Act 2 | SuqSC | STEP | Na kala ammɛa ꞉zugu gibiriya kènno Bhenteko, zuga yɛbhbhɛa Yesus tɛldi bhee dhɔnɛ.

Acts 2

Lɔga Zuga Yɛbhbhɛa Yesus Ngɔsɛna ꞉Kuloya Tumu

1 Na kala ammɛa ꞉zugu gibiriya kènno Bhenteko, ^{▼▼Hunde unga dheshshanɛa gibiriya kèe Basika te ungo zugo ramman ko tɔmmɔnde, zugo ammɛ gibiriya kènno Bhenteko. Na Bhenteko a gibiriya dɛlɛa ꞉zugu kolea suniyɛa liwa.} zuga yɛbhbhɛa Yesus tɛldi bhee dhɔnɛ. 2 Na galiya bo hɛtta ko huroya ɔnnɛna rɔga na ko tumɔ dari ke tiri na munya yɔk dorigiye toye. 3 Na argi gala bo mɛra hɛtta ko kàyyiya ^{▼▼Ngaya ɛlɛhɛn kàya hiriny torɛa aha.} lɔmmɛa gochina waldɛa. Na ngɛrnyɛsɛ zugo hana ɛlɛa bhiy bhiy. 4 Na yɔk ɔgɛsɛ ꞉Kuloya Tumu kumulɔng. Na aynɛ yɔk bhɛa mɛzziyɛa tugiya imaggɛa na mɛzzi bhiy bhiy.

5 Nɔng dha bere Yerusalem lɔ zuga Ayhudhi yɛbhbhɛa Tumu mukkinyana ba kumulɔng. 6 Na hunaa shikkɛa mɛzziye, muktiyaa ke mɛri na iwachiyɛ ke ngaya shigɛ zugo hunde mɛzzɛɛ tugiya gɛ bhiy bhiyye. 7 Na dɛɛbɛ na ghindɛ kɛngɔ na se, “Ngazukta mɛzzɛɛ ngangaye, kumulɔng ngayo zuga Gelila? 8 Na yɔk hunde a ngagiya mɛzzɛɛ tugiya oriya ga bhiy bhiy ngangaye, dhaa tɔlɔ ɔng? 9 Agge kàn zuga kòhonynyo oree bhiy bhiy. Gena hony Bhartesɔ ko Medigiye ko Ilamɔ ko Mesetomɔ ko baa Yudha ko baa Kobhodo ko Bantosɔ ko baa Isiya 10 – 11 ko Bhirgiyagiye ko Bhimbiliyagiye ko baa Gibsi ko Keritɔ ko Arabɔ, na gena kàn zuga kàbhakka Libiya gɔra Kerena jaa na gen kàn kɔmɔna kòhonynyo Romegiye ku zuga Ayhudhi ko bhorinya gen ga bere yɛbhbhɛa Damiya Tumu bere kàjjɛa Muse kari. Na agge hunde kìshigi ngazukta Gelilaye hunde mɛzzɛɛ tugiya ga bhiy bhiy na yokkonɛ lɔga bo kìwacheo messo ꞉Tumuye, dhaa tɔlɔ ɔng?” 12 Na rɛgɛ ꞉lɔkku kumulɔng na iwachiyɛ na se, “Na ngalɔkta dha a lɔkte ku ɛnɛng?”

