Act 16 | SuqSC | STEP | Na Bhaulos dhau Derbe na koo dhau Litira. Na Litiragiye dha bere lɔ hirre yɛbh Yesus kèe Timotiyos. Nɔng jɔnɛ a tɛriya ku Ayhudhi yɛbhbha lɔga Yesusi. Chɔgɔnɛ nɔng a hira Girikuny.

Acts 16

Lɔga Timotiyos Dhiyɛa Ko Bhaulos Ko Silasi Kari

1 Na Bhaulos dhau Derbe na koo dhau Litira. Na Litiragiye dha bere lɔ hirre yɛbh Yesus kèe Timotiyos. Nɔng jɔnɛ a tɛriya ku Ayhudhi yɛbhbha lɔga Yesusi. Chɔgɔnɛ nɔng a hira Girikuny. 2 Nɔng bhɛa gochonginyaa bhakkɛa Litira ko Ikoniyom, Timotiyos a hira bo challa. 3 Na nɔng Bhaulos tɛhɛnu na se kidhi kari. Na dhiganu na kedhdhu rɛa maya ke ngaya zuga Ayhudhi bhakkɛa ngonu kumulɔng gaɛ hunde baba nɛnɛ a hira Girikiye. 4 Na yɔk hunaa woyɛa ori toyeye, kɔbhtɛsɛ zugo lɔga bɔɔ ajjɛa ꞉zuga bere ekko ꞉Yesusi ko zuga bibiyo lɔmmɛa zuga yɛbhbhɛa Yesus, ɛlla Yerusalemɔ na kɛbhɛgɛtɔ. 5 Na zuga ngaoreonu yɛbhbhɛa Yesus iriytɛ yɛbhayɔ na te dhandali na kali kali ago na te mɛri.

Lɔga Kunasɛa ꞉Bhaulosi

6 Na Bhaulos ko Silasi se kago oriya ɛlla Isiyagiye na kamadhtɛsɛ zugo lɔga Tumu. Na yɔk taganyɛ ꞉Kuloya Tumu na ngaoreonu lɔgɔ ngamadhɛɛnɛ. Na yɔk dhɔyɔ na ago na dha oriya ɛlla Bhirgiyagiye ko Galatiyagiye. 7 Na hunaa hɛa na dokkɛa ngerreya Misiyaye, ɛsɛdhɛ lɔgɔ na kago Bitiniyagiye na ittonu ꞉Kuloya Yesusi ^{▼▼Ngaya kèsenɛ “Kuloya Yesusiye,” a bhɛa kènɛa “Kuloya Tumu.”} na taganyɛ sɛgɛn na ngonu ngahɛ. 8 Na dha Misiya na shittɛ ɔra kèe Torodha. 9 Na nɔng Bhaulos barɔ kunau na aru hira Mekedoniya kona hunde chil na tɔllɔhɛsɛn na senɛsɛn, “Ga erreya yirisi na hoya Mekedoniya tandɔ gɔrra na ɛyaiyɔ se!” 10 Na hunaa Bhaulos kunawa na tewa ushaye, tɛhɛnɛ wochin na chɛbtɛ ke tiri na ago Mekedoniyagiye. Heo eli ꞉Tumu na kamadhtɛsɛ zugo lɔga gɛnyɛ ngonu.

Lɔga Yɛbhɛa ꞉Ngalidiya Kamannaa Yesusi

11 Na kabandao gonggulɔ Torodhagiye, na kayto chɔɔ Samotirake. Na bhorroyɔ kayto Nabhulegiye. 12 Na kobhondao ngonu na kayto Bhilibhisɔ jagariyɔ. Dha bhɛa ngaoreonu ɛl Mekedoniyagiyeye kumulɔng nɔng Bhilibhis a ɔra bo bhakkɛa ꞉zuga Rome. Na agge kɛtɛldao ungge muchugi ngonu.

13 Na Kala Ayawsuny kobhondo waranɔ ɔr toye na kayto kidho tugɔ na kàlamiyo bhɛa mukkinyanɛa ꞉zugu na allinɛnɛa ko Tumu. Na kɔjɔyao tɛrroa dhaa mukkinyana na kɛtɛldao bay ngonu na kamadhtɛsɛo lɔga Tumu. 14 Na bhɛa ngatɛrroonu chirariyɛye, lɔ tɛrite kèe Ngalidiya kun ɔrre kèe Tiyatiron. Nɔng dha a ngagayya ruminyaa rɛghɛa gaw dhandala na nɔng kɔbh lɔga Tumu damiya zuga Ayhudhi. Na hunaa shikko lɔga yokkono ꞉Bhaulosiye, owo ꞉Komoruyɔ hini na chiraru shɛɛ. 15 Na nɔng ko zuga doraa nɛnɛ hunaa kuchurta na tewa ushaye, eleey agge na seyagiy, “Hunde wa artanyu na senno ketewa hira kɛyɛbhi Tumu dhereye, hoya tɛldi doraa nanu.” Na tɔllɔhagiy goore na kigombɛsɛo.

