1Ti 6 | SuqSC | STEP | Na zuga yɛbhbhɛa Yesus ku gaymanya kumulɔng any kɛtɛngɛrɛ gulsachina gɛ goore, na aynde sara Tumu ko lɔga gɛnyɛ kàmadhinɛnɛa, zugo ke gɛrsi ngayogɛoye.

1 Timothy 6

1 Na zuga yɛbhbhɛa Yesus ku gaymanya kumulɔng any kɛtɛngɛrɛ gulsachina gɛ goore, na aynde sara Tumu ko lɔga gɛnyɛ kàmadhinɛnɛa, zugo ke gɛrsi ngayogɛoye. 2 Na gaymanyaye kachchɛ gulsachina yɛbhbhɛa Yesuse, ngakatamaya gulsachina gɛ ke bhɛa anɛa zuga yɛbhbhɛa Yesus kari. Yɔk chɔɔ maya mɛdhdhanɛ na kachchɛ gulsachina gɛ goore, na jorronɛ bhɛa bɔɔ kaynɛnɛa sabbɔ, ke ngaya anɛ zuga yɛbhbhɛa Yesus kari na ibhɛsɛnɛ chɔɔ hinisi na gulsachina gɛ ɛsɛdhɛ lɔga gɛ shɛɛye. Ngagiya a lɔkte maya madhɛsɛn zuga yɛbhbhɛa Yesus na iriyɛ gooreye.

Lɔga Maya Birinya Hinisi Ngakìbhɛsɛnao

3 Na hunde tɔlɔ hirre madhɛsɛn zugo lɔga ku butomo imaginɛna ko madhaa Komoruya Na Yesus Kirisosi ku dhere ko lɔga imaginɛna ko ga hinno :Tumuye, 4 nɔng ngahirronu dhɔng rɛ, na chɔɔ lɔkte ga :nɛa ninggɛ dhul. Na kali kali hin bhɛa senno kɛkkɛnyandɛy ko zugo lɔgɔ na kowoloktɛy. Yɔk lɔkte ku ngangaye, honynyɛ lɔga kɔ̀chɔlɔsɛa lɔgɔ na kàmarnɛnɛa kɛngɔ na kɔ̀dhɔmnɛnɛa, ko ga kùgunyɛa lɔga zugony ke gɛrsi na kàraginɛnɛa ko hinisi, 5 na tissɛ :zuga sabbi gɛrsa imaggɛa lɔga ku dhere, na yɔk ibhbhanɛ lɔga Tumu na bhɔdhdhɛ ke zinggoa jɔanɛa birinya.

6 Na nɔng agge hunde kème lɔga hinno :Tumu na hinisiya ga ɛllanɛ bayte, kàn zuga kɛ̀dhɛynɛna goore dhogoy, 7 ke ngaya huna bere kùhudhukkinyana, ahite dhɔnɛ ba ngani kòhoyɛyto, na chɔɔ hunde ale kɛ̀rɛsse ahite dhɔnɛ kɔ̀lɔgɔni ninggɛ dhulde. 8 Na mɛa chɔɔ hunde kɔ̀tɔlɔmɔ amissɛ ko ruminya, yɔk hinisiya ga ɛllanɛ bay na kɛ̀l ke na bo challa hung. 9 Yɔk zukte hinnɛ bhɛa senno keteyɛ zuga aha mɛraye, dokkonɛ lɔga gɛrsa illobbɛa zugo na kɔngngɛ :lɔkku. Na messɛ lɔga bo mɛra dallemo tissɛa zugo na ɛddɛnɛnɛa na garsɛa, 10 ke ngaya lɔga kuhuyamo kumulɔng shigininyanɛ bhɛa kìbhɛsɛna birinya hinisi na kèyelɛaye. Yɔk chɔɔ zug gena bɔɔ hinisi ujjonɛa goore na hinnɛa bhɛa senno keteyɛ zuga birinya mɛra, na koo dhɔtta bhɛa yɛbhɛa Yesus na uwassa rɛhi na chɔllayɛa goore dhogoy huna zuga kɔdhdhɛa rɛhi warachinne.

