2Pe 1 | SuqSC | STEP | Ngadadabta kɔgɔdhan :anyo Simon Betirosi, hira kagayi Yesus Kirisos, bere bɛrrananyi :nɛa na ekonyi. Na kɔgɔdhdhagung igge, ngazukta bɔɔ ngani yɛbhbhano Yesus Kirisos damiya bere nayoye. Nɔng Yesus Kirisos Komoruya na Ibbayseiy agge, anna ridhing ningginɛna. Na aynde bere ajjɛiy bhɛa kɛ̀yɛbhɛa nɔngge.

2 Peter 1

1 Ngadadabta kɔgɔdhan :anyo Simon Betirosi, hira kagayi Yesus Kirisos, bere bɛrrananyi :nɛa na ekonyi.

Na kɔgɔdhdhagung igge, ngazukta bɔɔ ngani yɛbhbhano Yesus Kirisos damiya bere nayoye. Nɔng Yesus Kirisos Komoruya na Ibbayseiy agge, anna ridhing ningginɛna. Na aynde bere ajjɛiy bhɛa kɛ̀yɛbhɛa nɔngge.

2 Na mɛa any kɛdhɛttanung :Tumu goore dhogoy na tɔlɔmɔ zany na bhaga ba ke na bo challa ke ngaya gayɛo Tumu ko Komoruya Na Yesuse.

Lɔga Maya Kèmesso Hunde Kɛ̀yɛbh Tumuye

3 Nɔng barartina Tumu annaa bere ayiyɔ bhɛa kàbhagɛa ba shɛɛ na kèmesɛa lɔkte hinnogiy :nɛaye kumulɔng hunde kàn zuga kɛ̀yɛbhbha nɔngge. Nɔng bhee messogɛiy ngangaye, a ngaya kànɛ zuga kàggaa nɔng, hira bere bɛrraniy dirama nɛnɛ ko chaldina nɛnɛye. 4 Nɔng huna bere messogiy ngalɔkta, annaa bhiigagiyɔ lɔga kìbhɛsɛna hinisi bo challa dhandala lɔmɛa diram ale messogiy :nɛa. Ngalɔkta a gee kèe jɔyay bhɛa hinisa nɛnɛ ko na nu anɛa dhɔnɛ, na messɛo lɔgɔ kariye. Na jara ngagɛrɛsimoa bu lɔmmɛ :zugu bay ngaya kun bhɛa chirkannɛa lɔga ku kuhuye.

5 Na Tumu hunde a nganda bere messogungɔ ngalɔktaye, mɛa igge mɛdhta goore dhogoy, na ngaya yɛbhɛo Yesuse, illobo bhɛa tɔrɛo bhɛa anɛo zuga kɛngi challa. Na bhɛa anɛo zuga kɛngi challa, tɔrtɛ bhɛa gayɛo bho. 6 Na bhɛa anɛo zuga gao bho, tɔrtɛ bhɛa ojjɛsɛno rɛhi hirimo. Na bhɛa anɛo zuga ojjɛsɛno rɛhi hirimo, tɔrtɛ bhɛa nyimɛo lɔgɔ. Na bhɛa anɛo zuga nyimmo lɔgɔ, tɔrtɛ bhɛa messɛo lɔga hinno :Tumu dib. 7 Na bhɛa anɛo zuga messo lɔga hinno :Tumu dib, tɔrtɛ bhɛa lɔmnɛnɛo kɛngɔ huna zuga doraa dhɔnɛna. Na bhɛa anɛo zuga lɔmnɛno kɛngɔ, tɔrtɛ bhɛa ibhɛsɛno zugo hinisi.

8 Hunde messo ngalɔkta tii na lɔmmo hinisichinne na idhigisinɛye, bhɔdhungɛ na gao Komoruya Na Yesus Kirisos, na gɔngga ko zuga hologun ningginɛna ngaannoo. 9 Na nɔng hirre ngalɔkta ngamessoye, ngangaye a hira bho shɛɛ ngaorroo oo dhaa a hira kawarɛ chaga. Na chɔɔ lɔga gɛnyɛ gɛrsa hunde dha bere kòtonydo na mɛa i hurrte, dha bere dhinyɛsɛ sabba.

