Act 19 | SuqSC | STEP | Na huna Abholos iho Korontosɔ, nɔng Bhaulos tɔu oriya ɛlla Galatiyagiye ko Bhirgiyagiye na ogu Ebhesonɔ. Na koo ngonu itinynyandɛ ko zuga yɛbhbhɛa Yesus gen.

Acts 19

Lɔga Ihɛa ꞉Bhaulosi Ebhesonɔ

1 Na huna Abholos iho Korontosɔ, nɔng Bhaulos tɔu oriya ɛlla Galatiyagiye ko Bhirgiyagiye na ogu Ebhesonɔ. Na koo ngonu itinynyandɛ ko zuga yɛbhbhɛa Yesus gen. 2 Na ghinu na sɛɛsɛ, “Huna bere yɛbhbhano Yesus, Kuloya Tumu bere ɔgaungngɔ?”

Na yɔk seyɛsɛ, “Agge chɔɔ Kuloya Tumu hunde iheye, ngani kìshiktoyo.”

3 Na sɛɛsɛ ꞉Bhaulosi, “Na bere kùchurrong churate ku ɛnɛng?”

Na yɔk seyɛsɛ, “Kùchurrey damiya bere madhɛiy ꞉Yohanisi.”

4 Na nɔng sɛɛsɛ, “Nɔng churaa Yohanisi bere anna churaa kùjjugɛa lɔga gɛrsa. Na chɔɔ Yohanis bere yogɛsɛna zugo lɔgɔ na kɛyɛbhɛ hirre ale kɔbhbhana nɔngge. Nɔng dha bere ngahirronu a ꞉Yesusi.” 5 Na hunaa shikkɛa ngalɔktaye, churtɛ sara Komoru Yesusi. 6 Na nɔng Bhaulos tadhɛ yɔk siyɔ na ngɔɛsɛ ꞉Kuloya Tumu na mɛzzi tugiya imaggɛa na yokto lɔga yogɛsɛna ꞉Tumu. 7 Na yɔk ngazuktonu kumulɔng dha bere a tɔmmɔn ko ramman.

8 Na nɔng Bhaulos tɛu ngonu taginya sizzi na kali kali ogo doraa madhinɛnɛa zuga Ayhudhi lɔga Tumu na madhɛsɛ dib na dhugunɛsɛ bhɛa lɔmɛa ꞉Tumu zugo haalɛ na ko yɔk kɛyɛbhɛtɔ. 9 Na yɔk gen tamara na ngani ngayɛbhbhɛo. Na ojjigi lɔga Ganggua Yesusi ke gɛrsi na dhɔmɔ bhɛa sɛrɔ ɔdhdha. Na nɔng Bhaulos koo eliu zuga yɛbhbhɛa Yesus na gaa marrɛa dhɔyu. Na dhiganu gaa yɛbhbhɛa Yesus doraa kàmadhɛa zugo bhɔa kèe Tiranos na madhu ngonu kali kali. 10 Na Bhaulos madhu zugo ngadamita oynya ramman. Na zuga Ayhudhi ko bhorinya gen, ga bhakkɛa baa kènno Isiya kumulɔng, shigi lɔga Komoruyny.

11 Nɔng Tumu dha bere ajjɛ Bhaulos barartin na me lɔga bo dhandala kìwacheo. 12 Na chɔɔ ruma kìdharɛa nɔng hunde kɛ̀hɛyɛ na kidharɛ zuga ilagassɛaye, bassɛ na mɛnɛnga bhonsanɛyɔ.

