2Pe 3 | SuqSC | STEP | Ngazukta gany kibhbhagung hiniye, ngadadabta kɔgɔdhdhagung :anyoye, mɛa te jagarɛ kɛngi ramman. Na bhɛa anɛa ramman kɔgɔdhdhagung ke bhɛa keni kɛ̀bhɛsiyɛung sabbi na hinisiya gu kɛsɛdhɛ lɔga bere kàmadhdhagungu sabbɔ.

2 Peter 3

Lɔga Kala Ale Wokkonɛa :Komoruyɔ

1 Ngazukta gany kibhbhagung hiniye, ngadadabta kɔgɔdhdhagung :anyoye, mɛa te jagarɛ kɛngi ramman. Na bhɛa anɛa ramman kɔgɔdhdhagung ke bhɛa keni kɛ̀bhɛsiyɛung sabbi na hinisiya gu kɛsɛdhɛ lɔga bere kàmadhdhagungu sabbɔ. 2 Yɔk ngalɔkta keni kadhtaye, a lɔga bere yokkonɛa :zuga bere kɛ̀ɛngana na katagaya Tumu na koyoktɛsɛ zugo lɔga dhugunɛsɛna :nɛa. Na gena a lɔga Komoruya na Ibbayseiy agge bere kòyogɛsɛna zuga gu bere ekko :nɛa na koo madhdhagungɛa.

3 Na yɔk bhɛa ngalɔkta kumulɔng, gee keni taga shɛɛye a ɛnɛnggeo, bɛrgua ale wurtune zuga kɔbhbhɛa lɔga ku kuhu hinnonɛa sabbiya gɛ sɔng na bhassɛa lɔga Tumu, ale hony ga bo bhassɛa lɔga Tumu, 4 na sennɛa, “Na hira bere bhiikkagungu lɔgɔ na senno ale kuni, mɛa i ori? Nɔng chɔɔ kɔdhdhanɛ ihineya bere rɛsɛa :kokonginyaa gayo, na ko mɛa toye lɔk gena ngani kɛrtiyaayo dhul. Na chɔɔ lɔgɔ ale ɛl nganga dhul damiya bere ɛllanɛa bɛrgua bere ghendonɛa :Tumu aha kumulɔng.” 5 Na yɔk ngaya senɛ ngangaye, dhugunnono bhɛa malɛa bhɛa bere ghendonɛa :Tumu ngatumuya chakte lɔkke, ko lɔga bere ghendonɛa ba kumulɔng ma, na mɛa ba ihɛa ma kɛrghɛnɔ. 6 Na chɔɔ mallɛ bhɛa bere ngamaonu dhittɛa zuga bere ngabɛrguonu rang ko ahaa ɛlla ba kumulɔng. 7 Na damiya bere Tumu yokkonɛa lɔgɔ na ghendonɛa aha kumulɔng, annaa bere yogoa bhɛa ngatumuya chakte ko ba kumulɔng ale hukkanɛa gogiye rang. Nɔng kalde ale hukkanɛye, a kala kedhdhɛa :nɛa lɔga zugony kumulɔng, na iggarisiyɛa zuga Tumu ngaɛngɛrsɛayo.

8 Na mɛa ngazukta gany kibhbhagung hiniye, lɔkte muchug keni taga shɛɛ na ngadhinyakkungɛye a ɛnɛnggeo, bhɛa Tumu ungo dhɔnɛ a oynya 1,000 na oynya 1,000 a ungo dhɔnɛ. 9 Yɔk zug gena ɛsɛdhdhɛ lɔgɔ na se kee lɔga kìbhɛsɛna hinisi bere bhiikkagiy :Komoruyɔ, ale ɛl dirr na shaw ngaurruknyɛsɛnɛo. Na nɔng nganga ngayo. Nɔng Komoru bhɛa senno kurrugɛsɛ ngalɔkta gɛny bere bhiikkagiyte, dhul ngaiho. Nyim lɔga gu tɔllɔng ke bhɛa senno hirre dhɔnɛ ngakagarɛ. Nɔng se zugo kumulɔng kudhugundɛsɛ Tumu lɔga gɛ gɛrsa dib, na kujjugu na kawakta gɔra nɛnɛ.

