Act 21 | SuqSC | STEP | Na hunaa kegennɛno ko yɔk na tewa ushaye, agge kayto gonggulɔ na kadakto Kos. Na bhorroyɔ kayto Rodhɔ. Na ngonu kabandao na kayto chɔɔ Bhatara.

Acts 21

Lɔga Kɔyɛa ꞉Bhaulosi Yerusalemɔ

1 Na hunaa kegennɛno ko yɔk na tewa ushaye, agge kayto gonggulɔ na kadakto Kos. ^{▼▼Tuga Giriki se, “...kayto dib chɔɔ Kos.”} Na bhorroyɔ kayto Rodhɔ. ^{▼▼Kos ko Rodh a oriya ɛlla baa lukkɛa :ma kɛrghɛnɔ.} Na ngonu kabandao na kayto chɔɔ Bhatara. 2 Na koo Bhataragiye kirrɔkto gonggula kɔa Bhinkegiye na kayto. 3 Na hunaa kadharɛsɛno Kobhorose, kɔdhɔtto siyɔ kangitɛn na kadhayo siyɔ sɛtɛn chɔɔ Soriya. Nɔng dha bere gonggula nayo se kujjuga aha Tirosɔ. Na ko agge kobhondao ngonu. 4 Na kitinynyandɛo ko zuga yɛbhbhɛa Yesus na kɛtɛldo ko yɔk ungo issabbay. Na yogɛsɛ ꞉Kuloya Tumu lɔgɔ na yoktɛsɛ Bhaulos na Yerusalemɔ ngakɔ. 5 Na hunaa kɛtɛldao ngonu bhee chinyiye, kabandao na kayto. Na yɔk zuga yɛbhbhɛa Yesus ko tɛrroa gɛ ko erroa gɛ kumulɔng ittondiy chɔɔ ɔr dhey bhɛa ku yirisi tugɔ. Na kɔgɔndo kɔmma ngonu na kalliyɛo ko Tumu. 6 Na hunaa kegennɛnoye, agge kirrɔkto gonggul na yɔk waga ɔra nɛ.

7 Na agge kabandao Tirosɔ na kayto na kadakto Bhitilima. Na kobhondao gonggulɔ na kissayeo ko gochonginya na kasaniyo ko yɔk ungo dhɔnɛ. 8 Na bhorroyɔ kabandao na kayto Kesariyagiye. Na kɔgɔnydo hira kèe Bhilibhos madhɛsɛna zugo kamannaa challa na kɛtɛldo doraa nɛnɛ. Yɔk bhɛa zuga bere kɛ̀bɛrrana Yerusalemɔ ku issabbay na kènno kɛya zuga ekko ꞉Yesusi, nɔng dha bere kona a Bhilibhos. 9 Na ngahirronu dha bere lɔ sedhdhee ku wush ngani kàgamato. Na yɔk ngasedhdheonu agga yokkɛa lɔga yogɛsɛna ꞉Tumu na ale bhugnyɛsɛnɛa.

10 Na hunaa kɛtɛldo ngonu ungge mɛriye, nɔng hira yogɛsɛna zugo lɔga dhugunono ꞉Tumu kèleo Agabhos shidhiyaa Yudhagiye. 11 Na assaiy agge na ɔgɛ gheneya Bhaulosi na chɛbɛ jagara gɛnyɛ ko sɛnɔ na seu, “Kuloya Tumu se, ‘Gulsachina Ayhudhi ɛlla Yerusalemɔ ale ibhbhɛ ɛnaa ngagheneyta na chibbɛ nganga na ajjɛ zuga bhora anaa.’”

12 Na hunaa kishikko ngalɔktaye, agge ko zuga bhakkɛa ngonu kalambo Bhaulos na Yerusalemɔ ngakɔ. 13 Na nɔng Bhaulos yagɛsɛ na sɛɛsɛ, “Wa tɔlɔ ɔng turto na bhɔtanyu kɛngɔye? Anye hunde se kɛ̀chɛbtɛany lɔga Komoru Yesusi Yerusalemɔye, kihi kɔk ko bhee kɛrɛsɛ.” 14 Na hunaa tamara lɔga kamadhɛsɛnoye, keseyo, “Any kete lɔkte sennana ꞉Komoruyɔye,” na agge kidhitɛo.

