2Ti 2 | SuqSC | STEP | Na mɛa eriya nanuye, inye iriyɛy ngaya ɛdhdhɛttanɛiny :Kirisos Yesusiye na te dhandali.

2 Timothy 2

1 Na mɛa eriya nanuye, inye iriyɛy ngaya ɛdhdhɛttanɛiny :Kirisos Yesusiye na te dhandali. 2 Na lɔga bere shikkani bhɛa nanu huna bere kamadhɛsɛni zugo ga mɛra, ko inye madhɛsɛ gee yɛbhi anda gaɛ bhɛa madhɛa zugoye. 3 Na tɛhɛyɛ ko bholisiya bassa mɛnyɛsɛna lɔga Kirisos Yesusi. Na tɔriy agge na kɔ̀chɔllayɛi lɔkte kòdokkonoye kari. 4 Nɔng bholisi, lɔga zinggoa gɛnyɛ ngaannao ngamesso. Mɛdhdhana na me zinggoa gɛnyɛ goore na gulsaa nɛnɛ hini kete hɔli. 5 Na ko nɔng hira rɔginɛna ko zugo, hunde damiya rɔginɛnɛa :zugu shɛɛ ngabhɛkkoye, bhee rɔgɛ lalugɛ na kɛ̀dhdhɛttanɛ, ninggɛ. ^{▼▼Ngalɔkta hɛt ko bhɛa kènɛa, “Na ko nɔng hira rɔginɛna ko zugo saginɛgiye, hunde damiya saginɛ shɛɛ ngabhɛkkoye, bhee dhakkanɛ bolisay na kùlubɛ ninggɛ.”} 6 Nɔng hira ku kadhinyogiya kɔhany, bhɛa zuga hɛyɛa liwaa kùsuneono na ammɛa, maya aynde kɔɛ sabbɔye. 7 Na ngalɔkta koyokkoginyde tungɛsɛ haalɛ! Hunde mesi ngangaye, aynde ale ajjiny :Komoruyɔ bhɛa gayɛi hologuna ngalɔkta kumulɔngge.

8 Na tungɛsɛ lɔga Yesus Kirisosi, hira bere bansana rɛsɛyɔ ku ashaya Dawiy, na ɛsɛdh kali kali. Nganda a kamannaye chal kamadhɛsɛn :anyo zugo, 9 na kɔ̀chɔllayɛany na kìchibbɛany gɔrgɔriyaye huna hira kɛddɛi lɔgɔye. Na yɔk lɔga Tumu, bhee kìchibɛ gɔrgɔriyaye ninggɛ. 10 Na mɛa anye kujjɛsɛn hini bɛ na kinyimi lɔkte chɔllaunyde kumulɔng na zuga bere bɛrrana :Tumu ko yɔk kaynɛ :Kirisos Yesusi bassey ko bhɛa lɔmɛa dirama iho dhul ko kingi.

11 Yɔk lɔkte maya yɛbhbhɛ :zugu keni kòyogoginyde a ɛnɛnggeo,
“Agge hunde bere kèrgi ko nɔng kariye,
ale kɛ̀l ko nɔng kari basseyɔ,
12 na hunde kùjjɛsɛn hinisi bɛna na kìnyim lɔga chɔllaunyde,
ale kɛ̀l ko nɔng kari na kɔ̀lɔ zugo.
Na nɔng hunde kìtimaga nɔngge,
ko nɔng ale imaggiy sɛgɛn.
13 Na chɔɔ agge ko hunde nɔng ngakɛ̀yɛbhi,
nɔng kali kali i ke na kìbhɛsɛna hinisi na kɛ̀yɛbhbha,
ke ngaya bhee kɛnganɛ rɛa nɛnɛ na imagɛ ningginɛnɛye.”

