Act 10 | SuqSC | STEP | Dha bere Kesariyagiye lɔ hirre kèe Kornolios. Na a gulsaa bholisi allinɛnɛa bholisa kènno “Kimsiya Dhalɛni” gam kona.

Acts 10

Lɔga Elia ꞉Kornoliosi Betiros

1 Dha bere Kesariyagiye lɔ hirre kèe Kornolios. Na a gulsaa bholisi allinɛnɛa bholisa kènno “Kimsiya Dhalɛni” gam kona. 2 Na nɔng ko zuga gɛnyɛ kumulɔng bere anna zuga kachchɛa Tumu na ɛngɛrsɛa na ajjɛa diram. Na nɔng bere ɛana zuga ku bhoyoga shɛɛ na allinɛna ko Tumu kali kali. 3 Na kali kona rayagiye ^{▼▼Kolea raya a kolea zuga Ayhudhi allinɛnɛa ko Tumu kali kali.} Tumu aynɛ Kornolios lɔgɔ huna kunauny. Na aru hira ekkono ꞉Tumu tok hunde kun na eli na senɛsɛn, “Kornoliose!”

4 Na dɛɛbu na gɔnyu hiraa kèkkono churr na ghinu na sɛɛsɛ, “Komorue, wa tɔlɔ ɔng?”

Na hiraa kèkkono yagɛsɛ na sɛɛsɛ, “Lɔga bere ɛanɛi bhoyoga ko lɔga bere ogolɛi Tumu, wa tɛhɛtta ko ahaa uddulɛsɛni nɔng na tɛhɛnna. 5 Na mɛa eg zugo Yobhegiye na keli hirre kèe Simona kènno Betirose na kugoyɔ. 6 Nɔng mɛa a kɔmɔni bhɛa hira sibbo sayo kèe Simon bhakka yirisi tugɔ.”

7 Na hira ekkono ꞉Tumu yogɛsɛna ngalɔkta hunaa kennɛna ko nɔngge, Kornolios eleo zuga messɛa zinggo doraa nɛnɛ gee ku ramman ko bholisiya bhɛkka nɔng yɛbhbha Tumu. 8 Na dhugunɛsɛ ngalɔkta kumulɔng na egu Yobhegiye.

Lɔga Orro ꞉Betirosi Huna Kunauny

9 Na bhorroyɔ zugaa kèkko hunaa hɛa na kali kɛngɔ dokkɛa ngaɔrronu jaaye, nɔng Betiros bana na irrɔgu dori bhɛa ku balanggi tundɔ na kalliyɛ ko Tumu ^{▼▼Doriyoa zuga Isirayeli ku bɛna kurachin heo boloy oo rata. Na a bhɛa awusɛa ꞉zugu.}. 10 Na dhagu ꞉hozzo na tɛhɛnu amissɛ. Na hunaa zugo ngani okkɛa amissɛye, nɔng aru lɔga ajjɛa ꞉Tumu huna kunauny. 11 Na aru tumu hunde onɛ na galiya bo hɛtta ko ruma ku charki nyabha iriynɛ na ngɔana baye. 12 Na ngarumbonu bere lɔmma kɛginya ɛynya bhiy bhiy. Gena a kɛginyaa dusuny. Gena a ahaa kìwoo. Gena agga silolnɛna bay bay na gen a shɔaa bansɛa tumɔ. 13 Na koo shigu lɔkte sennɛ, “Betirose, bana na in ngakɛginyaya na ussu!”

14 Na yagɛsɛ ꞉Betirosi na sɛɛsɛ, “Komorue! Nganga ngayo! Anye ahaye bu gɛrsi lɔmmɛ ridhing ngani kùsso dhul.”

15 Na kòyoktɛsɛ lɔgɔ sɛgɛn na kèseyɛsɛ, “Ahiya tuho ꞉Tumu ridhing ningginɛna, ke gɛrsi ngabhɔdhi.”

16 Na hunaa kòyoktɛsɛa ngalɔkta kɛngi sizzi na tewa ushaye, galiyaa ku rum kàyaga tumɔ ke tiri.

17 Na Betiros ɛsɛdhu na seu, “Na dha ale ngakunaya hologun a ɛnɛng?” Na hunaa ngani ɛsɛdhdha ngalɔktaye, zuga bare ekkono ꞉Kornoliosi lamiyo doraa Simoni. Na jɔya na hoya na chili waranɔ. 18 Na eliyɛ na ghini na seyɛsɛ, “Hirre kèe Simon Betirose bɔɔ lammano ꞉iggeu?”