10 Na mɛa ngazukta kɛ̀yɛbh Yesus kariye, bhɛa kènno zugo kataktɛ bhɛa anɛo zuga bere eleongu :Tumu na bɛrranungu dhere, mɛdhta goore dhogoy na jarta bhɛa bere mɛdhdhanɛo sabbɔ. Hunde messo ngangaye, bhee dokkonɛo lɔkte illobbungɛ na dhɔyɛo lɔga Tumu, ninggɛ. 11 Na chɔɔ ale kàlammanung shɛɛ na kìgommogung bhɛa hɛyɛo gɔra Komoruya Na Yesus Kirisosi Ibbayseiy agge, lɔmɛa zugo dhul ko kingi na chɔɔ hirre kanyɛungu ninggɛ dhul.

Lɔga Bere Kɔdhdhɛsɛnɛa :Zuga Yogɛsɛnɛa Zugo Lɔga Dhugunono :Tumu Dadab

12 Na mɛa igge chɔɔ ko hunde te ngagiya bɔɔ takto ngalɔkta na iriytɛo lɔga ku dhereye, nɔng anye ngani kɛbhɛseung sabbi dirr na ɛsɛdhɛ lɔgaa gina. 13 Na chɔɔ wa kamarakka lɔgɔ, na hunde ngani kihi tunɔ bay ngayaye, bhɛa nanu chali hunde kɛbhɛseung sabbi jajaye. 14 Anye bhee kemesɛ ngangaye, a ngaya kaggaɛ lɔga bere yokkogonyi :Komoruya Na Yesus Kirisosi, se kèe ale kihɛi na kɔdhɔyɛi ngabaya na kɛrɛsɛi shawye. 15 Na a bhee kɛmɛdhdhanɛ goore na kamadhdhagɛung lɔgɔ na hunde ale kɛrɛsiye, kadhtay kali kaliye.

16 Nɔng agge bhee kòyokkogɛung lɔga ɔnneya Komoruya Na Yesus Kirisosi ko lɔga ale wokkonɛa :nɛaye, a ngaya bere korɛo dirama nɛnɛ kawarreye. Na ngalɔkta bhee anɛ ga magganɛa :zugu nganga hung ku butomoa dhagɛa :zugu kali ngayo. 17 Nɔng Baba Na Tumu Komoruya Bo Lɔmma Diram, huna bere dhɔnga Yesus na ajjɛa diram, bere yogɛsɛna lɔkte sennɛ, “Erite nan ajjany hini hɔldin, kibhɛsɛn hiniye a nganda.” ^a 18 Ngalɔkta a gee bere kishikkano chɔɔ :aggeu huna bere kòyogɛsɛna nɔng kala bere kɛlɛo kari kutula bararaye.

19 Na mɛa ko agge annaa bɔɔ kàtakta lɔga Kirisosi bere yokkonɛa :zuga yogɛsɛnɛa zugo lɔga dhugunono :Tumu hunde dhaa a dhereye na kɛ̀yɛbhta. Na mɛa ko igge ibhigi ngalɔkta tii ko bhee bho arsɛ na tobbeya bhelleyne ujjonɛ hinisiya gu toye. Hunde bhɛkko ngalɔkta tii huna goa lɔmma :hiriyɔ na terinyɛa bhɛa kɔrraye, messo shɛɛ. ^{▼▼Ngalɔkta sennɛ tobbeya bhelleyneye ɛlɛhɛnnɛ lɔga Yesus Kirisosi ale kunɛa na oono zugo hinisi na dhugunɛsɛna bhɛa lɔga Tumu anɛa dhere dib.} 20 Na yɔk bhɛa ngalɔkta kumulɔng, gee maya gao shɛɛ dhogoyte a ɛnɛnggeo, lɔga Tumu bere kɔdhdhɛsɛnɛa :zuga yogɛsɛnɛa zugo lɔga dhugunono :Tumu dadab kumulɔng, bhee ɛsɛdhɛ :zugu sabbiya gɛ na dhugunnonɛ ninggɛ. ^{▼▼. Ngalɔkta heo a bhɛa kènɛa, lɔga bere ɛsɛdhdhanɛa :yɔkku sabbiya gɛ ngayo.} 21 Yɔk ngalɔkta kumulɔng, ga ɛsɛdhdhanɛa zuga yogɛsɛna zugo lɔga dhugunono :Tumu sabbiya gɛ, na yokkonɛa ngayo. A lɔga ɛsɛdhdhana :Tumu na yokkonɛa hunde kɔsɛn :Kuloya Tumu na madhɛsɛnde.