Act 17 | SuqSC | STEP | Na Bhaulos ko Silasi dha Ambibholi ko Abholoniya na koo daga Tɛsɛlongke. Na ngonu dha bere lɔ doraa madhinɛnɛa zuga Ayhudhi lɔga Tumu.

Acts 17

Lɔga Ɛlɛa ꞉Bhaulosi Ko Silasi Tɛsɛlongkegiye

1 Na Bhaulos ko Silasi dha Ambibholi ko Abholoniya na koo daga Tɛsɛlongke. Na ngonu dha bere lɔ doraa madhinɛnɛa zuga Ayhudhi lɔga Tumu. 2 Na Kala Ayawsuny Bhaulos ogu huna dhaa nɛnɛ. Na tɛu ngonu arko sizzi dhɔng na kɔbhɛsɛ zugo lɔga ɛlla dadaba Tumu Kala Ayawsuny sɔng. 3 Nɔng dha dhugunɛsɛn lɔga bere kènno hira bɛrrana ꞉Tumu kɔ̀chɔllayɛ na ker na kabanay rɛsɛyɔ. Na sɛɛsɛ, “Ngahirra kèe Yesus kamadhdhagungge a hira bere bɛrrana ꞉Tumu.” 4 Na zugaa Ayhudhi shikkɛa ngalɔktonu gen yɛbhɛ na tɔrtɛ ko Bhaulos ko Silasi. Na ko yɔk zuga Giriki yɛbhbhɛa Tumu ko tɛrroa gulsachinaa orony ga bo mɛra yɛbhɛ ngalɔkta na tɔrtɛ ko yɔk kari.

5 Na yɔk zuga Ayhudhi gen hinisi ngɔ na mukta tɔliyoga ganggoye na yoktɛsɛ lɔgɔ na kobhori ɔr. Na haddi doraa Iyasoni na kibhigi Bhaulos ko Silasi na kayɛsɛ zugo. 6 Na ngani ngajɔanɛo. Na tuguru Iyason ko zuga yɛbhbhɛa Yesus gen na ayɛsɛ gulsachina orony. Na ara wuy na se, “Ngazukta bhorɛɛ ba kumulɔngge wa hoyaa ngaya sɛgɛn 7 na chɔɔ lammaa ꞉Iyasoni. Na yɔk kumulɔng marrɛ damiya komoruya Rome na sennɛ, ‘Komoruyte nayo kèe Yesus kona ihe.’” 8 Na zuga orony ko gulsachina hunaa shikkɛa ngalɔktaye, dɛbɛyɛ. 9 Na Iyason ko zugaa gina daga yekko na ɔkta.

Lɔga Ɛlɛa ꞉Bhaulosi Ko Silasi Beriyagiye

10 Na barɔ zuga yɛbhbhɛa Yesus ittono Bhaulos ko Silasi Beriyagiye ke tiri. Na hunaa dokkɛa ngonuye, ago doraa madhinɛnɛa zuga Ayhudhi lɔga Tumu. 11 Yɔk dha bere zuga Ayhudhi bhakkɛa Beriya gaɛ bho na jorronɛ ga bhakkɛa Tɛsɛlongke. Na chirara lɔga yokkono ꞉Bhaulosi shɛɛ na yɛbhɛ lɔga Yesusi ke na bo challa. Na yɔk tii tii marakkɛ lɔga Tumu ɛlla dadabɔ na kataktɛ lɔga Bhaulosi hunde a dhereye. 12 Na bhɛa nɛ yɔk zuga Ayhudhi yɛbhbhanɛa Yesus te mɛri. Na ko yɔk zuga Giriki bo mɛra toynɛna kàggaa, ga ngaha ko ga maya kari, yɛbhɛ Yesus.

13 Na zugaa gina ku Ayhudh bhakkɛa Tɛsɛlongke hunaa takta hunde Bhaulos madhinɛnɛ lɔga Tumu Beriyagiyeye, ago ngonu na kɔnkɔnɔ zugo na bhori ba sɛgɛn. 14 Na zuga yɛbhbhɛa Yesus ɛlla ngonu koo yoktɛsɛ Bhaulos ke tiri na ittono chɔɔ yirisi tugɔ. Na Silasi ko Timotiyos yɔk dhɔttɛ Beriyagiye ngonu. 15 Na zugaa dhiyɛa ko Bhaulos ago chɔɔ Atena. Na aynɛ ꞉Bhaulosi lɔkte sennɛ, “Silasi ko Timotiyos sɛɛ kohoya ke tiri na kasaanydɔ.” Na yɔk yaga lɔgɔ Beriyagiye.

