2Th 3 | SuqSC | STEP | Mɛa gochonginyaye, lɔkte kennɛnɛ ba na kenno kòyoktogungge a ɛnɛnggeo, ogoldogiy Tumu na kàmadhtɛsɛo zugo lɔga Komoru Yesusi na kɛtɛhɛtɛy ko ba ke tiri na kɔtɔlɔmɔ diram bhɛa zugony na kɛbhɛgɛ :zugu damiya bere bhɛgɛo :iggeu.

2 Thessalonians 3

Lɔga Ghinɛa :Bhaulosi Zugo Na Kogoldɛsɛ Tumu

1 Mɛa gochonginyaye, lɔkte kennɛnɛ ba na kenno kòyoktogungge a ɛnɛnggeo, ogoldogiy Tumu na kàmadhtɛsɛo zugo lɔga Komoru Yesusi na kɛtɛhɛtɛy ko ba ke tiri na kɔtɔlɔmɔ diram bhɛa zugony na kɛbhɛgɛ :zugu damiya bere bhɛgɛo :iggeu. 2 Yɔk zuga shikkɛa ngalɔkta, bhoy ngayɛbhbhɛo. Na ogoldogiy Tumu na kibbayseiy bhɛa zuga messɛa lɔga gɛrsa ko bhɛa kuhuyakuny. 3 Nɔng Komoru Yesus anna kɛ̀yɛbhbha dhere. Na ale irishshong na bhɛkkung na Moldoy ngaidharrungo. 4 Na lɔga bere kàjjungu na ko mɛa toye ngani messo, agge kɛyɛbhbho Tumu na ale ɛanung na bhugɛsɛnoyɔ. 5 Na Komoru Yesus any kaung bhɛa nyimɛo lɔgɔ huna bere nɛnɛ, na kɔdhɔlagung bhɛa yellɛungu :Tumu.

Lɔga Kìbbayɛa Gɔngga

6 Gochonginyaye, mɛa kajjung lɔgɔ sara Komoru Yesus Kirisosi na kesennagung ɛnɛnggeo, hirre yɛbh lɔga Yesusi na a gɔnggay na lɔga bere kàmadhdhagungu :aggeu ngamessoye, igge bhɛa nɛnɛ kɛngga rɛhi na tɛldi bhichang. 7 Yɔk lɔga bere kemesso :aggeu hunde maya kɔbhbho ɛnɛngge, igge gaoyɔ. Agge huna bere kɛ̀lla ko igge kari, bere gɔngga ngakannoo. 8 Na chɔɔ amissɛa hir konnuny hɔlɔng hung ngani kùssoyo. Nɔng agge annaa kɛmɛdhdhano na kemesinɛno bar ko kali na kaargareo ke ngaya kenno ngakàmargiyɛung na kɔ̀ttagɛung lɔgɔye. 9 Na nɔng hunde bere kɛ̀tɛhɛndo, anda bere kighindong ahaye kihinnoye na ayiy. Nɔng nganga ngani kèmessoyo ke ngaya kenno artɛiy agge na ale kɔbhɔ lɔga kemesso :aggeuye. 10 Chɔɔ kolea bere kɛ̀lɛa kari, annaa kàjjungu lɔgɔ na kèsennagungu, “Inde mar zinggoye maya amissɛ ngaammo.”

11 Nɔng bhee koyokkogɛung ngalɔktaye, a ngaya kishigɛo lɔkte sennɛ bhɛa nu zug gena se a gɔnggaye. Yɔk zinggo ngamessɛo na margɛɛ lalugɛ na woɛ lɔgɔ gɔrɔ hung. 12 Yɔk zukte messɛ ngangaye kɔtɔllɔhɛsɛno sara Komoru Yesus Kirisosi na kesenɛsɛno ɛnɛnggeo, “Tɛldi hung! Wakta na mesigi zinggo na usigi amissɛa messono hung.” 13 Gochonginyaye, yɔk ngalɔkta bu chal messoye, ngakargarisɛno. Mesigi goore!

14 Na hunde lɔ hirre mar ngalɔkta kàmadhdhagung :aggeu ngadadabtaye, maraga na taga shɛɛ! Na ko nɔng kari ngaɛllo na aynde ale amɛ :liya na ungusɛɛn lɔga ɛddɛaye. 15 Nɔng huna miroginy ngagunyo. Ibbaya huna gochonga nu.

Lɔga Issayɛa :Bhaulosi Zugo Na Kennɛnɛa Ba

16 Komoruya yakkana ba chaldin sabbaa nɛnɛ, tɛldi ko igge kari kumulɔng kali kali. Na any kutuhong na kaung bhɛa bhagɛo ba ko bhɛa messɛo lɔgɔ kumulɔng ke na bo challa. 17 Na ngalɔkta kɔ̀gɔdhdhagung na kissayɛungge agga kɔgɔdhdhi :anyo Bhaulosi siya nanu. Na damiya nanu kɔgɔdhdhɛi dadabinyaa ganyu kumulɔng a nganga. 18 Komoruya na Yesus Kirisos any kichirbhiseong igge kumulɔng.