2Ti 3 | SuqSC | STEP | Mɛa ga shik shɛɛ! Kolea ale uturronɛa ba, chɔlla ale bu goore dhogoy.

2 Timothy 3

Lɔga Kolea Ale Uturinyanɛa Ba Dhɔyɛa :Zugu Tumu

1 Mɛa ga shik shɛɛ! Kolea ale uturronɛa ba, chɔlla ale bu goore dhogoy. 2 Na zugo ale agga hinisi ibhɛsɛnɛa rɛhiya gɛ, na yellɛa birinya na dhɔngngɛa rɛhi, na dhunggurrɛa na dhɔkɔssɛa lalugɛ, na choyinggɛ ko jugɛ ngashikkɛayo na zuga mesɛsɛnɛa lɔga challa ngabudhdhɛayo, na messɛa lɔga ku ridhing, 3 na zugo hinisi ngaibhɛsɛnɛayo, na lɔga ɛddɛa :zugu ngaujjukkɛayo, na kedhdhɛa zugo, na rɛhiya gɛ ngabhɛkkɛayo, na agga kɛngi gɛrsa lɔga challa ngahinnɛayo, 4 na kɔdhdhɛsɛnɛa zugo mirɔga, na ngosumɛsɛnɛa lɔgɔ, na dhɔngngɛa rɛhi lɔga chɔɔ ngani kataktao. Na bhɛa kènno kibhtɛsɛ Tumu hinisi, yɔk goore ale hinisi ibhɛsɛnɛ lɔga dɛllɛa hinisiya gɛ, 5 na magganɛ lɔgɔ huna zuga kɔbhbhɛa Tumu dhere. Na nɔng barartina kɔ̀jɔana hunde kɔ̀ɔbh lɔga gɛnyɛye, marrɛyɔ. Na bhɛa zukte ku ngangaye, inye kɛnga rɛ na tɛ rɛna.

6 Yɔk ngazukta agga tabhɛsɛnɛa zugo lɔgɔ na hɛa doriyoa zugony na tabhbhɛa tɛrroa tɔlgɔnya messɛa lɔga gɛrsa na margiyɛa :lɔga bo mɛra ku kuhu hinnonɛa :sabbiya gɛ na chɔllanɛnɛa. 7 Yɔk tɛrroye ku ngangaye, tii tii ɛdhɛmisinɛyɔ. Na yɔk bhee se kataktɛ lɔga ku dhere dib, ninggɛ. 8 Na zukte madhɛsɛnɛ zugo lɔga ku butomoye, yɔk marrɛ lɔga ku dhere damiya bere marɛa :Yanesi ko :Yambɛri lɔga Muse. Na sabbiya gɛ a dhittinɛ na ɛsɛdhdhɛ kuhuyamo na bhɛa lɔga kɛ̀yɛbhɛa Yesus yɔk agga hologun ningginɛna. ^a 9 Na yɔk chɔɔ ko hunde kemesigi nganga, ngalɔkta gɛ tabhɛ zugoye bhee ɛlɛ dhul ninggɛ, ke ngaya dallemoa nɛ ale dhuguninyanɛ bhɛa sɛrɔ ɔdhdha damiya lɔga bere Yanesi ko Yambɛriye.

Lɔga Madhɛsɛna :Bhaulosi Timotiyos Na Yɛbhɛsɛna

10 Na nɔng inye lɔga kamadhinɛnɛi :anyo ko bhɛa kabhagɛi ba, ko lɔga keni kèmesso, ko ga kɛyɛbhɛi Tumu, ko bhɛa kugguyɛi lɔgɔ, ko bhɛa kibhɛsɛni zugo hini, ko bhɛa kinyimɛi lɔgɔ, 11 ko lɔga bere kàhangɛanyi na kɔchɔllanɛnɛi, hunde a ɛnɛngge, kumulɔng gayɔ. Na chɔɔ lɔga bere kodokkoni Ansokiyagiye ko Ikoniyomɔ ko Litiragiye na hangɛanyɛa :zugu na kɔchɔllanɛnɛi goore dhogoy na kinyimɛi lɔgɔ, inye gayɔ. Na chɔɔ ko hunde kete nganga, nɔng Komoru annaa bere ibbayseonyɔ bhɛa ngalɔkta kumulɔng. 12 Yɔk chɔɔ zukte yɛbhbhɛ Kirisos Yesus na hinnɛ bhɛa senno kemesɛ lɔga hinno :Tumuye kumulɔng, ale kàhanggɔ. 13 Na yɔk zuga ku kuhuyaga ko ga ku butoga, ale ngani tabhbhɛ zugo na ko yɔk tabhbhɛ :zug genne na idhigisisɛnɛ rɛhi kuhuyamo na hɛ na gɛrɛ goore dhogoy. 14 Na nɔng inye kɔbh lɔga bere kàmadhdhaginyi na gayi dib, ke ngaya gaɛ zuga bere madhdhaginyɛa lɔgɔ shɛɛ, 15 na kɔdhdhanɛ ihineya bere ngani anɛi chinyi ko mɛa toye, gaɛ Lɔga Tumu Barara bere kɔ̀gɔdhdhɛsɛna dadabinyaa dhugunnoginyɛa bhɛa gayɛi lɔga hunde yɛbhi Kirisos Yesuse, ibbaysiyɛinyi :Tumuye. 16 Yɔk Lɔga Tumu ɛlla dadabinyaa gɛnyɛ kumulɔng, agga bhonsanɛa tuga nɛnɛ na ɛaniyɛa na kàmadhtɛ zugo, na kòwoloktɛ gee ɛddɛɛ lɔgɔye, na kàlambay, na kàmadhtɛsɛ na kabhaktɛ ba ke zuga ridhing ningginɛna, 17 na zuga kachchɛa Tumu kɛtɛldi kɔk na kɛtɛhɛnɛ bhɛa mesɛa lɔga challa kumulɔng.