13 Na yɔk zuga Ayhudhi bere woyɛa na obhoniseonɛa mɛnɛnga bhɛa zugony ko yɔk gen se killobo bhɛa kobhonisionɛa mɛnɛnga sara Komoru Yesusi. Na se, “Ngasarra Yesusi madhinɛnɛ ꞉Bhaulosiye kesennagung bhonda!” 14 Nɔng bhɛa gɔldangɛa bibiyo Ayhudhi kona na kèleo Asekiya lusa gɛnyɛ ku issabbay ko yɔk dha bere messɛ nganga. 15 Na hunaa messɛa ngangaye, kali kona sɛɛsɛ ꞉mɛnɛngiyɔ, “Anye Yesus kaggayɔ. Bhaulos kaggayɔ. Na igge anno giyong?” 16 Na hira lɔmma mɛnɛngi banɛsɛ yɔk na dhagu ko bhee kalgalɛ na te ɔnnɛ. Na bhonda dorigiye ngaulo na jarayɛ.

17 Na yɔk zuga Ayhudhi ko ga Giriki bhakkɛa Ebheson hunaa shikkɛa ngalɔktaye, tɛngɛrɛ kumulɔng na sara Komoru Yesusi te ga bo kàggaa goore. 18 Na bhɛa zuga ngani yɛbhbhanɛa Yesus ga mɛra ko yɔk hoya na yoktɛsɛ zugo lɔga gɛ gɛrsa bere messɛa na kujjugutɔ. 19 Na zuga kunassɛa bere dokkɛa ꞉zugu yɔk mukta dadabinyaa gɛ imilanɛa zugo na hoyɛy na shɔktɛ go. Nɔng dha hunde kɛlɛhɛn dadabinyaa gɛ ko birinyaye, a shiinyaa mɛra hɛtta ko chɔra sabba. ^{▼▼Tuga Giriki se, “...birinyaa ku tomoga hɔla gee ku shiinya zugo ramman ko tɔmmɔn (50,000).” Yɔk ngabirinyaonu hɛ ko birinyaa messono ꞉hirre dhɔnɛ zinggoye oynya zugo issey.} 20 Na nɔng Tumu dhɔlɛsɛ zugo barartina nɛnɛ na lɔga gɛnyɛ tɛhɛtɛy ko ba na yɛbhɛ ꞉zukte mɛri.

21 Na ngalɔkta kumulɔng hunaa tewa ushaye, nɔng Bhaulos hinisɔ ɛsɛdhu bhɛa senno kadhayɛ Mekedoniya ko Akaya na kɔgɛ Yerusalemɔ. Na seu, “Hunde kodogi ngonuye, maya kugunyi Rome.” 22 Na ibha Timotiyos ko Irato, zuga ɛanɛa nɔng, na egu Mekedoniyagiye. Na nɔng tɛa Isiyagiye ungge muchugi.

Lɔga Ɛrrinyana Ebhesonɔ

23 Na ngakaldonu lɔga Ganggua Yesusi ɛrtiyaa Ebhesonɔ. 24 Na lɔkte ɛrrinyanɛ ꞉lɔkkuye a ngagiya. Dha bere lɔ hirre kèe Dimitiro dhɛdhɛ tomoga hɔla. Na koo dhɛdhɛa gala ɛlɛhɛnɛsɛna doraa Ngaartemisi ^{▼▼Ngaartemis a tumua ngaha yɛbhbhɛa :zuga Ebhesoni. Na bhɛa nɛ a tumua ajjɛa yɔk erro.} barara. Na nɔng ko bɛkanyaa gɛnyɛ yɔk bhɛa anɛa nana jɔanɛ birinyaa mɛra dhogoni. 25 Na nɔng koo muga bɛkanyaa gɛnyɛ dhɛdhɛyɛa tomoga ku nana gen na sɛɛsɛ, “Ngazukta, agge hunde ahaa mɛra kɔjɔana ngazinggoaye, gaoyɔ. 26 Nɔng ngahirra kèe Bhaulose hunde dha bɔɔ madh zuga mɛra Ebhesonɔ ko ga bhakkɛa oriya Isiya kumulɔngge, a nganda shikkano nyabha na orrono chɔɔ kawarreye. Nɔng tab zugo na senɛsɛn, ‘Ahaa ghendonɛa ꞉zugu sɛnɛ, barari ngayo.’ 27 Na zugo ale kɛɛ zinggoa ga. Chɔɔ zinggo sɔng ngakɛyɛo. Doraa Ngaartemisi bo challa barara dhɔngngɛa ꞉zugu Isiyagiye ko ba kumulɔng ko nɔng ale dhɔttɛ na dirama Ngaartemisi garasɔ.”

