Acts 24

Lɔga Kɛngɛa ꞉Bhaulosi Rɛ Bhɛa Bhilisi

1Na hunaa tɛlda ungo haynaye, gɔldanga bo doraa Tumu barara kèe Hananiya dhi ko zuga Ayhudhi bibiyo gen ko hira gaa lɔga kìchibɛa zugo kèe Tertelus. Na ago Kesariyagiye bhɛa Bhilisi, Gulsaa Yudha Bo, na childɛ Bhaulos. 2Na Bhaulos hunaa keleono na kunnoye, nɔng Tertelus kɔbhɛsɛ Bhilis lɔga chilɛa ꞉zugu na sɛɛsɛ, “Gulsaa bo lɔmi diram Bhilise, ihineya bɔɔ allinɛnɛiy zuga gayo bere kabhakto shɛɛ kɛr ko mɛa toye. Na chɔɔ lɔga bere dhandala bhɛa zugony bɔɔ bhɔdhu na tewa challi. 3Na ngaya allinɛnɛiy shɛɛye, hande kɛlɛoye kumulɔng tii tii agge kɔdhɔnginy hinisiya bo hɔla. 4Na mɛa lɔ lɔkte chichi godhe kenno kòyoktoginydɔ. Na ga chirbhisiey na chirariy shɛɛ hung. Dirr ngakamarageenynyo, kɔtɔllɔhaginydɔ.

5“Agge bhɛa nayo Ayhudhi ngahirra a hudhagi. Nɔng anna bɔɔ kɔnkɔna zuga gayo oree oree ba kumulɔng na kobhori ba. Na chɔɔ sɛgɛn a gulsaa kimsiya zuga kɔbhbhɛa hira Nazireti kullɛna. 6Na chɔɔ bortɔ senno keme damite kullɛ doraa nayo barara Tumu. Na kibhbho na kènno kàttiyo damiya nayo. 7Na saraniy ꞉gulsaa bholisi bo kèe Lasiya gidhdhingɔ na dhiganna. 8Na ajjɛa zuga chilɛa Bhaulos lɔgɔ na kohoya bhɛa nunu. Na mɛa ngalɔkta kichilɛo ngahirraye hunde a dhereye marak ꞉inyo na taktɔ.”

9Na yɔk zuga Ayhudhi shiktɛ kumulɔng na se, “Ngalɔkta yokkonoye kumulɔng a dhere.”

10Na nɔng Gulsaa Yudha Bo uma Bhaulos siyɔ na ko nɔng koyogo lɔgɔ. Na Bhaulos yagɛsɛ na sɛɛsɛ, “Inye ani hira bere kedhdhani lɔga ngazukta oynyaa mɛra. Na mɛa ngaya koyokkogɛiny lɔga kɛɛnganɛy lɔga kàmagaganyiye, hini hɔllany goore. 11Yɔk unga bɔɔ kɔgɔyɛi Yerusalemɔ na keterrisanɛi Tumu ngonu mɛa te tɔmmɔn ko ramman. Na ngalɔkta bhɛa anɛa dhere, ga chɔɔ ghin bhokkonnɔ hung na taktɔ. 12Ngalɔkta yokkɛ ꞉yɔkkuye, a butomo. Bhee kɛkkɛnyannɛnɛo ko gen doraa Tumu barara na kɔɔnkɔnɛ zugo doraa madhinɛnɛa zuga Ayhudhi lɔga Tumu ko ɔr toye na se kèe kobhorɛ baye, yɔk ngani kartanyo. 13Na mɛa bhɛa senno kidhiganday zuga orronɛa lɔgɔ kawarre na koyoktoy lɔga chillɛanyɛa, ninggɛ. 14Nɔng lɔkte yokkɛ ꞉yɔkku ku dhereye a ngalɔkta keterrisanɛ Tumu Komoruya bere kokonginyaa gayo kinginye na kɔɔbhɛ lɔga Ganggua Yesusa Nazireti marrɛa ꞉yɔkku na sennɛa a kullɛye. Na nɔng anye kɛyɛbhi Damiya Tumu bere kàjjɛa Muse ko lɔga bere kɔdhdhɛsɛnɛa ꞉zuga yogɛsɛnɛa zugo lɔga dhugunono ꞉Tumu dadab kumulɔng. 15Na ngadamita yɛbhɛ ꞉yɔkku na senɛ zuga ridhing ningginɛna ko ga lɔmmɛa ridhing ale bansanɛ rɛsɛyɔ kariye, ko anye kɛyɛbhiyɔ. 16Na kali kali kɛmɛdhdhan goore na bhɛa zugony ko bhɛa Tumu lɔga gɛrsa ridhinguny hinisɔ ngakɔlɔmi na kàbhak ba shɛɛ.

