Acts 23

1Na Bhaulos gɔnyu gulsachinaa Ayhudhi kedhdhɛa lɔgɔ churr na sɛɛsɛ, “Gochonginyaa ganyuye! Anye ihineya bere kinginye ko mɛa toye bere katagachcha Tumu shɛɛ kɛr hinisa bo hɔla.” 2Na nɔng gɔldanga bo doraa Tumu barara kènno Hananiya hunaa shikko ngangaye, sɛɛsɛ zuga chillɛa bhɛa Bhaulosi jaa na kɔnyɔgɔ nɔng tugɔ na kidhiyɛyɔ. 3Na nɔng Bhaulos sɛɛsɛ Hananiya, “Ngahirra hɛtto ko dori jagara kìghirro shuldoyɔ shɛɛ na toye ihono duliye! Inye seni ɛlɛhɛn lɔga ganyu na ken huna Damiya Tumu bere kàjjɛa Muse. Na ɛddɛi Damiya Tumu na senɛsɛn zugo na karaktany anye kɛ ɔng? Ko inye ale dhakkiny ꞉Tumu!”

4Na yɔk zuga chillɛa bhɛa Bhaulosi jaa seyɛsɛ, “Ngangaye, dhɔmi gɔldanga bo doraa Tumu barara kɛ ɔng?”

5Na nɔng sɛɛsɛ, “Yee, gochonginyaye! Anye hunde a gɔldanga bo doraa Tumu bararaye, kimagiyɔ. Yɔk lɔga Tumu a ngagiya sennɛ, ‘Gulsaa zuga gunyu lɔga gɛrsa ngayogɛsɛniye chi.’”

6Na nɔng gɔnyu gulsachinaa Ayhudhi kedhdhɛa lɔgɔ ɛlla ngonu na tagu hunde dha gena a zuga kimsiya Ayhudhi kènno Sodhokka na gen agga kɔbhbhɛa damiya Bhɛrɛsiye. Na yogo lɔgɔ goore na seu, “Gochonginyaye! Anye kani hira kɔbhbha damiya Bhɛrɛsi huna bere kokonginyaa ganyu kinginye. Na mɛa bhee chillɛanyɛ ꞉zuguye a ngaya kibhɛ lɔga ale bansanɛa ꞉zugu rɛsɛyɔ hinisɔ na kɛyɛbhɛye.” 7Na hunaa yokkono ngalɔktaye, zuga kedhdhɛa lɔgɔ ɛkkɛnyandɛ kɛngɔ, na kendiyaa gaminya ramman. Na ga kɔbhbhɛa damiya Bhɛrɛsi tɛldi bhiy na ga Sodhokka tɛldi bhiy. 8Yɔk zuga Sodhokka bhɛa ale bansanɛa ꞉zugu rɛsɛyɔ ngayɛbhbhɛo. Na sennɛ kulya kumulɔng ko zuga ekkono ꞉Tumu ninggɛ. Na yɔk zuga kɔbhbhɛa damiya Bhɛrɛsi ngalɔkta kumulɔng hunde a dhereye yɛbhbhɛyɔ.

9Na jalbhana goore. Na zuga kɔbhbhɛa damiya Bhɛrɛsi madhdhɛa zugo Damiya Tumu bere kàjjɛa Muse gen yɔk banda na tɔrɔ Bhaulos na ɛkkɛnyandɛ na se, “Bhee kujjukkanɛ ngahirra ninggɛ. Kako hunde lɔgɔ bere yogɛsɛn ꞉kuloy konnɔ oo ꞉hira ekkono ꞉Tumuye, agge kimagtɔ.” 10Na yɔk ɛkkɛnyandɛ gɛrrɛng gɛrrɛng na gulsaa bholisuny bo tɛngɛru bhɛa senno Bhaulos ngakasartiyɛy ꞉zugu. Na sɛɛsɛ bholi, “Ago ɛya Bhaulos ngonu ɛkkɛnyannɛnɛ ꞉zuguye, na mayiyto gidhdhingɔ na yaga bholisɔ.”

11Na nɔng Bhaulos saniu ungo dhɔnɛ na naa senno keteyɛ ramman barɔ chilɛsɛ ꞉Komoruyɔ Tumu jaa na iriyu na sɛɛsɛ, “Te dhandali! Damiya bare yogɛsɛni zuga ɛlla Yerusalemɔ lɔga ganyu bere orroni kawarre, ale ngani yogɛsɛn zuga ɛlla Romegiye nganga sɛgɛn.”

Lɔga Kènno Kɔ̀gɔndɛ Bhaulos

12Na hunaa bho arsaye yɔk zuga Ayhudhi gena muktɛ na daga go na bhiigi lɔgɔ na se, “Ko bhee kɔgɔdhdhɛ Bhaulos, amissɛ ngakammo. Ma ngakamatto.” 13Na zukte dha bere dokkɛ go na bhiikkɛ ngalɔktaye, a zukte ku 40 ko bhɛlɛga gena. 14Na yɔk ago bhɛa gɔldangɛa bibiyo doraa Tumu barara ko zuga Ayhudhi bibiyo na seyɛsɛ, “Agge wa kibhiikto lɔgɔ na ko bhee kɔgɔdhdhɛo Bhaulos amissɛ ngakammo. 15Na mɛa igge shiktɛ ko gulsachina Ayhudhi kedhdhɛa lɔgɔ na tɛhɛyɛ ko zuga marakko lɔga Bhaulosi shɛɛ. Na ghindo bhɛa gulsaa bholisuny bo na kayaga bhɛa kègedhdhɛa lɔgɔ. Agge wa kɛtɛldo kɔk na hunde chɔɔ ngaya ngani kadakkoye kɔ̀gɔndoyɔ.”