15 Na hunaa kɛtɛldo ngonu ungge muchugiye, kɛchɛbtɛo na kayto Yerusalemɔ. 16 Na zuga Kesariya yɛbhbhɛa Yesus gen kidhiyao kari na dhigandiy doraa Minasoni. Nɔng bhɛa zuga Kobhorosi bere yɛbhbhanɛa Yesus sabbɔ dha bere kona a Minason.

Lɔga Dogɛa ꞉Bhaulosi Yerusalem

17 Na hunaa kodokko Yerusalembe, lambaiy ꞉zuga yɛbhbhɛa Yesus hinisiya bo hɔla. 18 Na bhorre agge ko Bhaulos kayto na kɔgɔnydo Yaykob. Yɔk dha bere zuga bibiyo lɔmmɛa zuga yɛbhbhɛa Yesus mukkinya kumulɔng na ɛl ngonu. 19 Na nɔng Bhaulos issau na kɔbhɛsɛ lɔga bere messo ꞉Tumu kolea bere madhɛa zuga bhorinyaa anaa kumulɔng shɛɛ.

20 Na hunaa shikkɛa ngalɔktaye, eterrisana Tumu. Na koo seyɛsɛ Bhaulos, “Gochongnge, ga gɔnydɔ. Zuga Ayhudhi ngani yɛbhbhanɛa Tumu dha bɔɔ te shiinyaa bo mɛra. Na yɔk kumulɔng a zuga bhɛkkɛa Damiya Tumu bere kàjjɛa Muse shɛɛ na hinnɛa goore. 21 Na yɔk shigi lɔkte dha bɔɔ se madhɛsɛn zuga Ayhudhi bhakkɛa ko bhorinyaa anaa kumulɔng na kɔdhɔyɔ Damiya Tumu bere kàjjɛa Muse na erroa gɛ rɛhiya maya ngakedhdhɛ na kera na ngabhɛkkɛye. 22 Na nɔng mɛa ngaya kunɛ ꞉inyoye, ale zugo shikkenyɛyɔ. Na maya agge kème ɔng? 23 Na mɛa ga me ngalɔkta kòyokkoginy ꞉aggeuye. Agge kɔlɔmmo zukte ku wush wa bhiigɛsɛnɛa Tumu lɔgɔ. 24 Na dhi ko yɔk kari na mesigi damiya kònyonɛa ridhing. Na ahaye onynɛnɛnoye gadhi na yɛsay ꞉iggeu sabbi. Na hunde mesi ngangaye, zugo kumulɔng gainyɛ hunde ani hira bhɛgi Damiya Tumu bere kàjjɛa Muse na lɔga bɔɔ kàmagaginyi a butomoye. 25 Na agge lɔkte bere kɛsɛdhdhano na kɛbhɛgɛ ꞉zuga bhorinyaa anaa ngani yɛbhbhanɛa kamannaa Yesusiye, annaa kɔtɔgɔndɛsɛo dadab na kittondɛsɛo na amissɛye kùddulɛsɛn ahaa ibhbhɛa ꞉zugu ke barariye ngaammɛ. Ayuga kɛginyaa nyawa bay ngani kataandao ngaammɛ na nyawa ngamattɛ. Lollumo ngamessɛ.”

26 Na bhorroyɔ Bhaulos dhiganu zugo na mesigi lɔga onyonɛa ridhing Damiya Tumu bere kàjjɛa Muse. Na koo ogu doraa Tumu barara na koyogɛsɛ gɔldang unga ale onyonɛa ridhingɛa gɛ na ɛlɛa hurr ko kolea uddulɛsɛnɛa Tumu go bhiy bhiy.

