2Pe 2 | SuqSC | STEP | Yɔk zuga ku butoga bhɔdhdhɛa lɔgɔ na yokkonɛa huna naa dhugunɛsɛna :Kuloya Tumu, bhɛa zuga Isirayeli bere kinginye, ko yɔk bere ɛlla. Na chɔɔ mɛa toye bhɛa nu, ko yɔk zuga ku butoga bhɔdhdhɛa lɔgɔ nganga, ale bansanɛ na madhɛsɛnɛ zugo lɔga ku butomo huna naa anna lɔga Tumu dhere na ujjukkɛ zugo. Na chɔɔ ale mallɛ Komoruya bere ibbayseo yɔk ku yekkuya lɔga gɛ gɛrsa. Na ngaya messɛ ngangaye, ale tisɛsɛnɛ rɛhiya gɛ lɔga igarisiyɛa :Tumu ke tiri nga hung.

2 Peter 2

Lɔga Zuga Ku Butoga Madhdhɛa Zugo Ko Lɔkte Ale Dokkonɛ :Yɔkkuye

1 Yɔk zuga ku butoga bhɔdhdhɛa lɔgɔ na yokkonɛa huna naa dhugunɛsɛna :Kuloya Tumu, bhɛa zuga Isirayeli bere kinginye, ko yɔk bere ɛlla. Na chɔɔ mɛa toye bhɛa nu, ko yɔk zuga ku butoga bhɔdhdhɛa lɔgɔ nganga, ale bansanɛ na madhɛsɛnɛ zugo lɔga ku butomo huna naa anna lɔga Tumu dhere na ujjukkɛ zugo. Na chɔɔ ale mallɛ Komoruya bere ibbayseo yɔk ku yekkuya lɔga gɛ gɛrsa. Na ngaya messɛ ngangaye, ale tisɛsɛnɛ rɛhiya gɛ lɔga igarisiyɛa :Tumu ke tiri nga hung. 2 Na chɔɔ zugo ga mɛra ale orronɛ ngalɔkta bu gɛrɛ ammɛiy :liya messɛ :ngazuktaye, na ko yɔk hɛ na messɛyɔ. Na hunde messɛ ngangaye, zugo ale orrɛ ngalɔkta na dhɔmmɛ lɔga ku dhere kàbhagɛa ba bere madhinɛnɛa :Yesusi. 3 Na ngazukta ku butoga bhɔdhdhɛ lɔgɔ na yokkonɛ huna naa yogɛsɛna :Kuloya Tumuye, yɔk chirkannɛ bhɛa senno kɔjɔyay birinya na ale madhdhagungɛ lɔga gɛ ku butomo na tiranyɛungɛyɔ. Na nɔng Tumu annaa bere ɛsɛdhdha lɔga ale ujjukkanɛa yɔk na attiyɛa. Na attiya nɛ chɔɔ bhee ihɛ dirr ninggɛ.

4 Anye bhee kesenɛ ngangaye a ore go, chɔɔ Tumu zuga tumony ekko :nɛa, huna bere messɛa lɔga gɛrsa, annaa ngani kichirbhisiwao. Na ibhbhana na ujjugɛsɛna bolkua bo hɔrra iho tirr toye. Na ko mɛa ngani ɛl ngonu ko bhee ale anɛ kala kedhdhɛa :nɛa lɔga gɛ na attɛɛ. 5 Na chɔɔ bɛrgua bere kinginye, huna bere zugo Tumu ngaɛngɛrsɛayo, nɔng Tumu annaa ngani kichirbhisiwao na koo kunɛa maa dhittɛa ba na hukkana ko aha rang. Na chirbhiseo Nɔa, hira bere madhɛsɛna zugo lɔga ridhing ningginɛna, ko zuga bere ku issabbay sɔng. 6 Na sɛgɛn nɔng annaa attiwa zuga bhakkɛa oriya kèe Sodom ko Gomora na dhitta gogiye na tewa buryoga, na lɔga gɛ karta :zukte messɛ lɔga gɛrsaye kumulɔng na katagatɔ hunde dhaa zuga Tumu ngaɛngɛrsɛayo kàtti ɛnɛngge. 7 Na nɔng huna ngaoriya ngani kidhitao, annaa ibbaysiwa Lot, ke ngaya anɛ hira ridhing ningginɛna taa orro lɔga bo gɛrsa messɛa :zugu ku lollumo na shurnɛnɛ na munyusɛ gooreye. 8 Nɔng ngahirra ridhing ninggɛye, huna bere bhakkɛa ko zugo, dha taa or lɔga gɛrsa messɛa :zugu na gena shikkana nyawa na hinisa nɛnɛ ɛsɛdh lɔgɔ na shurnɛ kali kali. 9 Yɔk ngalɔkta kumulɔng, dhugunnonɛ bhɛa Komoru Tumu gayɛa ganggua ibbaysiyɛa zuga yɛbhbhɛa nɔng dhere hunde dokkonɛ lɔga kìllobɛaye. Na chɔɔ zukte bhorɛɛ baye, gayɔ hunde atti ɛnɛng na oy ko bhee anɛ kala ale kedhdhɛa :nɛa lɔga zugony kumulɔngge. 10 Na yɔk zukte ale atti :nɛa goore dhogoyte, a zuga chirkannɛa lɔga gɛrsa ku lollumo na irranɛa Tumu na lɔga gɛnyɛ ngabhɛkkɛayo.

