgɔ madhɛsɛ haalɛ. Goore ngaɛggɛyɛsɛni na wologi. Na tɛgɛn, gɔny huna gochonginyaa gunyu. 2 Na tɛrroa bibiyo, ko yɔk gɔny huna mamachinaa gunyu. Na tɛrroa ngani chicho, gɔny huna ninginɛsaa gunyu na ibh shɛɛ hinisa bo challa ridhing ningginɛna.

3 Na tɛrroa ku bhoyoga chɔllanɛna goore, tɛngɛr na ɛbhi shɛɛ. 4 Na nɔng hunde tɛriya ku bhoyogi kona lɔ erro oo ashaye, ngaerroonu ko ngagenu ku ashaye, yɔk ga sabbɔ maya ɛdhɛmisɛɛ bhɛa ɛanɛa zuga gɛ na urrugɛsɛnɛ lɔga bere mesɛsɛnɛa :jugɛu ko :choynggɛu ko :koginggɛu ko :ohinggɛa gɛ na aynde messɛ lɔga kɛ̀yɛbhɛa Tumu na gaɛ bhɛa kèmesɛa lɔga hinno :nɛaye. Ngagiya a lɔkte ajjɛ Tumu hini hɔldinde. 5 Nɔng tɛriya ku bhoyogiya chɔllanɛna goore dha bere kɔ̀dhɔtta bhichang, aynde ibhɛsɛn lɔga ale ɛanɛa :Tumu hini dirr na mɛdhdhana na ogol Tumu tii bar ko kali na kɛaye. 6 Na nɔng tɛriya ku bhoyogiya messo lɔga sabbaa nɛnɛ hinno :nɛa sɔng, chɔɔ ko hunde kɛtɛ basseyɔ, hɛt ko hira dha bere erra. 7 Na mɛa inye yogɛsɛ zugo ngalɔkta na aynde zugo lɔkte gɛrsi ngadhɔngnganɛo na zugo ngaujukanɛoye. 8 Nɔng hirre bhɛnɛna gɛnyɛ ngalɔmmo na mar chɔɔ bhɛa ɛanɛa zuga doraa nɛnɛye, a hira dha bɔɔ dhɔtta bhɛa yɛbhɛa Tumu na tewa gɛrɛ na jaraa chɔɔ hira Tumu ngani kɛyɛbhbhao.

9 Na hunde kɔdhdhi sara tɛrroa ku bhoyoga kènno kɛ̀yaye, inde oynyaa gɛnyɛ bhagɛa ba 60 ngani keteyoye, sara ngakɔdhdhi. Na sara tɔgɔn inde dha bere ɛl ko hira nɛnɛ sɔng na ibhɛsɛn hini, 10 na gaɛ :zugu kumulɔng hunde a tɛriya irogito erro shɛɛ, na lammana kɔmɔn, na onynyo zuga Tumu ridhing ningginɛna jagarɛ, na ɛana zuga chɔllanɛna, na hini ujjono na hinno bhɛa senno kemesɛ lɔga challa kumulɔngge.

11 Na yɔk tɛrroa ku bhoyoga ngani chicho, sara gɛ ngakɔdhdhi. Anye bhee kesenɛ ngangaye, a ngaya yɔk ale goore hinɛ bhɛa senno kagambɛ :zugu sɛgɛn na lɔga bere bhiikkɛa na katagaytɛ Kirisos goore ngamɛnyɛsɛnɛoye. 12 Na ngaya mesɛ ngangaye, ale tis yɔk na ujjukkanɛ rɛhi :eygo na atti :Tumu ke ngaya dhɔyɛ lɔga bere bhiikkɛa na senno katagaytɛ Kirisose. ^{▼▼Dha bere ngabɛrguonu bhɛa zuga yɛbhbhɛa Tumu, hunde lɔ tɛriya ku bhoyogiya chɔllanɛna na hira ɛana ningginɛnaye, sara gɛnyɛ kɔ̀gɔn doraa Tumu na kɛ̀anayɔ. Na ko nɔng bhiik lɔga mesinɛnɛa doraa Tumu dhul ke ngaya ɛanɛ doraa Tumuye. Na ngalɔkta ɛl kutur 12ɔye ɛlɛhɛn ngalɔkta bhiik tɛriyɔ na kèmesɛy doraa Tumuye. Na nɔng hunde teriya ku bhoyogi ngani a chinyiye, kesea hin bhɛa senno kagamɛ hir konnɔ sɛgɛn dhɔ lɔga bere bhiikko na katagayɛ Tumu na aynde Bhaulose yokkonɛ ngalɔktaye.} 13 Na sɛgɛn ale orronɛ lɔga gɔnggamo na woɛ doriyoa zugony tòlong tòlòng. Na chɔɔ yɔk gɔngga sɔng ngayo, agga woyɛa lɔgɔ gɔrɔ na juhɛa lɔga zugony ngani kataktao. 14 Na mɛa anye kamadhi tɛrroa ku bhoyoga ngani chicho na kaytɛ :zugu, na kuhudhukto erro, na kalliyɛy doriyoa gɛ shɛɛ. Yɔk hunde messɛ ngangaye, bhee sara gɛ dhɔngnganɛ :mirogiyɔ ke gɛrsi, ninggɛ. 15 Anye bhee kesenɛ ngangaye, a ngaya tɛrroa ku bhoyoga ngani chicho gena bɔɔ dhɔtta bhɛa yɛbhɛa Tumu, na kɔbhta Moldoyte.

