2Ti 4 | SuqSC | STEP | Na mɛa lɔkte kɔdhɔttaginy bhɛa kɛ̀lɛa ko Tumu ko Yesus Kirisos, hira ale kedhdho lɔga zuga ngani ɛlla basseyɔ ko ga zuga bere rɛssɛa, na lɔmma zugo hunde ale wokkonoye a ɛnɛnggeo,

2 Timothy 4

1 Na mɛa lɔkte kɔdhɔttaginy bhɛa kɛ̀lɛa ko Tumu ko Yesus Kirisos, ^{▼▼Tuga Giriki se “...:Kirisos Yesusi...”} hira ale kedhdho lɔga zuga ngani ɛlla basseyɔ ko ga zuga bere rɛssɛa, na lɔmma zugo hunde ale wokkonoye a ɛnɛnggeo, 2 Madh zugo lɔga Tumu. Na chɔɔ ko hunde lɔgɔ kete dhandali oo ngaani, inye mɛdha tii na tɛ kɔk. Na oy hini ke bu dhogoy na zukte ɛddɛɛye, lɔgɔ madhɛsɛ haalɛ. Na gee lɔgɔ shɛɛ ngamessɛoye, woloktɔ. Na iriy na kɔbhɛsɛ lɔgɔ haalɛ na kɛbhɛgɛ shɛɛ. 3 Anye koyokkoginy ngalɔkta ke ngaya kolea ale zugo marɛa lɔga ku dhere kàmadhinɛnɛa ale kunɛye. Nɔng ngakoleonu zugo ale marrɛ ngalɔkta ku dhere kàmadhinɛnɛye, na mugɛsɛnɛ rɛhi zuga madhdhɛa zugo ga bo mɛra ke bhɛa hinɛa lɔga sabbiya gɛ na kamadhtɛsɛ yɔk lɔga hunde chirarrɛaye bhagayɛa :nyabha na hinnɛa. 4 Na ale marrɛ bhɛa senno kichirartɛ lɔga ku dhere, na nyabha bhagayɛ gɔra lɔga ku butomoa dhagɛa :zugu kali. 5 Na nɔng inye bhɛk rɛa nunu tii na te dhandali na lɔgɔ tungɛsɛ haalɛ. Na hunde dokkon lɔga chɔllanɛnɛiye, nyimbɔ. Na zukte kamannaa Yesusi ngani kishigitoye madhɛsɛ na kɛyɛbhɛtɔ. Na lɔga kayɛy Tumu, me na urrugɛsɛ kumulɔng.

6 Anye koyokkoginy ngalɔkta ke ngaya kolea kɔdhɔyɛi ngabaya na kɔgɔyɛi dhaa te ja na kɛtɛhɛtto ko ahiya kìbhbhana na kɛ̀rɛsɛna ngawu hunde kùddulɛsɛn Tumu goye. 7 Nɔng anye annaa bɔɔ kɛmɛnyɛsɛu lɔga hinno :Kirisosi kɛr na kemessa goore dhogoy huna bansanaya mɛdhdhana. Na kurrugɛsɛu lɔga bere ajjanyi :nɛa huna hira kɔrɔginɛno ko zugo, na kedheyau. Na kɛyɛbhbha kamannaa challa na kɛbhɛkka shɛɛ kɛr. 8 Na chɔɔ mɛa garchua bo challa ale kɛ̀dhdhɛttanɛanyi ke bhɛa kanɛi hira ridhing ningginɛna, bɔɔ kòytogonyɔ kɔk. Na ale ajjany :Komoruyɔ kala ale kedhdhɛa lɔga zugony kumulɔng. Nɔng a hira ridhing ningginɛna kedhdho lɔgɔ dib. Na chɔɔ ale anye sɔng ngaajjanyo. Ale ajjɛ chɔɔ zukte reyɛ kolea wokkonɛa :nɛaye kumulɔng.

Lɔga Kèliyɛa Timotiyos Na Kɔgɛ Bhee Ihɛ :Bhaulosiye

9 Na inye ayugo ke tiri, 10 ke ngaya Demas nɔng bɔɔ tɛhɛnɛa lɔga messɛa :zuga marrɛa Tumu na dhɔyanyɔ na okka Tɛsɛlongkegiyeye. Na ko nɔng Kerike bɔɔ okka Galatiyagiye, na Tito ko nɔng okka Dalmatiyagiye. 11 Na chɔɔ mɛa inde kɛllo kari bheaye, a Lukas sɔng. Na Markos dhiya kari, ke ngaya ɛanɛany zinggoa kagayɛi Tumuye. 12 Na Tikiko nɔng bɔɔ kekka Ebhesonɔ. 13 Na hunde kuniye, sɔgɔyagany ruma bɔɔ kɔdhɔyi ko dadabinyaa ganyu Torodhagiye bhɛa Akiriwa. Na bhɛa ngadadabinyaonu, gee kèmessono shebbeloye, a gee maya ajjaganyde dhogoy!

14 Na chɔɔ anye bɔɔ tiranyɛanyɔ :hira kèe Iskindir dhɛdhɛa tomoga na messonyɔ gɛrrɛng gɛrrɛng. Na nɔng ale atti :Komoruyɔ na chachchanayɔ. 15 Na ko inye bhɛa ngahirra, tɛ kɔk na bhɛk rɛa nunu, ke ngaya nɔng marɛ lɔga kàmadhinɛnɛa :aggeu gooreye.

16 Nɔng chɔɔ anye kala bere sabbune kìchilɛanyi na kɛɛnganɛi lɔgɔ, zugo bere dhɔttanyɛa na hɛa kumulɔng na chɔɔ hirre dhɔnɛ ɛananyi bere ningginɛna dhul. Na Tumu nɔng any kɔgɔny ngalɔkta gɛye ke challi. Na ke gɛrsi ngagunyi. 17 Nɔng Komoru annaa bere kɛllo kari na irishshonyi na ajjanyi gidhdhing na kàmadhɛsɛ bhorinyaa anaa kumulɔng kamannaa challa na kishigitɔ. Na chɔɔ nɔng bere ibbayseonyɔ bhɛa ajjo ngani kussɛanyɔ :ngatunyɔ na kabawa. 18 Na ale ngani ibbayseony lɔkte ku kuhu kodokkonde kumulɔng, na kɔyɛany shɛɛ na dokkɛany tumu tundɔ bhɛa lɔmɛa :nɛa zugo. Na diram any kete na nɛnɛ dhul ko kingi. Amen!

Lɔga Issayɛa :Bhaulosi Zugo Na Kennɛnɛa Ba

19 Na issa Ngabhirsikila ko Akila ko zuga doraa Onesibhoru, na sɛɛsɛ, “Saro! Saro!” 20 Nɔng chɔɔ Irato bɔɔ dhɔyɛa Korontosɔ. Na Tirobima nɔng ilagawa na kɔdhɔtta Militagiye. 21 Na mɛa inye wo bheya nande ke tiri hunde ba asanday ngani keteyoye. Na Ibholo ko Budhe ko Lino ko Ngakiladiya ko zuga kɛ̀yɛbhbha Yesus kari kumulɔng sennaginyɛ, “Saro! Saro!”

22 Tɛldi ko Komoru kari. Na any kɛdhdhɛttannung :Tumu kumulɔng.