3Jo | SuqSC | STEP |

3 John

1 Ngadadabta kɔgɔdhan :anyo, hira bo kɔlɔmi zuga yɛbhbhɛa Yesus.

Na kittonnoginy inye Gayos, dehunya nanu kibhbhaginyi hini dhere.

2 Ngadehunyda nan kibhbhaginy hiniye, anye kogolloginy Tumu na rɛa nunu kɛtɛ shɛɛ na lɔkte mesiye kumulɔng kurruknyɛsɛ na tɛ ke na bo challa ngadamita mɛdhdhanɛ na hinisa nunu ihɛ shɛɛye. 3 Yɔk zuga kɛ̀yɛbhbha Yesus kari gena bɔɔ honynyo na yokkogonyɛa lɔga gunyu. Na se kee ibhɛsɛn lɔga ku dhere hini na mɛdhdhan na kɔbhi ganggua ngalɔkta ku dhereye shɛɛ. Na anye kɛdɛlla goore dhogoy. 4 Nɔng anye hunde kishigi bhɛa mɛdhdhanɛa :erroa ganyu na kɔbhɛa ganggua lɔga ku dhereye, hinisa nanu hɔl goore na chɔɔ hini hɔldinde jorrono nganda ninggɛ dhul.

5 Na mɛa ngadehunyda nande, inye ngaya mesɛsɛn zuga kɛ̀yɛbhbha Yesus kari lɔga challa chɔɔ hunde a kɔmɔna imagiye, dhugunnono bhɛa anɛi hira challa yɛbhbhinyɛa :zugu. 6 Na yɔk chɔɔ bɔɔ kɔbhtɛsɛa zuga yɛbhbhɛa Yesus lɔga gunyu hunde ani hira hini challa ibhɛsɛni zuga yɛbhbhɛa Yesus hiniye. Na hunde se kago bhokkonnɔye, ɛa na itton shɛɛ damiya anda ajjɛi Tumu diram. 7 Yɔk ngazukta huna bere bansanɛa na hɛa, bere senno kamadhtɛsɛ zugo sara Yesus Kirisosi. Na ngakoleonu chɔɔ ahite dhɔnɛ bere ogollonɛ bhɛa zuga imaggɛa Tumu ninggɛ dhul. 8 Na zukte ku ngangaye, agge maya kàlammana na kèmesɛsɛn shɛɛ na aynde kèmesinɛ kari na kàmadhɛsɛn zugo lɔga Tumu ku dhereye.

9 Nɔng anye bɔɔ kɔgɔdhdhani dadab na kittonɛsɛni zuga doraa Tumu ɛlla ngonu. Na nɔng Diyotirabhe tamariy ke ngaya hinɛ buynde. 10 Na nɔng hunde ale kɔgɔye, anye ale kudhugunɛsɛn zugo ga mɛra ngalɔkta me :nɛa magganɛ lɔgɔ na kedhdhɛiy dariye. Nɔng chɔɔ mɛa toye hinisa nɛnɛ ngani ujjono na me ngalɔkta na zuga yɛbhbhɛa Yesus madhɛsɛnɛa zugo lɔga Tumu ngalammanao. Na chɔɔ gee se kalambaye kanyɛ na obhonisi doraa Tumu na chuktɔ.

11 Na mɛa dehunya nanu, inye me lɔga challa sɔng na gee ku kuhuye ngaorroni na mesi. Yɔk zukte messɛ lɔga challaye kumulɔng a erroa Tumu. Na yɔk gee messɛ lɔga ku kuhuye agga imaggɛa Tumu. 12 Nɔng Dimitiro a hira hini challa gayɛa :zugu kumulɔng na yokkɛa. Na hunde bhak baye, me lɔga ku dhere hinnogiy :Tumu. Na chɔɔ ko agge ngalɔkta gɛnyde kaggao na koyokkoyɔ. Na chɔɔ ko igge ngalɔkta gɛny kòyokkogung :aggeuye hunde a dhereye, gaoyɔ.

13 Nɔng anye lɔga keni kɔ̀gɔdhaginyɔ ga bo mɛra ngani ɛllɛ. Na nɔng mɛa dadabɔ ngakɔgɔdhdhaginyo ^{▼▼dadabɔ ngakɔgɔdhdhaginyo Tuga Giriki se, “...malɔ ko bɛnnayɔ ngakɔgɔdhdhagungo.” Dha bere ngabɛrguonu zugo hunde kɔdhdhɛ lɔgɔye ibhbhanɛ rɔay na kɔdhdhanɛ mal na kɔdhdhɛ lɔgɔ dadabɔ oo aha genne.}. 14 Kɔlɔmi lɔga keni kɔ̀ggɔnyɛiny ke tiri na ale kɛ̀mɛzzi nigite.

15 Na any kutuheny :Tumu na bhak ba shɛɛ ke na bo challa. Na zuga kɛ̀yɛbhbha Yesus kari ɛlla gɔrra sennaginyɛ, “Saro saro.” Na ko inye ngagenu ɛl ngonuye issa na sɛɛsɛ, “Saro saro,” kumulɔng.