2Th 1 | SuqSC | STEP | Ngadadabta kɔ̀gɔdhdhagung :aggeu, Bhaulosi ko Silasi ko Timotiyosi. Na kìttonnogung igge, zuga bhakko Tɛsɛlongke yɛbhbho Baba na Tumu ko Komoru Yesus Kirisos.

2 Thessalonians 1

1 Ngadadabta kɔ̀gɔdhdhagung :aggeu, Bhaulosi ko Silasi ko Timotiyosi.

Na kìttonnogung igge, zuga bhakko Tɛsɛlongke yɛbhbho Baba na Tumu ko Komoru Yesus Kirisos.

2 Baba Tumu na ko Komoru Yesus Kirisos any kichirbhiseong na bhaga ba ke na bo challa.

Lɔga Bhaulos Ko Silasi Ko Timotiyos Ogolɛsɛnɛa Zuga Tɛsɛlongke Tumu Na Eterrisanɛa

3 Gochonginyaye! Agge maya keterrisanno Tumu tii tii ke ngaya yɛbhɛo Yesus na yelnɛnɛo kɛngɔ goore na chɔɔ mɛdhdhanɛo na jorronɛo lɔga bere messo sabbɔye. Na nɔng hunde keterrisanno Tumu ngalɔktaye, a challi. 4 Na ngaya messɛo ngangaye, agge kɛdɛllo goore na chɔɔ koyogɛsɛno zuga yɛbhbhɛa Yesus ɛlla ba konnɔ ke ngaya dokkonɛo lɔgɔ na chɔllanɛnɛo goore na ngani nyimɛo na yɛbhɛo lɔga Yesusi na mɛdhdhanɛoye.

5 Ngalɔkta chɔllanɛnɛoye kumulɔng dhɔllanɛ lɔga kedhdho :Tumu hunde ɛl dibte. Na ale orrung :Tumu ke zuga challa na lɔmmung bhɛa nɛnɛ shɛɛ ke ngaya chɔllanɛnɛo lɔga gɛnyɛye. 6 Nɔng Tumu anna kedhdho lɔgɔ shɛɛ. Na ngazukta honynyɛ lɔgɔ bhɛa nu na chɔllanɛnɛoye, yɔk ale atti :nɛa 7 na ajjung bhɛa hɔngɛo. Na chɔɔ ko agge ale kɔhɔngngoyɔ. Yɔk ngalɔkta ale bhugnyɛsɛnɛ kolee ale Komoru Yesus dhɔllanɛ rɛ talanga bu walda tumɔ hunde ɛl ko zuga gɛnyɛ ekko bo lɔmmɛa gidhdhingge. 8 Na ngakaldonu Komoruya na Yesus ale atti zukte marrɛ kamannaa nɛnɛ challa na imaggɛ Tumuye. 9 Na yɔk ale kàganyɛ bhɛa Komoruyny ko bhɛa ɔnneya nɛnɛ lɔmma diram na katti chɔllaa iho dhul ko kingi ngagarsao. 10 Yɔk ngalɔkta ale bhugnyɛsɛnɛ kolea ale lɔmɛa :Komoruyɔ diram bhɛa zuga gɛnyɛ ridhing ningginɛna. Na ngakoleonu zuga bere yɛbhbhɛa nɔng kumulɔng ale iwachiyɛ nɔng. Na ko igge ale ɛllo ko yɔk kari ke ngaya bere yɛbhɛo lɔga kòyokkogungu :aggeuye.

11 Na agge hunde kɛsɛdhdho ngalɔktaye, kali kali kògollogung Komoruya na Tumu na kɔgɔnynyung huna zuga challa messo lɔga gɛnyɛ na kubhugɛsɛ lɔkte chal senno mesigite gidhdhinga nɛnɛ ko gee chal messo ke ngaya yɛbhɛo nɔngge. 12 Na kògollogung Tumu na sara Komoruya na Yesusi kete ga bo lɔmmɛa diram bhɛa nu na ko igge tɔlɔmɔ diram bhɛa nɛnɛ ngadamita chirbhisiyɛung :Tumu ko Komoruyɔ Yesus Kirisosiye.