Lɔga Hinno :Tumu Maya Messɛa :Zuga Kachchɛa Nɔng

14 Na inye yogɛsɛ zuga yɛbhbhɛa Yesus ngalɔkta tii na bhɛsi sabbi na ibbay sara Tumu na lɔga chicho chicho kɛngɔ ngaɛkkɛnyannɛnɛ. Bhee maya ngaɛkkɛnyanɛnɛoye, a ngaya ngalɔkta anɛ ga hologun ningginɛna dhul bhassayɛa chɔɔ zuga shikkɛaye. 15 Na lɔkte mesiye kumulɔng mɛnyɛsɛ goore dhogoy na kɔgɔnyɛiny :Tumu ke hira ku kadhinyogiya bassa liya ngaamɛayo madhɛsɛna zugo lɔga ku dhere dib. 16 Na bhɛa lɔga hologun ningginɛna imaginɛna ko lɔga Tumu, kɛnga rɛ na tɛ rɛna, ke ngaya zukte hinnɛ lɔkte ku ngangaye anɛ ga dhɔttɛa lɔga Tumu halɛ halɛ na hɛa na ɛddɛnɛnaye. 17 Yɔk lɔga madhinɛnɛa :yɔkku ale bhassanyɛsɛnɛ ba na ɛddɛɛ zugo huna karchaa amma hiri na chɔllaa. Na chɔɔ zuga madhdhɛa zugo lɔga ku nganga, kona a Hemenes ko Bhilitos rɛ. 18 Yɔk ngazukta bere dhɔtta kamannaa ku dhere na se kèe lɔga ale bansanɛa :zugu rɛsɛyɔ dha bere bhugnyɛsɛnɛ kingi. Na madhɛsɛnɛ zuga yɛbhbhɛa Yesus gena ngalɔkta na tissɛ na zugo dhɔttɛ bhɛa yɛbhɛa Kirisos. 19 Na nɔng ko hunde lɔgɔ kete nganga, yɔk zuga yɛbhbhɛa Tumu dhere iriy :nɛa na dhandal na hɛt ko bɛa bo dhandala immo :Tumu gig. Na ngabɛtonu lɔ lɔga kɔdhdhɛsɛna :Tumu sennɛa, “Nɔng Komoru zuga gɛnyɛ gayɔ,” ko ga sennɛa “Gee elɛɛ sara Komoruynyde kumulɔng, maya kɛnganɛ rɛhi bhɛa lɔga ku kuhu na ɛl rɛna.”

20 Yɔk ahaa ɛlla doraa bo gore toye, ga kèghendono worginyaye ko tomoga hɔla gaw dhandala sɔng ngayo. Gena a ahaa kàbhachchana kɛnɛ, gena agga kèghendono digirɔ. Na ngaahaya gena agga kèmesɛa lɔga bo dhandala, gena agga lɔga dhandala ngakèmesɛayo. 21 Na nɔng hirre onynyono ridhinga nɛnɛ na i hurrte, ale kòy ke hira bassa messo lɔga dhandala hunde ngaahaya kèmesɛ lɔga dhandalaye na kɛ̀ɛngana ke hira ridhing ningginɛna. Na a hira bassa messo lɔga hinno :Komoruya nɛnɛ. Na bhɛa kènno kèmesɛ lɔga challa kumulɔng i kɔk.

22 Na lɔkte chirkannɛ :zuga ngani dhakkanɛa ngochinde, jar na ngamesi. Na mɛdhta ko zukte hinisiya gɛ ɛl hurr kɔdhdhɛsɛnɛ Komoru kɔmmaye, na kɔbhɔ lɔga ridhing ningginɛna ko ga kɛ̀yɛbhɛa Tumu ko ga kìbhɛsɛna zugo hinisi ko ga ba chaldinuny. 23 Na bhɛa lɔga dallenyany hologun ningginɛna ɛkkɛnyannɛnɛa :zugu, kɛnga rɛ na tɛ rɛna, ke ngaya ngalɔkta hunde agga tissɛa zugo na honynyɛa ɛkkɛnyande, inye gaɛye. 24 Na hira kachcha Komoru, nɔng sɛɛ ko zugo ngaɛkkɛnyannɛ. Na kete hira kɛngɔ challa abhanyiseo zugo kumulɔng, na gaa bhɛa madhɛa zugo lɔgɔ na hini anna bu. 25 Na sɛɛ kiyaga hinisiya zukte marrɛ nɔngge, na aynde kesea ale yɔk wokkonɛ gɔra Tumu na lɔga gɛ gɛrsa kùjjuk na gaɛ lɔga ku dhere, 26 na ungusɛsɛnɛ lɔgɔ shɛɛ na bassɛ bhɛa lɔga bere kɔngɛa :Moldoyɔ na chibɛa na mesɛa lɔga hinno :nɛaye.