13 Na yɔk gena chɛktɛ na se, “Dhaa irgi chuttay na dhuttiyo ka so!”

Kala Yokkonɛa ꞉Betirosi Lɔgɔ

14 Na koo Betiros chili ko zuga bere bɛrrana ꞉Yesusi ku tɔmmɔn ko dhɔnɛ na yogɛsɛ zugo lɔgɔ goore na sɛɛsɛ, “Zuga ganyu Ayhudhi ko ga bhakko Yerusalembe, ga shiktonyuyɔ! Na kùdhugunogung ngalɔkta chirarroye hologun na tagatɔ! 15 Ngadamita senɛo ꞉iggeuye, ngazukta ngadutɛɛyo. Bho ngani a bhorre na chɔɔ satinya ngani a sizzi sɔng. 16 Yɔk ngalɔkta a lɔga senno kubhugnyɛsɛ bere yokkono ꞉hira yogɛsɛna zugo lɔga dhugunono ꞉Tumu kènno Iyoel na senno,
17 “‘Tumu se nganga,
Unga ale wurtune Kuloya nanu ale kajjɛ zugo kumulɔng.
Na erroa gu maya ko ga ngaha yogɛsɛnɛ zugo lɔga koyokkoni ꞉anyo.
Na karua gu ale orrɛ lɔga kajjɛi ꞉anyo huna kunauny. ^{▼▼Ngakunaya a kunaa kòrro hunde ngani kùtungitoye.}
Na bara gu kunasɛɛnɛ lɔga kajjɛi ꞉anyo.
18 Na chɔɔ ngakoleonu zuga ngaha ko ga maya kachanyɛa anye
ale kajjɛ kuloya nanu
na ko yɔk yogɛsɛnɛ zugo lɔga koyokkoni ꞉anyo.
19 Na ale kɔdhɔlɛsɛn zugo lɔga bo kìwacheo tumɔ,
na bay kɔdhɔlɛsɛn lɔga bo barara.
Na ba lɔ kɔdhdha ko go ko bhurreya bo kɔrra.
20 Na hunde kolea Komoruyny bo dhandala dhɔllanɛa diram ngani kugoye,
ale su dhittana na ba a mugur.
Na tagi bhɔdhinɛ ke nyawa.
21 Na ale zuga eliyɛa sara Komoruyny kumulɔng
yɔk bassɛyɔ.’

22 “Na mɛa zuga Isirayeliye, ga chirara ngalɔkta! Tumu anna bɔɔ ekkono Yesusa Nazireti na ajjɛa lɔgɔ na keme lɔga bo dhandala barara bhɛa nu na iwachi na taga hunde a hira ekkono ꞉Tumuye. Yɔk ngalɔkta kumulɔng hunde a dhereye, igge gaoyɔ. 23 Nɔng a hira bere ajjungu ꞉Tumu damiya bere gaana ꞉nɛa na ɛsɛdhdhana sabbɔ. Na igge ko zuga marrɛa Tumu annaa ɛsɛdhto lɔgɔ na ilakto na dhaktɛsɛo sɛnɔ ko jagarɛ muddɛn na erra. 24 Na Tumu nɔng mɔgu ɔnneya rɛsɛuny na ibbaniseo Yesus rɛsɛyɔ. Na rɛsɛ bhɛa senno kɔmɔgɛ Yesus ngani ngaɔanao dhul. 25 Ko nɔng Dawiy annaa bere yokko ngalɔkta Yesusiye na senno,
“‘Bere karra Komoru hunde kɛllo kari kali kaliye.
Na hunde kodokkon lɔkte dhandaliye bho ngakɛngɛrsiyo
ke ngaya kɛlɛo kari ^{▼▼Tuga Giriki se, “...ke ngaya ihɛ bhɛa nanu sɛtɛnde.”} na irishɛanyde.
26 Na mɛa hinisa nanu i ke na bo hɔla na kɛdɛli goore.
Na kabhagi ba na hini ngakegedhdhiyo
27 ke ngaya ale igingey ngadhɔtaganyo
na Hira Nunu Kullɛna Ridhing Ningginɛna mujjusey ale ngaoddɛsɛnoye.
28 Na inye bɔɔ dhɔlaganyɔ ganggua basseyny
na hini hɔllany goore ke ngaya kɛlɛ kari tii tiiye.’