16 Na tɛriya yɛbhbha Kirisos kona hunde kesea lɔ tɛrroa ku bhoyoga ku bhɛnɛna gɛnyɛ ɛbheoye, any kɛa :nɛa hung. Ngakɔgɛ bhɛa zuga yɛbhbhɛa Tumu na kamargi zuga ɛbhiyɛa tɛrroa ku bhoyoga chɔllanɛna dhere, bhɛnɛn ningginɛna dhul.

17 Na zuga bibiyo lɔmmɛa zuga yɛbhbhɛa Yesus shɛɛ, maya kɔ̀dhɔng na kɛ̀ngɛrɛ goore dhogoy, na chɔɔ goore dhogoy maya kɔ̀dhɔng gee madhɛsɛnɛ zugo lɔga Tumu na dhugunɛsɛnɛ dibte. 18 Bhee anɛ ngangaye a ore go, dadaba lɔga Tumu se, “Olea dokkono liwa, tugɔ ngachibi.” ^b ^{▼▼Damiya zuga Ayhudhi zugo hunde se kɔchɔya liwaye ibhbhanɛ olinyaa gɛ na chibbɛ na dokkonɛ liwa.} na “Hira messo zinggo, maya dheriya nɛnɛ kàgadhiyɔ.” ^d 19 Na hunde lɔ lɔkte kìchilɛ zuga bibiyo lɔmmɛa zuga yɛbhbhɛa Yesus, na a lɔga dha bɔɔ zuga orronɛa kawarre gee ku ramman oo sizzi ngani kartaoye, ngachirari. 20 Na hunde lɔ gee messɛ lɔga gɛrsaye, wolok bhɛa sɛrɔ ɔdhdha na aynde ale orrɛ :genne na ko yɔk ɛngɛrsɛ na lɔga gɛrsa ngamessɛoye. 21 Nɔng anye koyokkoginy lɔgɔ bhɛa orrɛinyi :Tumu ko :Kirisos Yesusi ko :zuga ekko :Tumu bere bɛrrana :nɛa, na bhɛk ngalɔkta wa kamadhdhaginyde shɛɛ na ba ngalɛli. Na zugo kumulɔng gɔny kawariya dhɔnɛna.

22 Na ngangosumi na ibhbhani hir kona na tadhɛ siyɔ. Na ko zuga messɛa lɔga gɛrsa ngatɔrnɛno. ^{▼▼Ngalɔkta hologun a bhɛa kènɛa hunde hir kona lɔga gɛnyɛ shɛɛ ngani taggoye, ngangosumi na ibhbhani na ojji ke hira bo lɔmma zuga yɛbhbhɛa Yesus.} Bhɛk rɛa nunu shɛɛ na tɛ hurr.

23 Na ga dhɔt ngaya mayɛ ma sɔngge. Na tɔrɛ bhɛa mayɛi chuttaya woynuny bhe chinyi na kɛyainy bhɛa ngakɛngga nun ilagasɛ jajaye.

24 Yɔk zug gena lɔga gɛ gɛrsa messɛa, kàgga tok chɔɔ hunde bhɛa kègedhdhɛa lɔgɔ ngani kagotoye. Na yɔk gena, lɔga gɛ gɛrsa kìmak dhul ko bhee ale kòrɛsɛn haalɛ. 25 Na ko yɔk lɔga challa, kàgga tok ngadamita. Na chɔɔ ko hunde kɔtɔlɔ gee tok ngakàggayo, bhee ale munnɛnɛ dhul ko kingi ninggɛ.