Lɔga Kìbhɛa Bhaulos

27 Na hunaa unga ku issabbay senno kagarate, zuga Ayhudhi honynyo Isiyagiye argi Bhaulos doraa Tumu barara ratagiye toye. Na hunaa orrɛaye, kɔnkɔnɔ zugo kumulɔng na bandɛsɛ Bhaulos na ibhigiyɛ. 28 Na ara wuy na se, “Zuga Isirayeliye! Ɛyaiy! Hirre madh zugo ba kumulɔng na zuga ga ko damiya na ko ngabaya se katamara ꞉zuguye, a ngahirra. Aynde dhigannana chɔɔ zuga Giriki ngadoriya barar Tumuye na tiranynyɛ na kete gɛrsiye.” 29 Yɔk dha bɔɔ sabbɔ orrɛ hira Ebhesoni kèleo Tirobima hunde dhɛɛ ko Bhaulos kari ɔr toyeye. Na yɔk sennɛ kako dhigan ꞉nɛa doraa Tumu barara na a bhee yokkonɛ ngalɔktaye.

30 Na zugo jajagi na ara wuy na ngeya ɔr toye na muktiyaa kumulɔng. Na ibhigi Bhaulos na tuguru na obhonisi sariya doraa Tumu barara bhɔ na nyɔgɔ waranyoga ke tiri. 31 Na hunaa senno kindi Bhaulose, ngalɔkta urgushshɛ baye shigu ꞉gulsaa bholisuny Rome iho ngonu. 32 Na nɔng ibha gulsachina bholisuny gena ko bholi ke tiri na nge bhɛa ɛlɛa ꞉zugu. Na yɔk zugaa urgushshɛa ba hunaa orrɛa bholi ko gulsaa nɛye, Bhaulos ngani ngadhakkɛo.

33 Na gulsa ko na aynɛ bholi lɔgɔ na kɛchɛbɛ Bhaulos gɔrgɔriyaye. ^{▼▼Tuga Giriki se, “...gɔrgɔriyaye ku ramman.”} Na ghinu zugo na sɛɛsɛ, “Nganda a hirre kunɛnɛng? Na wa ɛddɛ ɔng?” 34 Na bhololo goore na se, “Wa messo nganga.” Gen se, “Nganga ngani kemesso.” Na nɔng gulsaa bholisuny lɔgɔ bhee ku hologun ngani ngashikko ke ngaya bhololɛye. Na aynɛ bholi lɔgɔ na kaytɛ Bhaulos bholisɔ. 35 Na hunaa hɛa na dokkɛa bhɛa ku gadhi na senno kutunnuktɛ doriye, Bhaulos tɛ ꞉bholisɔ ke ngaya zugo dɛmnɛye. 36 Na ngazuktonu bu mɛr wa kɔbhbhɛye ara wuy na se, “Tɔgɔdhɔyɛ na kere!”

Lɔga Yokkono ꞉Bhaulosi Na Kɛngɛa Rɛ

37 Na Bhaulos hunaa ngani kɛ̀hɛyɛa na kènno kùtunnuktɛ bhɛa bholisunyde, nɔng ghinu gulsaa bholisuny na sɛɛsɛ, “Keni kòyogoginy lɔk gena. Na hiniyɔ oo mariyɔ?”

Na ghinu ꞉gulsaɔ na sɛɛsɛ, “Tuga Giriki gayɔ? 38 Inye ngaaniyo hira Gibsi bɔɔ bhorii ba na ibhbhani zuga ku 4,000 bere kɔdhdhɛa zugo na dhigani korugiye?”

39 Na nɔng yagɛsɛ na sɛɛsɛ, “Ngakaniyo! Kani hira Ayhudhi kabhagi ɔra bo kàggaa iho Kilkiyagiye kèleo Tersese. Na ga igomogony na kòyogɛsɛ zugo lɔgɔ.”

40 Na hunaa Bhaulos kìgomɛsɛnaye, bana na chilu dorigiye bhɛa ku gɔm na lamu zugo siyɔ na kidhitɛyɔ. Na hunaa dhittinɛna ribte, yogɛsɛ lɔgɔ tuga Hibiru na sɛɛsɛ,