29 “Ngagochonginyaa ganydeye, ga kòyokkogung lɔga bere rɛsɛa :kokonga na Dawiy dib. Nɔng bere rɛsa na kɔ̀bhɔkka na igingeya nɛnɛ ko mɛa toye a nganda i ngayaye. 30 Na Dawiy bere anna hira yogɛsɛna zugo lɔga dhugunono ꞉Tumu na gaa lɔga bere bhiigɛsɛna ꞉Tumu sennɛa, ‘Ale kibhbhan ashaya nunu kona na kajjɛ buyn na a komoruya lɔmma zugo hunde nunde.’ 31 Na tagu lɔga ale bhugɛsɛna ꞉Tumu na yogɛsɛ zugo bhɛa ale rɛa ngahirronu kɛ̀bɛrranaye igingeyɔ ngadhɔynɛnɛayo na mujjusɛayo ke ngaya bansanɛ rɛsɛyɔye. 32 Na Tumu nɔng bɔɔ ibbanisiyoa Yesus rɛsɛyɔ. Na agge kumulɔng kanno zuga bɔɔ korrono ngalɔkta kawarre. 33 Na nɔng annaa kàytɛa tumɔ na tɛwa bhɛa Tumu sɛtɛn. Na aynɛ ꞉Tumu Kuloya Nɛnɛ damiya bere bhiigɛsɛna lɔgɔ na ko nɔng Yesus ayiy agge. Na ngalɔktonu a ngagiya shikkano nyabha na orrono kawarreye. 34 – 35 Dawiy nɔng tumɔ ngani kokko. Na annaa kɔdhdhɛsɛna lɔgɔ dadab na senno,
“‘Tumu annaa senɛsɛna Komoruya nanu, ^{▼▼Ngaya se “Komoruya nanuye,” ɛlɛhɛn hira bɛrrana ꞉Tumu kèe Yesus.}
“Anye ko bhee koddogɛsɛn mirɔga gunyu ba,
tɛ siyɔ sɛtɛna nanu.”’

36 “Na mɛa zuga Isirayeli kumulɔng taga shɛɛ! Ngahirra bɔɔ ilakko ꞉iggeu kèe Yesuse, annaa bere bɛrrana ꞉Tumu na kete Komoruya nu.”

37 Na koo zugo hunaa shikkɛa ngalɔktaye, kɛngi bhɔttɛ na seyɛsɛ Betiros ko zuga ekko ꞉Yesusi, “Gochonginyaye, na mɛa senno kèmesso ɔng?”

38 Na sɛɛsɛ ꞉Betirosi, “Ujjugu lɔga gu gɛrsa na churtɛ sara Yesusi kumulɔng. Na ko nɔng Tumu kujjuk lɔga gu gɛrsa na kaung Kuloya Nɛnɛ. 39 Na ngalɔkta bhiikkagung ꞉Komoruya na Tumuye, bhiikkagung igge ko erroa gu ko ashaa gu ko zuga ɛlla rɛna ko zuga ale eleono ꞉nɛa kumulɔng.”

40 Na madhɛsɛ lɔkte mɛri na ibbayu. Na tɔllɔhɛsɛ na sɛɛsɛ, “Ibbaysi rɛhiya gu bhɛa ngatenyda mesɛ lɔga gɛrsaye!” 41 Na zuga yɛbhbhɛa lɔgaa madhɛsɛna yɔk churtɛ ma. Na ngakaldonu zukte aynde ku 3,000 yɛbhɛ ngalɔkta na tɔrɔ ga bere yɛbhbhanɛa Yesus sabbɔ.

Lɔga Ibhinɛnɛa ꞉Zuga Yɛbhbhɛa Yesus Hinise Dhɔnɛ

42 Na yɔk muktiyaa na muldɛ na alliyɛ ko Tumu hinise dhɔnɛ na chirara lɔga madhɛsɛnɛa ꞉zuga ekko ꞉Yesusi na mɛdhta kali kali. 43 Na yɔk zuga ekko ꞉Yesusi mesigi lɔga bo dhandala barara kìwacheo gee mɛri na zugo kumulɔng dhɔngɔ Tumu. 44 Na zuga yɛbhbhɛa Yesus bere bhakkɛa ke dhɔnɛ na ahaa gɛ kumulɔng gunynyɛa ke dhɔnɛ. 45 Na gee lɔmmɛ aha na talnɛnɛye birinyaa tallanɛa ngɛrɛsɛnɛ gee chɔllanɛye. 46 Na dha taa mukkinya na ɛl doraa Tumu barara tu kɛngɔ kali kali. Na hɛ doriyoa gɛ na mulnɛ ke ga bo hinisi hɔla 47 na eterrisanɛ Tumu. Na tɛhɛnɛ ꞉zugu kumulɔng. Na kali kali Tumu ibbaysiu zugo lɔga gɛ gɛrsa na lamma na tɔrɔ yɔk.