Act 15 | SuqSC | STEP | Na kali kona zug gena hoya Yudhagiye na ago Ansokiyagiye. Na madha zuga yɛbhbhɛa Yesus na seyɛsɛ, “Hunde rɛhiya gu maya huna kera bere Muse ngakedhdhooye, Tumu lɔga gu gɛrsa ngaibbayseongo.”

Acts 15

Lɔga Mɛzziyɛa ꞉Zuga Yɛbhbhɛa Yesus Yerusalemɔ

1 Na kali kona zug gena hoya Yudhagiye na ago Ansokiyagiye. Na madha zuga yɛbhbhɛa Yesus na seyɛsɛ, “Hunde rɛhiya gu maya huna kera bere Muse ngakedhdhooye, Tumu lɔga gu gɛrsa ngaibbayseongo.” 2 Na Bhaulos ko Barnabas hunaa shikkɛa ngalɔktaye, ɛkkɛnyandɛ ko yɔk na ojjigi lɔgɔ. Na hunaa oyta lɔgɔ na tewa ushaye, koo zugo bɛrta Bhaulos ko Barnabas ko zuga ngaɔrronu yɛbhbhɛa kamannaa challa gen na kege Yerusalemɔ na kɛlɛhɛnɛ ngalɔkta ko zuga bere ekko ꞉Yesusi ko zuga bibiyo lɔmmɛa zuga yɛbhbhɛa Yesus,. 3 Na ege ꞉zuga yɛbhbhɛa Yesus ɛlla Ansokiyagiye, na ago. Na hunaa dhoyɛa baa Bhinke ko naa Samariyaye, yoktɛsɛ gochonginya lɔgɔ na seyɛsɛ, “Zuga bhor konnuny ko yɔk dhaa yɛbhɛ kamannaa challa na ujjugu lɔga gɛ gɛrsa.” Na yɔk dɛlɛ goore. 4 Na hunaa ayta na dakta Yerusalembe, lamba ꞉zuga yɛbhbhɛa Yesus ko zuga bere ekko ꞉Yesusi ko zuga bibiyo lɔmmɛa zuga yɛbhbhɛa Yesus, na abhanyisiyo. Na yɔk Bhaulos ko Barnabas koo kɔbhtɛsɛ zugo lɔga bɔɔ mesɛsɛna ꞉Tumu kumulɔng.

5 Na zuga kɔbhbhɛa damiya Bhɛrɛsi yɛbhbhɛa Tumu gen banda na se, “Zuga bhor konnuny hunde yɛbhbhɛ lɔga Yesusiye, maya kedhdhɛ rɛhiya maya na bhɛkkɛ Damiya Tumu bere kàjjɛa Muse.”

6 Na zuga ekko ꞉Yesusi ko zuga bibiyo lɔmmɛa zuga yɛbhbhɛa Yesus muktɛ na kɛlɛhɛnɛ ngalɔkta. 7 Na hunaa oyta lɔgɔ dirr na tewa ushaye, Betiros bana na sɛɛsɛ, “Gochonginyaye, huna bɔɔ sabbɔ Tumu bɛrrananyi anye bhɛa nu na kàmadhɛsɛ bhorinya gen kamannaa challa na kɛyɛbhɛyɛ, igge gao chi. 8 Na Tumu, Komoruya gaa zugo hinisi, dhɔlɛsɛ bhɛa hinɛa yɔk na aynɛ Kuloya nɛnɛ damiya bere ajjɛiy agge. 9 Na huna bere onyono hinisi yɛbhaa nɛ, anna ba ngani kɛlɛlao. Na mɛa agge ko yɔk gunyey ke dhɔnɛ. 10 Na mɛa illobbo Tumu na senno bhɛa bhorinyaa anaa kɔbhbhɛa Yesus kɛtɛ lɔga bo dhandala bere kokonginyaa ga ko agge ngani kɔ̀yayo kɛ ɔng? 11 Nganga challi ngayo! Lɔkte kɛyɛbhte a ngaya ko agge kàbasɛ chirbhisiya Komoru Yesusi hunde nɛye.”

