Act 22 | SuqSC | STEP | “Gochonginya ko Babachina ganyuye! Ga chirartanyuyɔ! Na kòyogogung ngalɔkta wa gany ɛrrinyanɛ ꞉lɔkkuye.”

Acts 22

1 “Gochonginya ko Babachina ganyuye! Ga chirartanyuyɔ! Na kòyogogung ngalɔkta wa gany ɛrrinyanɛ ꞉lɔkkuye.” 2 Na hunaa zugo shikkɛa nɔng hunde mɛzzi tuga Hibiruye, dhittɛ rib kumulɔng. ^{▼▼Ngatukta kèe Hibiruye a tuga ngazukta chirarrɛ nɔngge.}

Na nɔng seu, 3 “Anye kani hira Ayhudhi bere kùhudhukkononyi ɔra iho Kilkiyagiye kèe Tersese. Na nɔng kichilan Yerusalemɔ ngaya. Na damiya kokonginyaa ga kumulɔng bere madhaganyɔ ꞉Gɛmaliya shɛɛ. Na ko anye bere kihini lɔga kàgayɛa Tumu goore ngadamita hinnɛo ꞉iggeu mɛa toyeye. 4 Na anye bere kani hira kɔgɔrrani zuga kɔbhbhɛa Ganggua Yesusi ^{▼▼“…zuga kɔbhbhɛa Ganggua Yesusi” a bhɛa kènɛa zuga yɛbhbhɛa lɔga Yesusi.} na kamari na chɔɔ kichibi zuga maya ko ga ngaha na kɔgɔyɛi doraa chibinuny na gena rɛssɛayɔ. 5 Na zuga bere orrɛa ngalɔkta kemesi ꞉anyoye kawarre, a gɔldanga bo doraa Tumu barara ko zuga Ayhudhi nyagasa kedhdhɛa lɔgɔ kumulɔng. Na chɔɔ dadaba bere kɔ̀gɔdhdhɛsɛna gochonginyaa bhakkɛa Dɛmasko na kàmagɛ zuga yɛbhbhɛa Yesus ɛlla ngonu na kɛ̀chɛbɛ na kɔ̀gɛ Yerusalemɔ na kàttiyɛ bere ajjanyɛa ꞉yɔkku.

6 “Na hunaa kɔgɔi na kodogi Dɛmasko jaa na bho ngani anna kali kɛngɔye, tumu bhadhu dari na abakkanu bhɛa kihɛi ꞉anyo. 7 Na kɔchɔwa ba na kishikka lɔkte sennɛ, ‘Saol, Saol kɔrranany kɛ ɔng?’

8 “Na kighinna na kesɛɛsɛu, ‘Komorue! Ani nɛng?’

“Na nɔng yagagany na seagany, ‘Kani ngahirra kɔrranany ꞉inyo kènnony Yesusa Naziretiye.’ 9 Na yɔk zuga kɛllo kari dha bere orrɛ ngaya bhadhɛ ꞉tumuye sɔng. Na lɔkte yokkogony ꞉nɛaye ngani kishigito.

10 “Na kesɛɛsɛu, ‘Komorue! Na mɛa kème ɔng?’

“Na seagany, ‘Bana ok Dɛmaskogiye na lɔkte kèe mese kumulɔng ale kòyokkoginy ngonu.’ 11 Na bho ngani ngakoriyo ke ngaya wa abakkanɛany hɔldinɔye. Na ibhtony ꞉zuga kidhio kari siyɔ na dhigandany Dɛmaskogiye.

12 “Nɔng Dɛmaskogiye dha bere lɔ hirre kèe Hananiya. Nɔng a hira yɛbhbha Tumu na bhɛkka Damiya Tumu goore na gayɛa ꞉zuga Ayhudhi bhakkɛa ngonu kumulɔng. 13 Na ko na chilagany jaa na seagany, ‘Gochonga nanu Saole! Ga gɔny bho!’ Na karra bho shaw hung na kɔgɔnya nɔng.