16Na nɔng ngosoniya Bhaulosi shigu ngalɔkta dogɛ ꞉zugu goye na ogo bholisɔ na yogɛsɛ Bhaulos.

17Na Bhaulos eliu gulsaa bholisi chinynyo kona na sɛɛsɛ, “Dhigan ngaerita bhɛa gulsaa nu bo. Lɔ lɔkte se koyogɛsɛ nɔng.” 18Na nɔng dhiganu eri bhɛa gulsaa bo na sɛɛsɛ, “Anye wa eleonyɔ ꞉hira kìchibbo kèe Bhaulos na tɔllɔhaganyɔ na kìdhiganaginy ngaerita. Se lɔ lɔkte se koyogoginydɔ.”

19Na gulsaa bo ibhu eri siyɔ na dhiganu dheyyɔ bhiy na ghinu na sɛɛsɛ, “Wa seni yogogony lɔk giyong?”

20Na eri sɛɛsɛ, “Zuga Ayhudhi gen wa dakta go na bhiikta lɔgɔ na kɛtɛhɛyɛ ko zuga marakkɛa lɔga Bhaulosi. Na rogonɔ kighindeny inye na dhiganɛsɛ Bhaulos bhɛa kedhdhɛa lɔgɔ. 21Yɔk zukte ku 40 ko bhɛlɛga gena wa dakta go na bhiikta lɔgɔ na seya, ‘Ko bhee kɔgɔdhdhɛ Bhaulos, amissɛ ngakammo na ma ngakamatto.’ Na se kabakki ganggu hunde Bhaulos kunde. Na mɛa reinyɛ inye na igomɛsɛ lɔkte ghinnenyɛye. Na inye ngaigomɛsɛni.”

22Na gulsaa bholisi bo sɛɛsɛ eri, “Na ngalɔkta yokkogonyde ngayogɛsɛ hir kona ni wo!” Na ittonu.

Lɔga Kùlugunyɛa Bhaulos Na Kɛ̀hɛyɛa Kesariyagiye

23Na koo eliu gulsachina gɛnyɛ gee ku ramman na sɛɛsɛ, “Ibhta bholise ku 200 ko ga woyɛa harteyiye gee ku 70 ko ga bɛrrany gee ku 200 na jhaynɔ satinya sizziyɔ kago Kesariyagiye. 24Na oytɛsɛ Bhaulos harteyiya woyɛa kɔk na kɔtɔyɛyɔ, na kidhigana shɛɛ chɔɔ bhɛa Gulsaa Yudha Bo kènno Bhilis.”

25Na koo tɔgɔdha dadabte se,

26“Ngadadabta kɔgɔdhan ꞉anyo, Kilawdi Lasiya.

“Na kɔgɔdhdhaginy inye Gulsaa Yudha Bo Lɔmi Diram, Bhilis.

“Na mɛa kissainydɔ, ani challi?

27“Nɔng ngahirra ajjo ngani kɔgɔdhɔ ꞉zuga Ayhudhi kɛr. Na anye katagga hunde a hira Romeye na kayto ko bholisa ganyu kari na kibbaysiwa. 28Na bɔɔ kidhigani chɔɔ bhɛa kedhdhɛa ꞉gulsachina Ayhudhi lɔgɔ na kàtagɛ lɔkte kìchilɛye. 29Na katagga hunde dha chilɛ ke ngaya ɛkkɛnyannɛnɛ lɔga damiya nɛye. Na chɔɔ lɔkte dhandali kèe kɔgɔndɛ oo kɛchɛbtɛ ninggɛ. 30Na wa kishikka hunde dhaa se dogɛ ꞉zugu go na kindite. Na aynde kittonnogung igge ke tiriye. Na lɔkte kichilɛ nɔngge wa koyogɛsɛu zuga chilɛa na koo kago bhɛa nu na ɛlɛhɛnɛ ꞉iggeu.”

31Na yɔk bholi ibhta Bhaulos damiyaa kajjɛa lɔgɔ na barɔ dhigana surr ɔra kènno Antibanti. 32Na bhorre bholi gen waga ɔrɔ na Bhaulos dhigana ꞉bholisa woyɛa harteyiye sɔng. 33Na yɔk hunaa hɛyɛa na dokkɛa Kesariyaye, ayɛ Gulsaa Yudha Bo dadab na Bhaulos dhɔyɛ doraa nɛnɛ. 34Na nɔng hunaa toyiwa dadab na tewa ushaye, ghinu Bhaulos na sɛɛsɛ, “Ani hira bhagi ba inong?” Na tagu hunde a hira bhakka Kilkiyaye. 35Na sɛɛsɛ, “Ale koo lɔga gunyu kishigi hunde zuga chillɛinyɛa honyde.” Na sɛɛsɛ bholi, “Aytɛ na bhɛgɛ doraa bere kɔdhdha :Herediosi.”