19 Na Betiros hunaa ngani ungusɛsɛna kunaye, sɛɛsɛ ꞉Kuloya Tumu, “Lamienyɛ :zukte ku sizzi. 20 Na ga bana na bhon bhɔ na dhi ko yɔk kari. Yɔk ngazukta agga kekkoni ꞉anyo na ko hini ngadhaginɛno.”

21 Na nɔng bhona na assa yɔk. Na sɛɛsɛ, “Saro! Hirre lameonyuye kani nganda. Na honyɛo lɔk giyong?”

22 Na yɔk seyɛsɛ, “Agge kohonynyo bhɛa hira ku gulsaa bholisuny kènno Kornolios. Nɔng a hira challa kachcha Tumu na dhɔngngɛa ꞉zuga Ayhudhi kumulɔng. Na bare hira ekkono ꞉Tumu kullɛna aynɛa nɔng lɔgɔ. Na eleny na ok doraa nɛnɛ na kishik lɔkte gunyde.” 23 Na nɔng lamma na dhiganu dorigiye na te kɔmɔna gɛnyɛ.

Lɔga Kɔyɛa ꞉Betirosi Doraa Kornoliosi

Na bhorroyɔ Betiros bana na dhi ko yɔk kari. Na ko yɔk zuga yɛbhbhɛa Yesus bhakkɛa Yobhe gena tɔrɔ nɔng na dhi kari. 24 Na bhorre daga Kesariya. Nɔng Kornolios dha bere eleono bhɛnɛn ko bɛkanyaa gɛnyɛ na reɛ Betiros. 25 Na Betiros hunaa tunnukkono doriye, Kornolios ko na tɔgɔdhɛsɛ nɔng kɔmma. 26 Na sɛɛsɛ ꞉Betirosi, “Bana tunɔ! Anye kani hiri hunde nunde.”

27 Na hunaa dhakkɛa kali na tunnukkɛa dori toyeye, Betiros aru zuga bo mɛra dhaa mukkinyana na ɛlla dorigiye. 28 Na sɛɛsɛ, “Nɔng igge Damiya na Tumu gaoyɔ hunde hira Ayhudhi ko hira bhora anaa kari ngaɛllo na anɛ kullɛye. Nɔng anye bare dhɔlaganyɔ ꞉Tumu lɔk gena. Na mɛa hunde kugunyi hir kona ke gɛrsi oo huna hira marra ꞉Tumuye, a kullɛ. 29 Na huna bare eleonyɔ, ngani ko hini karaktɛoyo na katamarro. Na kugou hung. Na bare eliyɛanyu lɔk giyong?”

30 Na yagɛsɛ ꞉Kornoliosi na sɛɛsɛ, “Anye bortɔa bortune rayagiye bɔɔ kallinɛno ko Tumu doraa nanu. Na karra hira bo malukko ruma bo bhadhdha hunde chillagany muma nanu dɛkte. 31 Na seagany, ‘Kornoliose, lɔga bere ogolɛi Tumu wa shikka. Na ga bere ɛanɛi bhoyoga wa tɛhɛnna. 32 Na eg zugo Yobhegiye na koyoktɛsɛ Simona kèe Betiros na kugoyɔ. Nɔng mɛa a kɔmɔni bhɛa hira sibbo sayo kèe Simon bhakka yirisi tugɔ.’ 33 Na kegoginyɔ zugo ke tiri. Na ngaya kunɛye a challi. Na agge wa kumuknyɛsɛo ngaya kɛlɛ ko Tumu kariye kumulɔng na kìshikto lɔkte ajjiny ꞉nɛa na seni yogogiyte.”