Yɔk ngazukta agga liya ngaamɛayo dhul bo dhunggurrɛa. Na chɔɔ bhɛa senno kɔdhɔmbɛ zuga ɛlla tumɔ lɔmmɛa buyn bho ngaɛngɛrsɛayo dhul. 11 Chɔɔ ga gɔnyigi zuga tumony ekko :Tumu. Yɔk bhɛa ngazukta, agga bo dhɔrɔgɔsa, na anna ɔnnɛ. Na ko hunde kete nganga, yɔk hunde yokkonɛ lɔga zuga ɛlla tumɔ lɔmmɛa buyn na ujjukkanɛ bhɛa Komoruyny Tumuye, ngadhɔmmɛo dhul. 12 Na yɔk ngazukta messɛ lɔga gɛrsaye, dhɔmmɛ chɔɔ lɔga ngani kataktao dhul. Yɔk hɛt ko kɛginyaa dusuny dha bere irrittinyana ke ga kènno kìbhigi na kìndigi hung, na lɔgɔ ngaɛsɛdhdhɛayo na messɛa lɔga hinnonɛa sabbiya gɛ sɔng, na ale ujjukkɛ rɛhi huna kɛginyany.

13 Na yɔk ale kàtti lɔga gɛrsa ke ngaya bere messɛ lɔga gɛrsaye. Yɔk hunde maynɛ na aminɛ ga bo dhuttiyɛa na messɛa lɔga gɛrsa kali kɛngɔye, se kako messɛ lɔga challa jɔanɛa hinisi hɔldin. Na chɔɔ hunde assanungɛ bhɛa aminɛnɛoye, mulnɛno kari ga bo hunde aminɛnaye messɛa lɔga ku ridhing, na dikkongɛ na ɛddɛungɛ na ajjungɛ liya. 14 Ngazukta kawara gɛ yɔk kali kali lamɛɛ lɔga lollumo, na bhee dhɔyɛ bhɛa messɛa lɔga gɛrsa ninggɛ dhul. Na tissɛ zukte Tumu goore ngayɛbhbhɛo lɔmmɛ hinisi rammande na ko yɔk kemesigi lɔga gɛrsa. Na a chɔrnɛ ke ngaya anɛ ghilɔnyaa dha bere chirkannanɛa lɔga gɛrsa kingiye. 15 Yɔk a zuga bere dhɔtta ganggua lɔga challa ɛlla dib, na kɔbhta ganggua eriya Beori kèleo Balam, yello birinyaa kuhuyamo na tanggilda. 16 Nɔng chɔɔ Balam ko hunde keme nganga, annaa Tumu messa hartey, galiya ngamɛzzeoyo na mɛzziwa huna hiriguny na madhdha Balam, hira yogɛsɛna zugo lɔga dhugunono :Tumu, na taganyɛa bhɛa senno ngakemesɛ lɔga dallemo.

17 Na ngazukta yɔk, hɛt ko ɛlɛna dha bere dhɔrɔgɔya ko idhdhaa ɛbbɛkka :ngɔya bo ɔnnɛna na holilɛa. Na nɔng Tumu annaa bere ojja mugura bo kɔrra tirr ale chibɛa yɔk, 18 ke ngaya lɔga yokkonɛa :yɔkku anɛ ga dhɔngɛa rɛhi, hologun ningginɛnaye. Na chɔɔ hunde zuga ɛddɛyɛa lɔgɔ gena dhɔttɛ lɔga ɛddɛyɛa na jorrɛye, yɔk ngazukta kɔnkɔnnɛ ngagiya jorrɛ lɔgɔye na dhɔlɛsɛnɛ lɔga lollumo chirkannɛa :zugu bay ngaya na tabhbhanɛyɔ. 19 Na chɔɔ hunde a ngagiya ngani a gaymanyaa lɔga gɛrsaye, bhiigɛsɛnɛ ngalalugɛya tɔlgɔnyde lɔga ale bhonsanɛa na ɛlɛa bhee hɔli. Na ngazukta yɔk a gaymanya, ke ngaya hiri hunde te hira mɔggɛa :lɔk genneye, anɛ gaymaya ngalɔktonu dhul ko kingiye. 20 Yɔk ngazukta, a zuga bere takta Komoruya na Yesus Kirisos Ibbayseiy agge, na jarta lɔga gɛrsa messɛa :zugu bay ngaya. Na yɔk mɛa hunde a ngagiya wa waktɛsɛa lɔga gɛrsa sɛgɛn na messaye, kalda lɔga kàttiyɛa yɔk dhandal na jorronɛ lɔga gɛ bere sabbune, anda kàttiyɛa bɛrgua bere Tumu ngani kɛyɛbhtɛayo. 21 Yɔk ko bhee bere gaɛ lɔga ganggua ridhing ningginɛna na koo dhɔyɛ lɔga kullɛna bere kòyogɛsɛna yɔk, na wogɛ bhɛa lɔga gɛrsa sɛgɛn, hunde bere sabbɔ lɔga ganggua ridhing ningginɛna ngagaɛ, anda a challi. 22 Na chɔɔ lɔga taa dhagɛa :zugu kali sennɛa, “Rɔsɔ wogɛsɛn hara gɛnyɛ,” ko ga sennɛa, “Hoy ko hunde kòtonydo shɛɛ, nɔng wogɛsɛn dhɔr sɛgɛn,” ɛlɛhɛnnɛ lɔga messɛa :ngazukta dhere. ^{▼▼Damiya zug gennuny hoy oo chɔwa iwoɛ hunaa kɛginyaa kìwoo. Na nɔng a galite yel dhɔr goore. Na chɔɔ hunde onynyonɛ shɛɛ na te ushaye, nɔng wogɛsɛn na dhak sɛgɛn.}