28 Na hunaa zugo shikkɛa ngalɔktaye, dɛbɛ na ara wuy na se, “Ngaartemisa zuga Ebhesoni anna bo kàggaa!” 29 Na ɔr toye ba te gɛrsi kumulɔng. Na zuga dhɛanɛa ko Bhaulos Mekedoniyagiye kèleo Gayos ko Artiroko ibhigi ꞉zugu na tuguru na ngeyɛ doraa ojjɛa lɔgɔ iho ɔr kɛngɔ. 30 Na ko nɔng Bhaulos se kassa yɔk. Na taganydɛ ꞉zuga yɛbhbhɛa Yesus. 31 Na chɔɔ bɛkanyaa Bhaulosi ku gulsachina Isiya gen ege hiri na kɔtɔllɔhɛsɛ nɔng na doraa ojjɛa lɔgɔ ngakɔ.

32 Dha bere zugo yɔk bholollɛ na jajagɛɛ goore. Na chɔɔ ga mɛra hunde dha bere muginɛnɛ lɔk giyongge, imaggɛyɔ. Hunde kona yokkono genaye, nɔng kona yok gen. 33 Na yɔk zuga Ayhudhi ugundɛsɛ hirre kèe Iskindir bhɛa zugony sabbɔ na kudhugunɛsɛ zugo ngalɔkta bhɛa ku hologun shɛɛ. Na nɔng Iskindir koo lamu zugo siyɔ na kidhitɛ na koyogo lɔgɔ. 34 Na yɔk hunaa takta Iskindir hunde a hira Ayhudhiye, ara wuy satinya ramman kumulɔng na se, “Ngaartemisa zuga Ebhesoni anna bo kàggaa!”

35 Na wurtɔ nɔng gulsaa orony yogɛsɛ zugo lɔgɔ na kidhitɛyɔ. Na seu, “Zuga Ebhesoniye! Doraa Ngaartemisi barara ko galiya kɛlɛhɛnɛsɛna bere ngɔana tumɔ kɛbhɛk ꞉aggeu zuga Ebhesoni. Na ba kumulɔng hirre imag ngalɔkta ninggɛ. 36 Na mɛa hunde hirre kɛngana ngalɔkta ninggɛye, lɔgɔ ngajajagisɛno. Tɛldi laay na lɔkte gɛrsi ngamesso. 37 Na igge dhigandao ngazukta ahaa doraa barara ngani kogoroto na sara tumua na Ngaartemisi ngani kɔdhɔmɔtoye kɛ ɔng? 38 Hunde Dimitiro ko bɛkanyaa gɛnyɛ ku nana lɔ hirre se kichildɛye, unga kègedhdhɛa lɔgɔ ko zuga kedhdhɛa lɔgɔ ɛllɛ. Na sɛɛ kɛkkɛnyandɛ ko yɔk ngonu. 39 Na hunde lɔmmo lɔk genaye, maya kègen bhɛa zuga gayɛa damiya Rome. 40 Na hunde zugo ale kichildɛiy ngalɔkta wa ɛrrinya mɛaye na kako keseyagiy, ‘Ngalɔkta messonɛ ꞉yɔkku,’ bhee ku hologun kàyagɛsɛn ꞉aggeu ninggɛ. Lɔkte kɛngɛrsi ꞉anyoye a ngagiya.” 41 Na hunaa yogoa ngalɔkta na tewa ushaye, yagɛsɛ zugaa muginɛna na bhassayɛ.