Act 1 | SuqSC | STEP

Acts 1

Lɔga Bere Kɔyɛa ꞉Yesusi Tumɔ

1 – 2 Tebulose, dadaba bere kɔgɔdhdhani sabbɔ annaa kɔgɔdhdhɛsɛni lɔga bere messo ꞉Yesusi na madhɛsɛna zugo kumulɔng ko bhee yogɛsɛn zuga bere ekko ꞉nɛa lɔga ajjɛa ꞉Kuloya Tumu na kɔa tumɔ. 3 Na nɔng anna bere sabbɔ rɛsayɔ na banaa na koo dhɔlɛsɛ yɔk rɛ kɛngi mɛri ungo zugo ramman na kataga bhɛa ihɛa basseyɔ dhere. Na hunaa dhɔlɛsɛna rɛ na ɛlla kariye, madhɛsɛ bhɛa Tumu lɔmɛa zugo. 4 Na kali kona hunaa ɛlla kari bhɛa aminɛnɛaye, aynɛ lɔgɔ na sɛɛsɛ, “Tɛldi Yerusalemɔ ngaya dirr ko bhee ajjɛung ꞉Babaa Nanu Kuloya Nɛnɛ damiya bere bhiikkagungu ꞉nɛa na koyokkogungu ꞉anyo. 5 Nɔng Yohanis anna bere churro zugo ma. Na nɔng igge ale ɛllo ungge muchugi na kùchurrong Kuloya Tumu.”

6 Na kali kona hunaa ɛlla kari kutula kèe Dɛbɛrɛ Zaytuye, yɔk ghini na seyɛsɛ, “Komorue, kolea ale yagɛsɛni zuga Isirayeli buyn a mɛa ka?”

7 Na Yesus yagɛsɛ na sɛɛsɛ, “Unga bere ɛsɛdhdhana ꞉Tumu sabbaa nɛnɛ bhee gayɛo ꞉iggeu ninggɛ. 8 Na nɔng hunde ale ngɔssagung ꞉Kuloya Tumuye, jɔano barartin na anno zuga yokko lɔga ganyu Yerusalemɔ ko baa Yudha ko baa Samariya kumulɔng ko bhee uturronɛ ba.”

9 Na hunaa yogoa ngalɔkta na tewa ushaye, argi hunde kɔ tumɔye. Na nɔng ulubu ꞉idhoɔ na yɔk ngani ngaorrɛo. 10 Na hunaa kɔa tumɔ na ngani gunynyɛa churrte, zukte ku ramman malukkɛ ruminyaye hɔli dhulda dari na chili ko yɔk. 11 Na keseyɛsɛ, “Igge ngazukta Gelilaye, lɔ ɔng chillo ngaya na gunynyo tumuye? Ngahirra kèe Yesus kɛ̀hɛyɛ tumɔye, ale wokkono ngadamita orɛoye sɛgɛn.”

Lɔga Kɛ̀bɛrranɛa ꞉Matiyas Na Sɛrɛa Bhɛa Yihudha

12 Na yɔk banda Kutula Girarrunyɔ na waga Yerusalemɔ. Kutula Girarruny nɔng a kutula iho Yerusalemɔ dheyyɔ jaa. 13 Na hunaa dokkɛa ɔrte, ago doraa ungusɛa ku bɛ na irrɔgɔ balanggi tundɔ. Na zuga ɛlla ngonu bere anna Betiros ko Yohanis ko Yaykob ko Indiriyas ko Bhilibhos ko Tomas ko Bartolomi ko Matiyos ko eriya Ilbiyosi kènno Yaykob ko Simona marra lɔga allinɛnɛa :komoruya Rome zuga Ayhudhi ^{▼▼Simon a hira bere ganɛna ko zuga dogɛsɛnɛa zuga Ayhudhi go na katamara zuga Rome.} ko eriya Yaykobi kènno Yihudha. 14 Na yɔk ko tɛrro gen ko mama Yesusi Mariyam ko Yesus gɔynggɛ kali kali mukkinya na allinɛ ko Tumu hinise dhɔnɛ.

15 Na kali kona zuga yɛbhbhɛa Yesus gee ku zugo illɛy muktɛ bhee dhɔnɛ. Na nɔng Betiros bana na chilu bhɛa nɛ sabbɔ na sɛɛsɛ, 16 “Ngagochonginyaa ganyde, lɔga ngahirra kèe Yihudha bɔɔ ajjɛ Yesus mirɔgaye, a lɔga bere ajjɛa ꞉Kuloya Tumu Dawiy sabbɔ na yokkono na ɛlla dadabɔ. Na ngalɔkta maya bere bhugnyɛsɛnɛyɔ. 17 Nɔng Yihudha bere anna hira kɛ̀bɛrrana na kagacha ngalɔkta kari.”

18 Ngahirra nɔng anna bɔɔ ibhbhana birinyaa gɛnyɛ messono kuhuyamo na tallanɛa ba bhokkonnɔ, na ujinɛna “bum” na kɛngɔ bhɛsinɛna na chɔlla ubinyana ba. 19 Na yɔk zuga Yerusalemi kumulɔng taga ngalɔkta na ngabaonu tuga nɛ tɔgɔndɛsɛ sarre kèe “Akeldama.” “Akeldama” a bhɛa kènɛa “Baa Nyabbuny.”

20 Na nɔng Betiros sɛɛsɛ, “Yɔk ngalɔkta Yihudhaye annaa bere kɔ̀gɔdhdhɛsɛna Dadaba Yellony toye na sennɛa,
“‘Bhɛa bhakka ꞉nɛa any kɛtɛ hɔlɔng
na baa nɛnɛ kete guru.’

“Na ngadadabtonu bhokkona se,
“‘Buyna nɛnɛ any kɛsɛrɛ ꞉konnɔ.’

21 – 22 “Na mɛa agge maya kɛ̀bɛrrana hir kona bhɛa zuga bere kɛ̀lla ko Komoru Yesus kari, bɛrgua bere churɛa :Yohanisi zugo ko bhee kɔɛ Yesusi tumɔ. Na kɛsɛrɛ bhɛa Yihudha na kete hira koyokko ngalɔkta bɔɔ bansanɛ ꞉Yesusi rɛsɛyɔye kari.”

23 Na yɔk koo ibhta zukte ku ramman. Yoseba kèleo Barsabba oo Iyotos ko na kèleo Matiyas. 24 – 25 Na alliyɛ ko Tumu na se, “Komorue, inye ani na gayi lɔga ɛsɛdhdhɛa ꞉zugu hinisichinne kumulɔng. Na mɛa bhɛa ngazukta ku rammande, ga dhɔlagiy inde bɛrran ꞉inyo na seni kɛsɛrɛ bhɛa Yihudha na keme lɔga gunyu bortɔ dhɔtta huna kɔa bhɛa bɔɔ hinno na rɛsaye.” 26 Na mesigi damiya nɛ kɛ̀bɛrnɛnɛa na bɛrta Matiyas. ^{▼▼Zuga Ayhudhi hunde se kɛbɛrta hiriye, kɔdhdhɛsɛnɛ sara ngazuktonu bɛna bhiy bhiy na ojjɛsɛnɛ gusi toye. Na chukɛɛ gusi na sarre ɛl bɛa bhonsana sabbɔye a hirre bɛrrana ꞉Tumuye.} Na tɔru zuga ekko ꞉Yesusi ku tɔmmɔn ko dhɔnɛ.