Act 11 | SuqSC | STEP | Na zuga ekko ꞉Yesusi ko gochonginyaa yɛbhbhɛa nɔng bhakkɛa baa Yudha, shigi hunde dha bɔɔ zuga bhora anaa yɛbhɛ lɔga Tumuye.

Acts 11

Lɔga Kɔbhɛsɛna ꞉Betirosi Zuga Ɛlla Yerusalemɔ Yɛbhbhɛa Yesus

1 Na zuga ekko ꞉Yesusi ko gochonginyaa yɛbhbhɛa nɔng bhakkɛa baa Yudha, shigi hunde dha bɔɔ zuga bhora anaa yɛbhɛ lɔga Tumuye. 2 Na Betiros hunaa wokko Yerusalemɔye, wologo ꞉zuga yɛbhbhɛa Yesus bere kedhdhɛa rɛhiya maya. 3 Na seyɛsɛ, “Inye ogu bhɛa zuga rɛhiya maya ngani kegendao na muldɛoye, tɔlɔ ɔng?”

4 Na Betiros imimishiyo lɔga bɔɔ dokkono na kɔbhɛsɛ kumulɔng shɛɛ na sɛɛsɛ, 5 “Anye huna kihi Yobhegiye, bɔɔ kallinɛno ko Tumu. Na karra lɔga kungusɛɛni huna kunauny. Na galite koriye anna bo hɛtta ko ruma ku charki nyabha iriynɛna. Na ngɔa tumɔ na ko bhɛa kihɛi ꞉anyo. 6 Na hunaa kugunyi ngagalitonu shɛɛye, karra kɛginyaa bo mɛra. Kɛginyaa dusuny ko ga kìwoo ko ga silolnɛna bay bay ko shɔaa bansɛa tumɔ. 7 Na kishikka lɔkte sennaganyɛ, ‘Betirose! Bana, in na ussu!’

8 “Na anye kayagɛsɛu na kesɛɛsɛu, ‘Komorue, nganga ngayo! Anye ahite bu gɛrsi ku ridhing ko mɛa ngani kùsso dhul!’

9 “Na kishikka lɔkte kòyokkogony tumɔ sɛgɛn na sennɛ, ‘Ahiya tuho ꞉Tumu na ridhing ningginɛna, ke gɛrsi ngabhɔdhi.’ 10 Na kòyoktogony ngalɔkta jagarɛ kɛngi sizzi, na ngagalitonu kàyaga tumɔ sɛgɛn.

11 “Na yɔk dhaa zukte ku sizzi kèkkogonyi hoya Kesariyagiye chɔɔ doraa kihɛi na chili waranɔ. 12 Na yogogony ꞉Kuloya Tumu lɔgɔ na ko hini ngakadhaginɛno na kìdhiyo ko yɔk kari. Na chɔɔ ngagochonginyaa ku illɛyte bɔɔ kidhiyano na kɛhɛo doraa ngahirronu kari. 13 Na nɔng yogogiy lɔga dha orro ꞉nɛa. Nɔng dha bɔɔ or hira ekkono ꞉Tumu hunde kun na chil doraa nɛnɛ na ajjɛ lɔkte sennɛ, ‘Eg zugo Yobhegiye na keli Simona kèe Betiros na kugoyɔye. 14 Nɔng ale yokkoginy lɔga kìbbaysiyɛinyi inye ko zuga gunyu kumulɔng.’

15 “Na anye hunaa kɔɔbhɛsɛni lɔgɔye, Kuloya Tumu ngɔɛsɛ zugo damiya bere ngɔsagɛiy agge sabbɔ. 16 Na kagadhau lɔga bere yokkono ꞉Komoruyɔ na sennɛa, ‘Yohanis annaa churnɛna ma. Na nɔng igge ale kùchurrong Kuloya Tumu.’ 17 Na Tumu hunde a nganda ajjɛ zuga bhora anaa Kuloya nɛnɛ damiya bere ajjɛiy agge zuga kɛyɛbhbha Yesus Kirisos sabbɔye, anda anye Tumu kaganyɛ ɛnɛng?”