17“Na oynyaa bo mɛra bere kɔdhɔyɛi Yerusalem na kihɛi ba konnɔ hunaa tewa ushaye, kɛchɛbɛu na kibhau ahaa keni kɛ̀ay zuga ganyu ku bhoyoga ko ga keni kùddulɛsɛ Tumu na kawagau Yerusalem. 18Na yɔk ngazukta hunaa honynyo doraa Tumu bararaye, artany tu kɛngɔ hunde kemesi damiya kònyonɛa ridhingge. Na anye zugo ngani kɔ̀ɔnkɔno na chɔɔ gee kɛllo kari na kobhoreo ba ninggɛ. 19Na yɔk zuga Ayhudhi honynyo Isiyagiye gen bere ɛlla ngonu. Na ko yɔk hunde kɔlɔmɛsɛn lɔgɔye sɛɛ kabanda na koyokto ngaya ihɛ ꞉inyoye. 20Oo ngazukta nyaga ɛl ngayaye sɛɛ kudhugundoginy lɔkte bere marakkɛ ꞉zuga Ayhudhi kedhdhɛa lɔgɔ na kako kɛddɛiye. 21Nɔng kesea bhee kìchillɛany anyeye, kako a ngaya bɔɔ koyogɛsɛn zuga Ayhudhi kedhdhɛa lɔgɔ goore na kesenɛsɛn, ‘Bhee chillɛanyɛ ꞉zuguye a ngaya kɛyɛbhɛ lɔga ale bansanɛa ꞉zugu rɛsɛyɔye.’ Nɔng chɔɔ ahite kɛddɛi kona ninggɛ.”

22Na Bhilis nɔng dha bere a hira gaa lɔga Ganggua Yesusi goore. Na sɛɛsɛ zugo, “Hunde ale gulsaa bholisuny bo kèe Lasiya kunde, lɔga gu kegedhdhi ꞉anyo.” 23Na aynɛ gulsaa bholisi chinynyo lɔgɔ na kɛbhɛk Bhaulos na sɛɛsɛ, “Hunde zuga gɛnyɛ hony na se katagayate, ngakanyɛ. Na goore ngabhɛgi.”

24Na bhorre Bhilis ko tɛriya nɛnɛ kènno Ngadirsila hoya na kishigi lɔga Bhaulosi. Nɔng Ngadirsila dha a hoya zuga Ayhudhi. Na yɔk ege hir kona na elɛɛsɛ Bhaulos. Na yɔk koo kɔbhɛsɛ :Bhaulosi bhɛa kɛ̀yɛbhɛa Yesus Kirisos. ▼

▼Yesus Kirisos. Tuga Giriki se “...Kirisos Yesus...”

25Na hunde ngani kɔbhɛsɛn bhɛa kònyonɛa ridhing na kànɛa hɔli bhɛa Tumu ko ga kɛbhɛgɛa rɛ shɛɛ ko kala ale attiyɛiy ꞉Tumuye, nɔng Bhilis tɛngɛru bho na sɛɛsɛ, “Te usha! Bana ogo! Ale hunde kako keni kɔ̀bhagany ngalɔkta sɛgɛnde, kegi hiri na elenydɔ.” 26Nɔng dha bere eleono Bhaulos jaja na mɛzzɛɛ ke ngaya hinɛ bhɛa senno kaynɛ ꞉Bhaulosi aha gena dariye.

27Na Bhilis tɛu oynya ramman na bhɛa nɛnɛ sɛrɛu ꞉hirre kèe Bhorko Bhito. Na Bhilis dhɔyu Bhaulos doraa chibinuny na zuga Ayhudhi hinisi kete hɔli.