Act 20 | SuqSC | STEP | Na lɔgɔ hunaa ɛrtiyaa na tewa ushaye, Bhaulos muga zuga yɛbhbhɛa Yesus na madhu na iriyu. Na kendɛ na nɔng ogu Mekedoniyagiye.

Acts 20

Lɔga Dhoyɛa ꞉Bhaulosi Mekedoniya Ko Girik

1 Na lɔgɔ hunaa ɛrtiyaa na tewa ushaye, Bhaulos muga zuga yɛbhbhɛa Yesus na madhu na iriyu. Na kendɛ na nɔng ogu Mekedoniyagiye. 2 Na dhau oriya ɛlla ngonu na madhɛsɛ zuga yɛbhbhɛa Yesus lɔgɔ gɔrɔ gɔrɔ na iriyu. Na koo ogu Girikɔ. 3 Na tɛu ngonu taginya sizzi. Na hunaa tɛhɛnna wochin na senno kok Soriyagiye gonggulɔye, shigu hunde zuga Ayhudhi dokkɛ go na kɔgɔdhɔte. Na ɛsɛdhu lɔgɔ na kawak na kadha Mekedoniya. 4 Yɔk zukte dha bere dhɛɛ ko nɔng kariye a eriya Bhirusi bere kunno Beriyagiye kènno Sobhatiri, ko zuga honynyo Tɛsɛlongkegiye kèleo Artiroko ko Sekondo, ko hira bere kunno Derbegiye kèleo Gayos ko zuga honynyo Isiyagiye kèleo Tikiko ko Tirobima, ko Timotiyos. 5 Na yɔk jɛmmɛ sabbɔ na reiy Torodhagiye. 6 Na hunaa kolea Gibiriya Kàmmɛa Lottayi tewa ushaye, agge kabandao Bhilibhisɔ gonggulɔ na kɔtɔyo ungo hayna yirisiyɔ na kassao yɔk Torodhagiye. Na kɛtɛldo ungo issabbay ngonu.

Lɔga Dhɔngnganɛa ꞉Bhaulosi Awtikis Rɛsɛyɔ

7 Na Kala Ayawsuny jhaynɔ, hunaa kumukkinyano na kènno kɛ̀ngɛrtay tila na kùssoye, nɔng Bhaulos madhɛsɛ zuga mukkinyana lɔgɔ dirr ko bhee bho anɛ bar kɛngɔ, ke ngaya bhorroyɔ se kɔgɛye. 8 Nɔng ngadoronu ku bɛ ramma bere kɛmɛzziyɛo ꞉aggeuye, kalkanyaa kèterinyo dha bere a mɛri. 9 Na nɔng tɛgayte kèe Awtikis dha bere i bhurbhurɔ. Na hunaa Bhaulos mɛzzeo lɔgɔ dirrte, nɔng Awtikis dhungu goore na aytɛ ꞉ungu. Na ngɔa doraa ku bɛ rammaya surr gamma ku sizzi na dhagu ba bay. Na hunde dhɔngnganɛ ꞉zuguye dhaa ere. 10 Na nɔng Bhaulos bhona na dhugumo na bou na seu, “Ngadɛɛsso! Wa yagaa hini.” 11 Na wagu dorigiye tundɔ na ngɛru tila na usigi ko zugo. Na mɛzzi ko bhee bho arsɛ na kendɛ. 12 Na yɔk zugo aytɛ tɛgayaa kibbayseo doraa nɛnɛ. Na yakta hinisi na dɛlɛ goore.

Lɔga Kennɛnɛa ꞉Bhaulosi Ko Zuga Ebhesoni Bibiyo Lɔmmɛa Zuga Yɛbhbhɛa Yesus,

13 Na koo damiyaa yokkogɛiy ꞉Bhaulosi agge kɛjɛmbo gonggulɔ sabbɔ na kerreyo Asosɔ. Nɔng Bhaulos se kɔtɔa jagariyɔ. Na agge kayto chɔɔ yirisi tugɔ na kabandao gonggulɔ. 14 Na koo hunaa kitinynyanɛno ko nɔng Asosɔye, kidhiyo gonggulɔ kari na kayto Mitilinɔ. 15 Na bhorroyɔ kayto gonggulɔ chɔɔ Kiyos jaa. Na kutunggo na bhorre kerreyo Samosɔ. Na kutunggo ungo dhɔnɛ na naa senno keteyɛ ramman kadakto Milita. 16 Nɔng dha bere Bhaulos se kadha Ebheson bhɔ na Isiyagiye dirr ngaihi. Ngosum na kuturbhan gibiriya kèe Bhenteko ^{▼▼Zuga Ayhudhi hunde ammɛ gibiriya kèe Basika na te ushaye, ɛl ungo zugo ramman ko tɔmmɔn na ammɛ ngagibirita kèe Bhentekoye.} iho Yerusalemɔ.