18 Na zugo hunaa shikkɛa ngalɔktaye, rɛgɛ ꞉lɔkku. Na eterrisana Tumu na se, “Na mɛa kèe Tumu wa aynɛa zuga bhora anaa bhɛa ujjugɛa lɔga gɛ gɛrsa na kawakta gɔra nɛnɛ na kɔjɔya basseya iho dhul.”

Lɔga Zuga Ɛlla Ansokiyagiye Yɛbhbhɛa Yesus

19 Na kala bere kùjjɛa ꞉Istibhanos na rɛsɛa, zuga yɛbhbhɛa Yesus dha bere kɔ̀gɔrrana na hangnɛ na bhassanɛ na gena hɛ Bhinkegiye ko Kobhorosɔ ko Ansokiyagiye. Na hunde hɛye, dha bere madhɛsɛnɛ kamannaa Yesusi zuga Ayhudhi sɔng. 20 Na bhɛa zuga honynyo Kobhorosɔ ko Kerenagiye gena yɔk ago Ansokiyagiye na madhtɛsɛ chɔɔ zuga Giriki kamannaa Komoru Yesusi. 21 Yɔk bere ɛana ꞉Komoruyɔ goore na zuga bo mɛra yɛbhta kamannaa Yesusi na wakta gɔra Komoruyny.

22 Na zuga yɛbhbhɛa Yesus ɛlla Yerusalemɔ hunaa shikkɛa ngalɔktaye, ege Barnabas Ansokiyagiye. 23 Na nɔng hunaa kɔa na dokkono na orro lɔga bo challa chirbhisiyɛa ꞉Tumu zugoye, dɛlu goore na iriyu na kɛmɛtta na kɛyɛbhɛ Komoru hinisichinne kumulɔng. 24 Nɔng a hira challa bere kɔsɛna ꞉Kuloya Tumu na yɛbhbha Komoru goore. Na koo madhu zugo na ga bo mɛra yɛbhɛ na hoya gɔra Komoruyny.

25 Na Barnabas koo ogu Tersesegiye na kalameo Saol. 26 Na hunaa jɔanaye, dhigana chɔɔ Ansokiya. Na oyo dhɔnɛ kumulɔng yɔk ko zuga yɛbhbhɛa Yesus ɛlla ngonu muktɛ na madhtɛsɛ zuga bo mɛra kamannaa Yesusi. Na zuga yɛbhbhɛa Yesus ɛlla Ansokiyagiye a zuga sabbune bere kɔ̀gɔdhdhɛsɛna sara kèe “Kirisiyan.” ^{▼▼“Kirisiyan” a bhɛa kènɛa zuga yɛbhbhɛa Yesus Kirisos.}

27 Na ngakaldonu zuga yogɛsɛnɛa zugo lɔga dhugunono ꞉Tumu gena banda Yerusalemɔ na ago Ansokiyagiye. 28 Na bhɛa nɛ toye hirre kèe Agabhos bana na yogo lɔga ajjɛa ꞉Kuloya Tumu na seu, “Ale baa Rome kumulɔng ba a hozzoa bo.” (Yɔk ngalɔkta dha bere hɛ na bhugnyɛsɛnɛ bɛrgua bere Kilawdi anɛa komoruya Rome.) 29 Na zuga yɛbhbhɛa Yesus bhakkɛa Ansokiya ɛsɛdhɛ lɔgɔ na kumukta ahaye lɔmmɛye na kɛyay gochonginyaa bhakkɛa baa Yudha. 30 Na ibhta ahaa mukkanɛa na ayɛ Barnabas ko Saol na kayɛsɛ zuga bibiyo lɔmmɛa zuga yɛbhbhɛa Yesus ɛlla Yudhagiye.