12 Na zugo kumulɔng dhittɛ rib, na chirara Barnabas ko Bhaulos hunde yokkonɛ lɔga bu barara iwachiyɛa ꞉zugu bɔɔ mesɛsɛna ꞉Tumu bhɛa bhorinyaa anaaye. 13 Na yɔk hunaa yoktoa lɔgɔ na tewa ushaye, Yaykob ko nɔng bana na yagɛsɛ na sɛɛsɛ, “Gochonginyaye, ga chirartanyuyɔ! 14 Lɔgɔ annaa kɔbhagiyɔ ꞉Simoni hunde Tumu dha bɔɔ sabbɔ guny bhorinyaa anaa na se kɛbɛra zug gena na kete ga gɛnyɛ yɛbhbhɛa nɔngge. 15 Yɔk ngalɔkta dhɛɛ ko lɔga bere yokkonɛa ꞉zuga yogɛsɛnɛa zugo lɔga dhugunono ꞉Tumu. Chɔɔ anna bere kɔ̀gɔdhdhɛsɛna dadab na sennɛa,
16 “‘Ale kowokkon
na keghendi doraa Dawiy bere nyomnɛna.
Na hana bolinɛna
kɔbhɔgi ke dhandali sɛgɛn.
17 Ngangaye, keni zukte ngani dhɔynɛye kalameony anye
na kète Komoruya nɛ.
Na bhorinyaa anaa keni kɛyɛbhtany anye
na kete zuga ganyu kumulɔng.
18 Anye Komoruya bere koyogɛsɛni zugo ngalɔkta sabbɔ,
keseni nganga.’

19 “Na mɛa lɔkte kɛsɛdhi ꞉anyoye, keni zuga bhorinyaa anaa yɛbhbhɛa Tumu na honynyo gɔra nɛnɛ ngakɔchɔllayɛ. 20 Na agge ga kɔ̀tɔgɔndɛsɛ dadab na kàmadhtɛsɛ na kèseyɛsɛ ɛnɛnggeo, ‘Amissɛa uddulɛsɛnɛa :zuga ibhbhɛa aha gen ke barari ngaammo. Lollumo ngamesso. Ayuga kɛginyaa nyawa bay ngani kataandao ngaammo na nyawa ngamatto.’ 21 Nɔng bɛrgunyaa kinginye Damiya Tumu bere kàjjɛa Muse annaa kàmadhɛsɛna ori kumulɔng na chɔɔ ko mɛa toye kotoyeono doriyoa madhinɛnɛa zuga Ayhudhi lɔga Tumu Kala Ayawsuny tii tii.”

Lɔga Kɔ̀dhɛsɛnɛa Zuga Bhorinyaa Anaa Ngani Yɛbhbhanɛa Yesus Dadab

22 Na yɔk zuga ekko ꞉Yesusi ko zuga bibiyo lɔmmɛa zuga yɛbhbhɛa Yesus, muktiyaa ko zuga yɛbhbhɛa Yesus ɛlla Yerusalemɔ kumulɔng na ɛsɛdhɛ lɔgɔ na kɛbɛrta zug gen bhɛa nɛ na kidhi ko Bhaulos ko Barnabas Ansokiyagiye. Na bɛrta hira kènno Yihudha Barsabba ko hira kènno Silasi. Yɔk a zuga allinɛnɛa zuga yɛbhbhɛa Yesus. 23 Nɔng dadaba bere ittonɛsɛnɛa ꞉yɔkku dha bere se,
“Kanno zuga bere ekkiy ꞉Yesusi ko zuga bibiyo lɔmmɛa zuga yɛbhbhɛa Yesus,
ko gochonginyaa gu kabhakko Yerusalem.
Na ngadadabta kɔ̀gɔdhdhagung zuga bhorinyaa anaa yɛbhbho Yesus
bhakko Ansokiya ko Soriya ko Kilkiya.
Na kesennagung, ‘Saro saro!’