34 – 35 Na nɔng Betiros yogo lɔgɔ na seu, “Anye wa katagga dhere! Tumu dha zugo ngalɛllo na hin chɔɔ zuga bhora anaa ɛngɛrsɛa nɔng na messɛa lɔga challa kumulɔng. 36 Kamannaa bere yogɛsɛna ꞉Tumu zuga Isirayeli, igge gaoyɔ. A kamannaa Komoruya zugony kumulɔng challa kènno Yesus Kirisos. Na agge hunde kɛyɛbh nɔngge, kɛ̀l ko Tumu ke na bo challa shɛɛ. 37 Chɔɔ ko igge lɔga bere ɛrrinyana baa Yudha kumulɔng gaoyɔ. Yɔk a lɔga bere shigininyana baa Gelila bɛrgua bere dheshshanɛa ꞉Yohanisi madhaa churɛa zugo ma. 38 Na bɛrgua churɛa zugo ma, Tumu annaa bere uhudhdho Yesusa Nazireti Kuloya nɛnɛ na ajjɛa barartin. Na hande kɔɛye kumulɔng ɛlla ko nɔng na messo lɔga challa. Na chɔɔ ibbayseo zuga chibbo ꞉Moldoyɔ kumulɔng.

39 “Na agge kanno zuga korrono ngalɔkta bere me ꞉nɛa Yudhagiye ko Yerusalemɔye kumulɔng kawarre. Nɔng bere ibhbhɛa ꞉zugu na ujɛsɛnɛa muddɛnne kɛyɔ na ilakkɛa na rɛsayɔ. 40 Na unga anɛa sizzi nɔng dhɔnga ꞉Tumu rɛsɛyɔ na bau na kargiyɛ. 41 Na huna bere dhɔllana rɛ, zugo kumulɔng ngani kargito. Bere korro ꞉aggeu sɔng, zuga bere bɛrraniy ꞉Tumu sabbɔ. Na chɔɔ huna Yesus bansana rɛsɛyɔ, agge kanno zuga bere kɛllo ko nɔng na kumulnɛno kari. 42 Nɔng anna bere ayiyɔ lɔgɔ na kàmadhtɛsɛo zugo kamannaa nɛnɛ. Na kòyoktɛsɛo zugo hunde Tumu bere bɛrrana Yesus na kete hira kedhdho lɔga zuga rɛssɛa ko ga zuga ɛlla basseyɔ kariye. 43 Na zukte yɛbhbhɛ nɔngge kumulɔng jɔanɛ bhɛa ujjugɛa lɔga gɛ gɛrsa sara gɛnyɛ damiya bere yogɛa ꞉zuga yogɛsɛnɛa zugo lɔga dhugunono ꞉Tumu.”

44 Na hunaa Betiros ngani yokkono ngalɔktaye, zugaa chirarnɛna ngɔɛsɛ ꞉Kuloya Tumu kumulɔng. 45 Na zugaa yɛbhbhɛa Yesus bere kedhdhɛa rɛhiya maya na dhɛanɛa ko Betiros iwachi ke ngaya chɔɔ zuga bhora anaa ko yɔk kɔsɛn ꞉Kuloya Tumuye. 46 Lɔkte iwachinɛnɛ ꞉yɔkkuye, a ngaya shigɛ zugo hunde mɛzzɛɛ tugi genne na eterrisanɛ Tumuye.

Na Betiros seu, 47 “Yɔk ngazukta wa ɔgɛsɛa ꞉Kuloya Tumu huna bɔɔ na. Na mɛa hunde kuchurtɛ ma, anda kanyɛ :noy?” 48 Na aynɛ zugo lɔgɔ na kùchuru sara Yesus Kirisosi. Na yɔk zuga ngɔsɛna ꞉Kuloya Tumu koo tɔllɔsɛsɛ Betiros na kɛtɛlda kari ungge muchugi.