2Th 2 | SuqSC | STEP | Gochonginyaye, yɔk ngalɔkta ale wokkonɛ :Komoruya na Yesus Kirisosiye ko ga ale kùmukinynyanɛa bhɛa nɛnɛ, agge kɔ̀tɔllɔhagung na kèsennagung ɛnɛnggeo,

2 Thessalonians 2

Lɔga Hira Marra Tumu

1 Gochonginyaye, yɔk ngalɔkta ale wokkonɛ :Komoruya na Yesus Kirisosiye ko ga ale kùmukinynyanɛa bhɛa nɛnɛ, agge kɔ̀tɔllɔhagung na kèsennagung ɛnɛnggeo, 2 hunde zug gena bansanɛ na sennagungɛ, “Komoru Yesus dha bɔɔ wagaye,” igge ngadɛɛsso. Na chɔɔ ko hunde kɛtɛytiy agge na keseagung se bare dhugunnogiy :Kuloya Tumu na kòyoktɛsɛo zugo, oo se shikkanɛ bhɛa nayo, oo se bɔɔ kɔgɔdhdhɛsɛno dadabɔye, igge ko hinisi ngadhaginɛno na jajageo. 3 Alala! Na ngakitabhtung :zugu lɔk genne. Nɔng ngakoleonu hunde ngani kubhugnyɛsɛoye, ale zuga bo mɛra dhɔttɛ Tumu na Hira Marra Tumu ko damiya nɛnɛ dhuguninya na kàgayɔ. Nɔng ngahirronu ale iggarisi :Tumu, 4 Nɔng ale mar Tumu ko ahaa ibhbhɛa :zugu ke barari kumulɔng na dhɔng rɛ na toynɛ huna hira barara. Na chɔɔ kɔ doraa Tumu barara na i bay na se, “Tumu kani :anyo!”

5 Yɔk ngalɔkta annaa bere koyogogungɔ kala kɛ̀lɛa ko igge kari. Na ngangaye, ngakadhdhanoo? 6 Yɔk lɔkte kanyɛ ngahirra na mɛa zugo ngagaɛ na ale kataga kolea sennanɛa :Tumuye, igge gaoyɔ. 7 Chɔɔ mɛa toye Moldoy a nganda itabh zugo dari na zugo katamara Tumuye. Na nɔng hira lamma ngalɔkta ihe. Nɔng ngahirra mɛa lam ngalɔkta me :Moldoyɔye ale ngani lam ko bhee senɛsɛn :Tumu, “Mɛa ngalammi!” na oddonɛ. 8 Na hunde kɔttaye, Hira Marra Tumu dhuguninya na kàgayɔ. Na Komoru Yesus ale wokkono ke na bo lɔmmana dirama bo walda na am Ngahirronu Mar Tumuye na hɔngɛsɛn na iggarisiyɔ. 9 Nɔng ngahirronu hunde dhuguniya na taga :zuguye, ale me lɔga bo mɛra barara ku butomo ajjɛa :Moldoyɔ na iwachiyɛa :zugu. 10 Na tabhɛsɛn ngazukta ujjukkɛ rɛhiya gɛ bere marrɛ lɔga Yesusi ku dhere senno kibbaysiɛ :Tumuye, lɔginyaa bo mɛra gɛrsa. 11 Na ngazuktonu hunde messɛ ngangaye, ale litanɛ :Tumu lɔgɔ na yɛbhbhɛ ngalɔkta ku butomo yok :Hira Marra Tumuye, 12 na aynde Tumu kedhdhɛ lɔga ngazuktonu bu dɛllɛ lɔga gɛrsa na ga ku dhere ngayɛbhɛoye kumulɔng na attiɛye.

Lɔga Kìriynɛnɛa Na Kànɛa Dhandali

13 Ngagochonginyaa yellung :Komoruyɔye, agge maya keterrisanno Tumu tii tii ke ngaya bere bɛrranɛung :nɛa sabbɔ na ibbaysiyɛung Kuloya nɛnɛ bere onyonɛungu ridhing ko ngaya yɛbhɛo lɔga Yesusi ku dhereye. 14 Nɔng igge annaa bere eleongu :Tumu kamannaa challa bere kàmadhdhagungu :aggeu na ko igge tɔlɔmɔ dirama Komoru Yesus Kirisosi hunde nɛnde. 15 Na mɛa gochonginyaye, te dhandali. Na lɔga Yesusi bere kishikkano na kàmadhdhagungu tugɔ ko dadabɔ, bhɛgɛ goore. 16 Nɔng Komoruya na Yesus Kirisos sabbaa nɛnɛ ko Baba Tumu na bere yelliy na chirbhisiey na irishshey kali kali na kɛ̀yɛbhɛ lɔga ale kɔ̀jɔanɛa basseya iho dhul ko kingi, 17 any kilalung hinisi na kiriyong na mesigi lɔga challa na yoktɛsɛ zugo.