Lɔga Madhɛsɛna :Bhaulosi Timotiyos Na Yɛbhɛsɛna

11 Na mɛa inye ngahirra Tumuye, ngalɔkta ku ngangaye kumulɔng jar na tɛ rɛna. Na kɔbh lɔga ridhing ningginɛna ko ga hinno :Tumu, na yɛbh Kirisos, na ibhɛsɛ zugo hini, na nyim lɔgɔ na te hira hini bo. 12 Na mɛdha goore dhogoy huna bansanayny na yɛbh Tumu dhul ko kingi, na hini ngakedhdhi. Na tii ibh lɔga basseya iho dhul bere kèliyɛinyi kala bere dhugunnonɛi bhɛa anɛi hira yɛbhi Kirisos dhere na orrɛinyɛa :zuga bo mɛra. 13 Nɔng anye koyokkoginy ngalɔkta bhɛa kɛ̀lɛa ko Tumu, Komoruya ajjɛa zugo ko aha kumulɔng bassey, ko bhɛa kɛ̀lɛa ko Kirisos Yesus, hira bere dhugunɛsɛna Bhenti Bhilatos lɔga ku dhere, 14 na kɛnga rɛ bhɛa lɔga gɛrsa ko bhɛa lɔga ujjukkanɛinyɛa :zugu na bhɛk ngalɔkta bere kàmadhdhaginyde shɛɛ, ko bhee ale wokkonɛ :Komoruya Na Yesus Kirisosi. 15 Nɔng ngakoleonu ale wokkonɛ :Kirisosiye, anna ale ɛsɛdhdhana :Tumu Komoruya lɔmma zugo kumulɔng, ku Komoruya komortɛnuny ko gulsachinuny kumulɔng bu tuhinɛna iho dhɔnɛnɛ. 16 Nɔng dhɔnɛnɛ anna ngarɛssao dhul ko kingi na bhakka hɔldina bo hɔla chɔɔ hirre dhɔnɛ jaa ngakɔayo. Na chɔɔ hirre dhɔnɛ bere or nɔng oo ale ori, ninggɛ dhul. Na diram ko ɔnney any kete ga gɛnyɛ dhul ko kingi. Amen!

17 Na yogɛsɛ zukte aha mɛrte lɔgɔ na ngadhunggurrɛ na iddirnɛnɛ aha mɛrtin, ke ngaya ahaa kɔ̀lɔmma bay ngaya anɛ ga oddoniyɛa na garsɛa shaw hungge. Na yogɛsɛ na kiddirtɛy Tumu, Komoruya ɛdhdhɛttanniy lɔkke kumulɔng na ajjiy bhɛa hinisiya ga anɛa hɔli. 18 Na yogɛsɛ na kete zuga messɛa lɔga challa, na lɔmmɛa kɛngi chaldin na ɛanɛa zugo goore, na hinisi ujjonɛa na ajjinɛnɛa ko zugo aha. 19 Yɔk hunde messɛ ngangaye, shogisɛnɛ rɛhiya gɛ lɔga challa shigininyanɛa lɔga ale kɛ̀dhdhɛttanɛa yɔk ahaa bo dhandala bɛrgunyaye ale andanɛye, na jɔanɛ basseya ku dhere.

20 Na mɛa Timotiyose, ngalɔkta bere yɛbhbhaginy :Tumu na ajjiny na messe kumulɔng, bhɛk shɛɛ. Na bhɛa lɔga hologun ningginɛna imaginɛna ko ga Tumu ko bhɛa zukte marrɛ kamannaa Tumu na se kèe gaɛ bhoye, tɛ rɛna. 21 Yɔk chɔɔ zug gena bɔɔ yɛbhta ngalɔkta ngazukta se kèe gaɛ bhoye na koo dhɔtta bhɛa yɛbhɛa Tumu. Na any kɛdhdhɛttannung :Tumu.