10 Nɔng kala ale kunɛa :Komoruyɔ, ale kun huna ɔgɔrchagiyny dari. Na ngakaldonu rɛ, ale ngatumuya chakte, ngɔana na bo rɔkkana, na garasɔ. Na ahaa ɛlla tumɔ ale hukkana :go rang. Na ko yɔk ngaahaya ɛlla bay ngayaye kumulɔng, ale am go.

11 Na mɛa hunde aha kumulɔng a ngagiya dhaa ale kùhukkana ngangaye go, na igge maya anno zukte ku ɛnɛng? Igge maya kɛnginyano ke zuga kachcho Tumu na messo lɔga hinno :nɛa na bhɛkko shɛɛ, 12 na hunde ngani reo kala bere ojjono :Tumu kɔkte, messo lɔga ajjɛa nɔng bhɛa ngosumonɛa na kunɛa ke tiri. Nɔng ngakaldonu rɛ, ale ngatumuya chakte am go rang na garasɔ. Na ngaahaya ɛl tumɔye, am go kumulɔng na bhɔnɛyɔ. 13 Nɔng Tumu annaa bere bhiigagiyɔ lɔga ale ghendonɛa tumua ngani chaga ko ba, na kete bhɛa kèmesɛa lɔga ridhing ningginɛna sɔng. Na mɛa agge kìbhɛsɛn ngalɔktonu hinisi na kèreyɔ.

14 Na mɛa ngazukta gany kibhbhagung hiniye, igge hunde anno ngagiya ngani reo ngalɔkta kumulɔngge, mɛdhta na tɛldi hurr na te zuga messo lɔga ku dhere gayɛa :zugu kumulɔng, na bhaga ko nɔng ke na bo challa. 15 Na mɛa taga shɛɛ, nɔng Komoru bhee nyimɛ lɔga guye, a bhɛa senno bayɛ :iggeu. Chɔɔ Bhaulos, gochonga na kìbhɛsɛna hinisi, ko nɔng huna bere ajjɛa :Tumu bho gaana, annaa bere tɔgɔdhagungɔ ngalɔkta. 16 Na chɔɔ dadabinyaa gɛnyɛ bere kɔdhdhana :nɛa kumulɔng, bere lɔgɔ kɔdhdhɛsɛna ngadamita. Na bhɛa ngalɔktonu, lɔga hunde kòtoyeoye ke bhaseni shaw ngakàgaayo ɛllɛ. Yɔk zuga lɔga Tumu shɛɛ ngani kataktao ko ga dhaginɛna ko hinisi, ibhbhanɛ ngalɔkta na sɛchchɛ damiya taa sɛyɛa lɔga Tumu gena na madhɛsɛnɛ zugo lɔga hologun ngani kataktao. Na ale tisɛsɛnɛ rɛhiya gɛ lɔgɔ.

17 Na mɛa ngazukta gany kibhbhagung hiniye, nɔng igge hunde ale ngalɔkta urruknyɛsɛnɛye, gaoyɔ. Na mɛa mɛdhta na tɛldi tunɔ, na aynde lɔga ɛddɛanɛa :zugu imaginɛna ko lɔga Tumu, ngaghurtongɛo na dhɔttoo lɔga dhandala bere yɛbhbhanɛo Tumuye. 18 Na igge mɛdhta na iriytɛ lɔga bere ɛdhɛttanɛiy :Komoruya na Ibbayseiy agge Yesus Kirisosi, ko lɔga gayɛo nɔng.

Na mɛa diram any kete na nɛnɛ, na kɔtɔlɔ dhul ko kingi, Amen.