14 “Na seagany, ‘Inye wa bɛrayinyɔ ꞉Komoruya kokonginyaa ga na tak lɔga sennana ꞉nɛa na ar Hira Ridhing Ningginɛna na shik lɔga yokkono ꞉tuga nɛnɛ. 15 Na mɛa ngaya dhɔllagɛiny ngalɔkta wa ori na shigiye, kèe te hira orroni lɔga gɛnyɛ kawarre na yogɛsɛ zugo kumulɔng. 16 Na mɛa ihi bay dhɛɛ kɛ ɔng? Bana, eli sara Yesusi ^{▼▼Ngaya se, “...eli sara Yesusiye...” a bhɛa kènɛa “Yɛbh Yesus.”} na churrɛ na tonyo lɔga gunyu gɛrsa.

17 “Na hunaa kawakka Yerusalemɔ na kokka doraa Tumu barara na kallinɛno ko Tumuye, karra Komoru kunaɔ. 18 Na seagany, ‘Zuga Yerusalemi ngalɔkta gany yogɛsɛn ꞉inyoye ngahinnɛo. Na bana ke tiri na dhɔ Yerusalem na ogo!’

19 “Na anye kesɛɛsɛu, ‘Komorue! Ngazukta Yerusalemiye yɔk gaɛ huna bere kowoyɛi doriyoa madhinɛnɛa zuga Ayhudhi lɔga Tumu kumulɔng na karagɛi zuga yɛbhbhinyɛa inye na kichibɛi yɔk.’ 20 Chɔɔ kala bere kɔ̀gɔdhdhɛa hira rɛsɛa lɔga gunyu kèe Istibhanos, anye bere kichili ngonu na kishiginɛno ko zuga kɔnnɛna na ruminyaa gɛ kibhɛsɛni ꞉anyo.

21 “Na hunaa kesɛɛsɛu ngangaye, nɔng Komoru seagany, ‘Keni kèginy surr rɛna bhɛa bhorinyaa anaa. Na bana ogo.’”

Lɔga Kàggayɛa Bhaulos Hunde A Hira Romeye

22 Na zugo kumulɔng chirara nɔng ko bhee yokkonɛ ngalɔkta. Na koo ara wuy goore na se, “Hirre ku ngangaye, any kere! Maya basseyɔ ngaiho!”

23 – 24 Na zugo hunaa ngani arrɛa wuy na bhurushanɛa ruminyaa gɛ na ujjukkɛa na tudhungngɛa chɔɔ baye, gulsaa bholisuny aynɛ bholi lɔgɔ na kaytɛ Bhaulos doraa bholisuny toye na kadhaga na kighinitɔ na koyogɛsɛ lɔkte arrɛsɛnɛ ꞉zugu wuyte. 25 Na hunaa bholi ngani chibbɛa na senno kadhaga shuwarayɔye, nɔng Bhaulos ghinu gulsaa bholisuny chinynyo iho jaa ngonu na sɛɛsɛ, “Ngangaye hunde senno dhaktanyu hira Rome ngani lɔga ganyu kègendao na kàttionyoye, damiya Rome kullɛ ngayo?”

26 Na hunaa shikko ngalɔktaye, ogu bhɛa gulsaa bholisuny bo na sɛɛsɛ, “Seni me ɛnɛng? Nganda ngayo hira Rome!”

27 Na gulsaa bholisuny bo ogo na ghinu Bhaulos na sɛɛsɛ, “Ga yogogonydɔ, inye ani hira Rome?”

Na sɛɛsɛ, “Ee, kani hira Rome.”

28 Na gulsa seu, “Ko anye kani hira Rome. Na bhee kanɛ hira Romeye bere katallani birinyaa bo mɛra.”

Na nɔng sɛɛsɛ, “Anye bɛrgua bere kùhudhukkonɛanyi ko mɛa toye ngani kani hira Rome chi.”

29 Na zuga senno kighiniyɛ dhɔyɔ ke tiri na ago. Na ko nɔng gulsaa bholisuny bo hunaa tagga bhɛa Bhaulos anɛa hira Romeye, tɛngɛru ke ngaya wa chibɛye.

Lɔga Yokkono ꞉Bhaulosi Bhɛa Zuga Ayhudhi Kedhdhɛa Lɔgɔ

30 Na bhorre gulsaa bholisuny bo ɔga Bhaulos na yogɛsɛ gɔldangɛa bibiyo doraa Tumu barara ko gulsachina Ayhudhi kedhdhɛa lɔgɔ kumulɔng na kumuktiyaa na kojjigi lɔgɔ na katagɛ lɔkte kichilɛ Bhaulose shɛɛ. Na koo dhigana bhɛa nɛ.