Acts 18

Lɔga Ihɛa ꞉Bhaulosi Korontosɔ

1Na koo Bhaulos bana Atenagiye na ogo Korontosɔ. 2Na ngonu itinynyandɛ ko hira Ayhudhi bere hudhukkinya Bantosɔ kèe Akila. Nɔng ko tɛriya nɛnɛ Ngabhirsikila dha bɔɔ ngani hony Dhalɛnɔ, ke ngaya bere komoruya Rome kèe Kilawdi ajjɛ zuga Ayhudhi bhakkɛa Rome kumulɔng lɔgɔ na kɔta Rome na kɛzɛgɛte. Na nɔng Bhaulos ogo na kɔgɔny yɔk. 3Ko nɔng dha a naniya chigo dukuwachina hunde nɛye. Na tɛldi ko yɔk na mesigi zinggo kari. 4Na Kala Ayawsuny tii tii nɔng kɔ doraa madhinɛnɛa zuga Ayhudhi lɔga Tumu na madhɛsɛn zuga Ayhudhi ko ga Giriki lɔga Yesusi na kɔbhɛsɛn shɛɛ na ko yɔk kɛyɛbhɛtɔ.

5Na hunaa Silasi ko Timotiyos honynyo Mekedoniyagiyeye, Bhaulos dhɔyu zinggoa gɛnyɛ, na madhu zugo sɔng. Nɔng dha madh zuga Ayhudhi na kɔbhɛsɛn lɔga Yesusi na senɛsɛn, “Hira bere Bɛrrana ꞉Tumu a ꞉Yesusi.” 6Na yɔk tamara na dhɔmɔ nɔng. Na hunaa messɛa ngangaye, nɔng Bhaulos tibara ruma nɛnɛ na sɛɛsɛ, “Wa koyogogungngɔ na tamarto. Na ale hunde attiung ꞉Tumuye, any kattiyɛung lɔga sabbiya gu! Anye mɛa wa kuchurau sabba! Na anye kɔgɔdhdhanɛ mɛa, na kɔgɔ na koyogɛsɛn bhorinyaa anaa lɔga Yesusi!”

7Na bhona na ogu doraa hira kèe Tito Iyotos bhakka doraa madhinɛnɛa zuga Ayhudhi lɔga Tumu iho ngonu jaa. Nɔng dha a hira bhor konnuny kɔbhbha lɔga Tumu damiya zuga Ayhudhi. 8Na nɔng hira ku gulsaa doraa madhinɛnɛa zuga Ayhudhi lɔga Tumu kèe Keribhos ko zuga gɛnyɛ kumulɔng, yɛbhɛ Komoru Yesus. Na yɔk zuga Korontosi ga bo mɛra shigi lɔga yokkono ꞉Bhaulosi na ko yɔk yɛbhɛ na churtɛ.

9Na bar konnɔ Komoru yogɛsɛ Bhaulos lɔgɔ kunaɔ na sɛɛsɛ, “Bho ngaɛngɛrsi. Yogɛsɛ zugo lɔga ganyu hung. Laay ngaihi. 10Anye kɛ̀l kari ko inye. Na hirre mesiny hun kona ninggɛ ke ngaya ngaɔrra toye zuga ganyu anɛ mɛriye.” 11Na Bhaulos tɛu ngonu na madhu zugo lɔga Tumu oyo dhɔnɛ ko taginya illɛy.

12Na bɛrgua anɛa Galiyo gulsa Akayagiye, zuga Ayhudhi muktiyaa na bandɛsɛ Bhaulos na aytɛ doraa kègedhdhɛa lɔgɔ. 13Na se, “Ngahirra madhɛsɛn zugo lɔga keterrisanɛa Tumu na imaginɛna ko damiya na!”

