2 John
1Ngadadabta kɔgɔdhan :anyo, hira bo kɔlɔmi zuga yɛbhbhɛa Yesus. Na kittonnoginy inye karbaya kibhbhaginyi hini dhere bere bɛrraninyi :Tumu ko erroa gunyu kibhɛsɛni hini. Nɔng igge hini anyo sɔng ngakibhbhagungo. Chɔɔ zuga gayɛa lɔga ku dhere kumulɔng ko yɔk ibhbhagungɛ hinisi, 2ke ngaya lɔga ku dhere ɛlɛ hinisiya ga toye na chɔɔ ale ngani ɛlɛ dhul ko kingiye. 3Na mɛa Baba Na Tumu ko Eriya Nɛnɛ Yesus Kirisos any kɛdhdhɛttandiy na kichirbhisiyey na kayiy zany na kàbhaga ba lɔga gɛnyɛ ku dhere shɛɛ na kìbhtɛ hinisi kɛngɔ. 4Nɔng anye huna bɔɔ kishigi lɔga erroa gunyu hunde gena se dha bɔɔ te zuga iriynɛna :lɔga ku dhere damiya lɔga bere ajjɛiy :Babaa Na Tumuye, bɔɔ kɛdɛli goore dhogoy. 5Na mɛa ngakarbayta nganda, yɔk ngalɔkta kɔgɔdhdhaginy :anyoye, ga ngani kàjjiy ngayo. Agga bere kàgaana :aggeu kingi bɛrgua bere ngani kɛ̀yɛbhbhanɛa Yesus. Na mɛa anye kɔtɔllɔhaginydɔ. Agge zuga kɛ̀yɛbhbha Yesus, ga kìbhtɛ hinisi kɛngɔ. 6Nɔng agge hunde kɛ̀bhɛk lɔga ajjiy :Tumu na kème kali kaliye, ngangaye kìbhɛsɛn Tumu hinisi dhere. Na mɛa igge ibhtɛ hinisi kɛngɔ kali kali damiya ngalɔkta bere ajjiy :Tumu na shikkano :iggeu bɛrgua bere ngani yɛbhbhanɛo Yesuse. 7Nɔng anye bhee koyokkogɛung ngalɔktaye, a ngaya zuga bo mɛra itabhbhɛa zugo dhaa bɔɔ banday bay ngayaye. Yɔk ngazuktonu bhɛa bere hudhukkinyanɛa :Yesus Kirisosi ke hiri ngayɛbhbhɛo. Nɔng hirre me ngangaye anna tabhbha zugo ku mirogiya Kirisosi. 8Na mɛa igge bhɛgɛ rɛhi na lɔga bere mesinɛnɛo na mɛdhdhanɛo kɔtɔlɔmɔ hologun na ale kɛdhdhɛttannung :Tumu goore. 9Yɔk zukte sɛchchɛ lɔga Yesusi na tɔrɛ ga sabbiya gɛ na lɔga bere madhinɛnɛa :nɛa ngamessɛo na mɛdhdhanɛoye kumulɔng, bhee ɛlɛ ko Tumu kari ke dhɔnɛ ninggɛ. Na yɔk gee ngani messɛ lɔga gɛnyɛ na mɛdhdhanɛye, ɛl ko Baba Na Tumu ko Eriya Nɛnɛ Yesus kari ke dhɔnɛ. 10Na hir kona hunde kun bhɛà nu na ngalɔkta bere madhinɛnɛ :Yesusiye ngamadhdhagungoye, igge ngalammano na issao. 11Nɔng inde lammanaye, dokkono kuhu na ko nɔng me ngadamitonu ngahirronuye. 12Nɔng anye lɔga keni kɔ̀gɔdhagungɔ ga bo mɛra ngani ɛllɛ. Na nɔng mɛa dadabɔ ▼▼dadabɔ Tuga Giriki se, “...mala bɛnnayny ko dadabɔ ngakɔgɔdhdhagungo.” Dha bere ngabɛrguonu zugo hunde kɔdhdhɛ lɔgɔye ibhbhanɛ rɔay na kɔdhdhanɛ mal na kɔdhdhɛ lɔgɔ dadabɔ oo aha genne.
ngakɔgɔdhdhagungo. Bhee ngakɔgɔdhdhagɛungoye, a ngaya kɔlɔmɛ lɔgɔ hinisɔ na keni kàssayɛung na kɛ̀mɛzziyɛ nigite na hinisiya ga keteyɛ hɔli gooreye. 13Na erroa ngonua bere bɛrrana :Tumu iho gɔrra sennaginyɛ, “Saro saro.”
Copyright information for
SuqSC