Lɔga Ihɛa ꞉Bhaulosi Atenagiye

16 Na nɔng hunaa renɛna Atenagiyeye, aru ahaa ibhbhɛa ꞉zugu ke barari ɔr toye hunde a mɛriye na kuloya nɛnɛ munyuu goore. 17 Na koo ogo doraa madhinɛnɛa zuga Ayhudhi lɔga Tumu na kɔbhɛsɛ zuga Ayhudhi ko zuga Giriki yɛbhbhɛa Tumu lɔga Yesusi. Nɔng kali kali hunde itinynyannɛ ko zugo tu kɛngɔye, taa kɔbhɛsɛna nganga. 18 Na kali kona zuga marakkɛa lɔgɔ hoya kimsite kèe Isito ko inde kèe Ebikoros na assa nɔng na ɛkkɛnyandɛ. Na gena se, “Dha ngatugɔdhɔrɔgɔsayta se kese ɛnɛng wa?” Na yɔk gena shigi nɔng hunde madhɛsɛn kamannaa bansanɛa ꞉Yesusi rɛsɛyɔye, na se, “Heo hira yokkono lɔga tumoa ngani chaga na senno kìbhigi ke barari so ka?” 19 Na ibhigi Bhaulos na dhigana dhuma ojjɛa :zugu lɔgɔ kèe Ariyobagos. ^{▼▼Ariyobagos a sara dhuma ojjɛa :zugu lɔgɔ Atenagiye dheyyɔ.} Na seyɛsɛ, “Ngalɔkta ngani chak madhdhagiy ꞉inyoye, kènno katakto hologun. 20 Inye annaa bɔɔ yokkogiy lɔga ngani chaga kɛ̀dɛɛsɛa. Na maya dhugunnogiy hologun shɛɛ na kaggaoyɔ.” 21 Yɔk zuga bhakkɛa Atena kumulɔng ko zuga honynyo ori genne bhakkɛa ngonu dha bere kali kali yɔk ɛl bay ngonu na shikkanɛ lɔga ngani chaga na mɛzzɛɛ ngalɔktonu sɔng. Lɔkte messɛ ꞉yɔkku gena ninggɛ.

22 Na nɔng Bhaulos chilu dhumɔ na sɛɛsɛ, “Zuga Atenaye! Hunde anno zuga lɔmmo ahaa ibhbho goore ke barariye, wa katagga. 23 Chɔɔ bare kowoyɛi ɔra nu toye, na kugunyi ngawunyaa uddulɛsɛna tumoa gu go. Na ngawu konnɔ karra lɔkte sennɛ, ‘Ngaya a ngawua kùddulɛsɛna Tumua Kìmaga go.’ Na mɛa ngatumuya imaggo na eterrisannoye keni kùdhugunogung lɔga gɛnyɛ na tagatɔ.

24 “Nɔng a Tumua bere ghendono ba ko ngaahaya ɛl bayte kumulɔng. Na a Komoruya tumony ko bany. Na nɔng doraa barara ghendonɛa ꞉zugu, toye ngabhakko. 25 Anna ajjɛa zugo bassey kumulɔng ko hɔngay ko ahaye lɔmmɛye bhoy. Na anna zugo ngaɛanɛayo ke ngaya lɔmɛ aha kumulɔngge. 26 Na nɔng bhɛla bhorinya kumulɔng bhɛa hira dhɔnɛna. Na aynɛ oynyaa bhagɛa ba ko hana bhakkɛa. 27 Na bhee mesɛ ngangaye, a bhɛa kènno zugo kamaraktɛ ba na kalamiyo na kako ale kɔjɔya nɔng. Na nɔng kɛ̀l kari ko agge. Rɛna ngaiho. 28 Na agge ngaya kɔ̀jɔanɛ bassey na kòwoɛ na kɛlɛ tunɔye, kàbhagɛ nɔng. Ngalɔkta heo ko ga bere yokkonɛa ꞉zuga gu ojjɛa yello na sennɛa, ‘Agge kumulɔng kan hoyaa gɛnyɛ.’

29 “Na mɛa agge hunde kan hoyaa Tumuye, maya lɔgɔ ngakɛsɛdhdho na keseyo Tumu hɛ ko galiya ghendonɛa ꞉zugu nanimoa nɛ ko ghurghurtina nɛ worginyaye oo tomokke oo bɛnne. 30 Nɔng bɛrgunyaa bere sabbune ngalɔkta huna zugo imaggɛa na messonɛa, Tumu annaa nyima. Na nɔng mɛa ajjɛ zuga bhakkɛa ba kumulɔng lɔgɔ, na kujjugu lɔga gɛ gɛrsa, na kohoya gɔra nɛnɛ. 31 Nɔng anna lagunya bharraa unga ale kedhdhɛa lɔga zugony kumulɔng. Na ale ngakoleonu hira bere bɛrrana ꞉nɛa ken lɔgɔ dib. Yɔk ngalɔkta hunde a dhereye, annaa dhɔlɛsɛa zugo kumulɔng huna ibbaniseonɛa ngahirra bere bɛrranaye rɛsɛyɔ.”

32 Na yɔk hunaa shikkɛa lɔga hira bansana rɛsɛyɔye, gena bhɔsɔrɔ Bhaulos. Na yɔk gena se, “Ngalɔkta ale yogogiy sɛgɛn na kìshikto shɛɛ.” 33 Na Bhaulos dhɔyu zugo bhɛa mɛzziyɛa na ogo. 34 Na yɔk zug gena yɛbhɛ ngalɔkta yokkono ꞉Bhaulosiye, na tɔrɔ nɔng. Na bhɛa zuga yɛbhbhanɛa ngalɔkta, kona a hira kedhdho lɔgɔ Ariyobagosɔ kèe Donasiyos ko tɛrite kèe Dɛmaris ko zug gena.