24 “Bare kishikto hunde dha bɔɔ zuga gayo gena bansanɛ ꞉eygo na assanungɛ igge na madhdhagungɛ lɔga rɛkungɛa na margeungɛye. Agge ngazuktonu yɔk ngani kèktoyo. 25 Na agge kumuktiyao na kɛlɛhɛndo ngalɔktonu. Na hunaa kɛmɛzzeo na hinisiya gayo ibhtɛa ke dhɔnɛye, kɛbɛrtao zukte ku ramman na kidhi ko Barnabas ko Bhaulos, bɛkanyaa ga bo dhandala. 26 Yɔk a zuga bere chɔllayɛa rɛhiya gɛ ke ngaya madhɛsɛnɛ zugo lɔga Komoru Yesus Kirisosiye. 27 Na koo agge kibhtao Silasi ko Yihudha na kektogung na kɔɔbhtagung ngalɔkta kɔ̀gɔdhdhagung dadabɔye tugichinne shɛɛ. 28 Na wa kamarakto na bhɛa Kuloya Tumu ko bhɛa nayo, heo a challi hunde lɔkte mɛri ngakamargeongngoye. Agge kènno kòyoktogung ngalɔkta sɔng na bhɛgɛtɔ. 29 ‘Amissɛa kùddulɛsɛna ahaa ibhbhɛa ꞉zugu ke barari ngaammo. Ayuga kɛginyaa nyawa bay ngani kataandao ngaammo na nyawa ngamatto. Lollumo ngamesso.’ Hunde bhɛkko ngalɔktaye, a challi.
“Tɛldi shɛɛ.”

30 Na kendɛ ko zugaa ekkɛa na ago Ansokiyagiye. Na mukta zuga yɛbhbhɛa Yesus na ayɛ dadab. 31 Na yɔk hunaa toyeonɛa dadabte, dɛlɛ goore ke ngaya anɛ lɔga bo irishshɛa na ilallɛaye. 32 Yɔk dha Yihudha ko Silasi a zuga yogɛsɛnɛa zugo lɔga dhugunono ꞉Tumu. Na hunaa ɛlla ngonuye, madhtɛsɛ zuga yɛbhbhɛa Yesus lɔga bo mɛra na ilala na iriyi na kɛyɛbhɛ lɔga Yesusi goore, na ngadhɔttɛ. 33 Na hunaa tɛlda ngonu ungge muchugi na tewa ushaye, kendɛ ko zuga yɛbhbhɛa Yesus ɛlla ngonu na seyɛsɛ, “Ago shɛɛ. Dhi ko Tumu kari!” Na waga ɔra bɔɔ kèkkonɛa. 34 [Na hunaa hɛaye, nɔng Silasi tɛhɛnu bhɛa senno kɔdhɔyɛiy ngonu na wagu gɔrɔ.] ^{▼▼Ngalɔkta ɛl 34ɔye dadabinyaa Lɔga Tumu tuga Giriki genne ninggɛ.} 35 Na Bhaulos ko Barnabas tɛldi Ansokiyagiye ungge muchugi. Na tɔrɔ zuga bo mɛra yɛbhbhɛa Yesus na madhtɛsɛ zuga bhakkɛa ngaɔrronu kamannaa Komoru Yesusi challa na kɔbhtɛsɛ shɛɛ.

Lɔga Kennɛnɛa :Barnabasi Ko Bhaulosi

36 Na tɛlda ungge muchugi na Bhaulos sɛɛsɛ Barnabas, “Ga bana kàgo oriya bɔɔ kamadhɛsɛna lɔga Komoruyny kumulɔng na kɔ̀gɔnyigi zuga bɔɔ yɛbhbhɛa Yesus hunde ɛl ɛnɛngge!” 37 Na Barnabas tɛhɛnu Markosa kènno Yohanis na kidhi ko yɔk kari. 38 Na nɔng Bhaulos taganyɛ bhɛa senno kidhiyɛ kari ke ngaya bɔɔ dhɔynɛnɛ Bhimbiliyagiye, na zinggoye kari ngani kidhiyɛyoye. 39 Na Barnabas ko Bhaulos ɛkkɛnyandɛy ngalɔkta kɛngɔ goore na kendɛ. Na nɔng Barnabas ibha Markos na ago gonggulɔ Kobhorosɔ. 40 Na Bhaulos nɔng bɛra Silasi na ogoldɛsɛ ꞉gochonginyau Tumu na dhɔtɛsɛ chaldina Tumu na ago 41 oriya ɛlla Soriyagiye ko Kilkiyagiye na iriyi zuga yɛbhbhɛa Yesus gɔrɔ gɔrɔ.