17 Na hunaa iho Militagiyeye, ego hiri na kok Ebhesonɔ na keli zuga bibiyo lɔmmɛa zuga yɛbhbhɛa Yesus ɛlla ngonu. 18 Na hunaa honyoye, sɛɛsɛ, “Anye ihineya bere kugunɛy Isiya ko mɛa toye, lɔga bere kabhagɛa ko igge hunde a ɛnɛngge, gaoyɔ. 19 Na huna bere kɔchɔllanɛnɛi lɔga dokkɛanyɛa ꞉zuga Ayhudhi go, annaa kalashshani rɛ na kagayi Komoru Tumu kedherre. 20 Na kamadhungngu lɔga challa irishshongɛa igge hana zugo mɛra ko doriyoa gu kari. Na lɔkte kɛmɛsi na kɔdhɔyi ninggɛ dhul. 21 Anna bere kamadhɛsɛni zuga Ayhudhi ko zuga Giriki lɔgɔ na kujjugu lɔga gɛ gɛrsa na kawakta gɔra Tumu na kɛyɛbhɛ Komoruya na Yesus.

22 “Na mɛa toye anye wa adhaganyɔ ꞉Kuloya Tumu lɔgɔ na kòk Yerusalemɔ. Na hunde kɔgɔ ngonu na kodokkon lɔk giyongge, kimagiyɔ. 23 Yɔk oree kɔgɔɛye kumulɔng hunde ale kìchibbony na kɔchɔllanɛnde Kuloya Tumu nɔng wa ibbayanyɔ. Gee kagga ꞉anyoye a ngagiya. 24 Lɔga bere ajjanyi ꞉Komoruyɔ Yesusi na kòyogɛsɛ zugo kamannaa Tumu challa chirbhisiny ko bhee kedheshshanɛ, ngakadasiiyo. Na chɔɔ hunde ko kadaga lɔkte gɛrsi, lɔgɔ ninggɛ.

25 “Na igge zuga bere kasanungu na kamadhdhagungngu lɔga ale lɔmɛiy ꞉Tumu, ale wurtɔ sɛgɛn ngani ngaorronyuo. 26 Na mɛa koyokkogung na tagatɔ. Hunde hir kona Tumu ngayɛbhi na kagar, hirre ghinnony anye ninggɛ. 27 Anna bere kudhugunogungɔ lɔga hinnogungu ꞉Tumu kumulɔng na lɔkte kɛmɛsɛung igge na kɔdhɔyi ninggɛ dhul. 28 Na igge bhɛgɛ rɛhiya gu. Na zuga bere ajjungu ꞉Kuloya Tumu iwo shɛɛ huna bea gu ikɔlnɛna ke ngaya bere udhuyɛ ꞉eriya Tumu nyawa na yakkanɛ ke zuga gɛnyɛye. 29 Nɔng anye kaggayɔ. Ale hunde kɔgɔye, zuga kɛngi gɛrsa zugo ngachirbhisiyɛayo hony huna yoyany na dhushshɛ zuga yɛbhbhɛa Yesus bhɛkko ꞉iggeu. 30 Na chɔɔ zuga gu gena ale bansanɛ na sɛchchɛ lɔga ku dhere na tabhbhɛ zuga yɛbhbhɛa Yesus na hɛyɛ ke gɛ. 31 Na mɛa igge bhɛgɛ rɛhi! Na katta lɔga bere kibbashɛungu na kamadhɛungu oynya sizzi kari bar ko kali kedherre.

32 “Na mɛa anye kɔdhɔttagung Tumu ko lɔga gɛnyɛ challa chirbhisiuny. Na ko igge kutuhong ꞉lɔga gɛnyɛ na tɛhɛyɛ ko zuga bere yɛbhbhɛa Yesus ridhing ningginɛna na ale sɛrɛyɛa lɔga bere kìbhiigɛsɛna yɔk. 33 Anye bere birinyaa zug gennuny oo worginya oo ruminya ngani kìchirkanno. 34 Huna bere kemesi zinggo ngasɛnda ganyde na kagay rɛa nanu ko zuga kɛllo kari, igge gaoyɔ. 35 Na agge maya keme zinggo goore na kɛ̀anɛ zuga tɔlgɔnya damiya bere kemesɛi ꞉anyo na kɔdhɔllagɛungu. Ga, kàgata lɔga bere yokkono ꞉Komoruyɔ Yesusi na sennɛa, ‘Hira ajjɛa hiri aha, bhɛa ngahirronu ajjɛ na kɔɛye, nɔng a tuhinɛ.’”

36 Na Bhaulos hunaa yogoa ngalɔkta na tewa ushaye, tɔgɔdhɔ ko zugo kɔmma na alliyɛ ko Tumu. 37 Na yɔk turgi kumulɔng na ibhigi Bhaulos gawulo na shɔmɔ na yaktɛ. 38 Yɔk dha bere lɔkte munyussɛ gooreye a ngaya wa senɛsɛn, “Ale wurtɔ sɛgɛn ngani ngaorronyuoye.” Na koo ittono chɔɔ bhɛa ihɛa :gonggulɔ.