14Na hunde chinyi ngani Bhaulos se koyogo lɔgɔye, Galiyo sɛɛsɛ yɔk, “Ngazukta Ayhudhiye! Ngalɔkta honyɛoye hunde kete lɔga kìtiranyɛungu oo kèmesɛungu gɛrrɛng, anda kichirarunggɔ. 15Na hunde igge dha ɛkkɛnyannɛnɛo lɔginyaye gu ko sara zugony ko lɔga damiya nuye, nɔng kedhdhigi ꞉iggeu sabbiya gu. Anye lɔkte ku nganga ngakegedhdhiyo.” 16Na obhonisiu doraa kedhdhɛa lɔgɔ. 17Na zuga ɛlla ngonu kumulɔng ibhigi gulsaa doraa madhinɛnɛa zuga Ayhudhi lɔga Tumu kèleo Sosoten na aytɛ na dhaga doraa kègedhdhɛa lɔgɔ ratagiye. Na nɔng Galiyo ngani ngatɔgiyo.

Lɔga Ngabhirsikila Ko Akila Ko Abholosi

18Na Bhaulos tɛu Korontosɔ unga bo mɛra. Na koo kendɛ ko gochonginya, na dhi ko Ngabhirsikila ko Akila ɔrre i yirisiyɔ tugɔ kèe Kinkira. Na hunaa ɛlla ngonuye, nɔng Bhaulos yɛsa sabba ke ngaya lɔga bere bhiigɛsɛna ꞉nɛa Tumu bhugnyɛsɛnɛye. Na koo ago Soriyagiye gonggulɔ. 19Na hunaa dokkɛa Ebhesonde, nɔng dhɔyu Ngabhirsikila ko Akila na ogu doraa madhinɛnɛa zuga Ayhudhi lɔga Tumu na kɔbhɛsɛ zuga Ayhudhi lɔga Yesusi na mɛzziyo. 20Na yɔk tɔllɔsɛsɛ, na kɛtɛldi ko yɔk ungge mɛri. Na nɔng tamaru. 21Na hunaa kennɛnaye, nɔng sɛɛsɛ, “Hunde se Tumuye, ale kowokkondɔ.” Na nɔng bana Ebhesonɔ gonggulɔ na ogo. 22Na hunaa dokko Kesariyaye, bhona na irrɔgɛsɛ Yerusalem na gɔnyu zuga yɛbhbhɛa Yesus ɛlla ngonu. Na hunaa gɔnya na tewa ushaye, bana na shidhɛ Ansokiyagiye.

23Na hunaa tɛwa Ansokiyagiye ungge muchugiye, bana na tɔu oriya ɛlla Galatiyagiye ko Bhirgiyagiye, na iriyu zuga yɛbhbhɛa Yesus ngonu kumulɔng.

24Na yɔk hunaa Ngabhirsikila ko Akila ngani ɛlla Ebhesonɔye, kali kona hira Ayhudhi bere hudhukkinyana Iskindiriyagiye kèe Abholos ko. Nɔng dha bere a hira kàmadha goore na Lɔga Tumu kɔ̀gɔdhdhɛsɛna dadabɔ gaa shɛɛ. 25Bere kàmadha lɔga ganggua Komoruyny, na madhɛsɛn zugo lɔga Yesusi surr hinisɔ toye dib. Nɔng dha bere ga lɔga churaa Yohanisi sɔng. 26Na ogo doraa madhinɛnɛa zuga Ayhudhi lɔga Tumu na madhɛsɛ zugo lɔga Yesusi dhɛ dhɛ hung. Na hunaa Ngabhirsikila ko Akila shikkɛaye, dhigana doraa nɛ na tɔrtɛ lɔk gena na kɔbhtɛsɛ ganggua Tumu na katak shɛɛ.

27Na hunaa Abholos tɛhɛnna bhɛa senno kɔgɛ Akayagiyeye, gochonginya iriyi na tɔgɔndɛsɛ zuga yɛbhbhɛa Yesus ɛlla Akayagiye dadab, na kɔtɔlɔmɔ shɛɛ. Na hunaa kɔa na dokko ngonuye, ɛa zuga bere chirbhiseo ꞉Tumu na yɛbhbhɛa lɔga Yesusi goore. 28Na koo ɛkkɛnyandɛy ko zuga Ayhudhi bhɛa Yesus anɛa hira bere bɛrrana ꞉Tumu tu kɛngɔ na nɔng toyɛɛsɛ Lɔga Tumu, na dhugunɛsɛ shɛɛ.