Lɔga Kìchibɛa Bhaulos Ko Silasi

16 Na kali kona hunde kɛhɛo bhɛa kallinɛnɛa ko Tumuye, kitinynyandɛo ko sedhdheyte ku gaymay gɔrɔ. Nɔng dha a deniya lɔmma kuloya dhugunnono lɔga ale bhugnyɛsɛnɛa. Na hunde me ngalɔktonuye, zuga gɛnyɛ allinɛnɛa nɔng jɔsɛn birinyaa bo mɛra kali kali. 17 Na nɔng bere kɔbhiy agge ko Bhaulos na arra wuy na senno, “Ngazukta a zuga kachchɛa Tumu, Komoruya Bo Ɔnnɛna. Na yɔk madhdhagungɛ ganggua ibbayseo zugo lɔga gɛ gɛrsa!” 18 Na mesu nganga ungge mɛri. Na kali kona Bhaulos dɛbu na budhɛ na sɛɛsɛ mɛnɛngi, “Kesennaginy sara Yesus Kirisosi bhona bhɛa ngasedhdheyta na ogo!” Na bhona ke tiri.

19 Na yɔk zuga allinɛnɛa nɔng hunaa takta bhɛa bhonsanɛa mɛnɛngiya jɔsɛna birinyaye, ibhigi Bhaulos ko Silasi na tuguru tu kɛngɔ na ayɛsɛ gulsachina orony na kighinitɔ. 20 Na hunaa ajjɛaye, seyɛsɛ, “Ngazukta a zuga Ayhudhi. Na hoyɛy butomo na bhori ba. 21 Na madhtɛsɛ zugo kera kullɛna bhɛa zuga Rome ngakemesoo.”

22 Na zugo tɔrtɛ na bandɛsɛ Bhaulos ko Silasi. Na gulsachina ayɛ zugo lɔgɔ na kubhuruyta ruminyaa gɛ na kadhagatɔ. 23 Na hunaa dhakta goore na tewa ushaye, aytɛ doraa chibinuny. Na yɔk gulsachina madhtɛsɛ hira bhɛkka doraa chibinuny na kɛbhɛk shɛɛ. 24 Na hiraa bhɛginɛna hunaa kàmadhtɛsɛa lɔgɔ na tewa ushaye, ɔgɛ surr ghohigiye toye. Na arabhanu jagara gɛ na chɛbu kɛna kìchibɛa zugo gig gig.

25 Na hunaa senno kete bar kɛngɔye Bhaulos ko Silasi dha bere yɔk allinɛ ko Tumu na eterrisanɛ yello. Na yɔk zuga kìchibbo ko yɔk kari chirarnɛyɔ. 26 Na ba chukiyaa dari dhogoni. Na ajjo ngani doraa chibinuny konyomɛ. Na doriyo tutugi oyɛ kumulɔng na gɔrgɔriya kìchibɛa zugo ɔktiya kumulɔng. 27 Na hira bhɛginɛna hunaa bansana ungge na orro doriyo tutugi hunde a onɛye, nɔng se wa zuga kìchibbo ngeyo na hɔrɔa masha na kɔgɔn rɛ. 28 Na arɛsɛ ꞉Bhaulosi wuy na sɛɛsɛ, “Agge kanno ngagiya kɛllo ngaya kumulɔngge! Na rɛ ngakɔdhi!”

29 Na hira bhɛginɛna kayɛsɛ go na ngeu doraa chibinuny ghohigiye toye, na bhariyu tik tik na tɔgɔdhɛsɛ Bhaulos ko Silasi kɔmma. 30 Na obhoniseo bho na sɛɛsɛ, “Ngazukta kachcho Tumuye! Hunde keni kàba lɔga ganyu gɛrsaye maya kemesi ɔng?”

31 Na yɔk seyɛsɛ, “Yɛbh Komoru Yesus. Na inye ko zuga gunyu batɔ.” 32 Na madhtɛsɛ nɔng ko zuga gɛnyɛ kumulɔng lɔga Komoruyny. 33 Na hunaa bho ngani anna barte, hira bhɛginɛna dhiganu na tonyu molo. Na nɔng ko zuga gɛnyɛ kumulɔng koo churtɛ. 34 Na dhiganu Bhaulos ko Silasi doraa nɛnɛ na abhanyisiu. Na nɔng ko zuga gɛnyɛ kumulɔng hinisi te hɔli ke ngaya yɛbhɛ Tumuye.

35 Na hunaa bho arsaye, gulsachinaa orony ege bholi bhɛa hira bhɛginɛna na keseyɛsɛ, “Kèe ngazuktonu ɔktayɔ.” 36 Na hira bhɛkka sɛɛsɛ Bhaulos, “Gulsachina wa ektoa bholi na igge kɔ̀ktagunggɔ. Na mɛa ago shɛɛ ke na bo challa.”

37 Na nɔng Bhaulos yagɛsɛ bholi na sɛɛsɛ, “Yɔk agga bɔɔ ibhbheyɛa na dhakkiyɛa lɔgɔ kedhdha ninggɛn bhɛa bo zugo mɛra na hɛyeyɛa doraa chibinuny. Na mɛa se kɔktaiy dari sɛgɛn? Ngakihinoo ni! Agge kanno zuga Rome. Na sɛɛ kohoya ꞉yɔkku sabbiya gɛ na kɔktaiytɔ!”

38 Na bholi ago na yoktɛsɛ gulsachina. Na hunaa shikkɛa bhɛa Bhaulos ko Silasi anɛa zuga Romeye, dɛɛbɛyɛ. 39 Na hoya na seyɛsɛ, “Any kagarayɛ!” Na ɔkta doraa chibinuny na dhiganayɛ. Na tɔllɔsɛsɛ na kɔta ɔr na kagotɔ. 40 Na yɔk bhonda doraa chibinuny na ago doraa Ngalidiya. Na ngonu itinynyandɛ ko zuga yɛbhbhɛa Yesus na iriy sɛgɛn. Na koo ago.