Acts 25

Lɔga Kɛngɛa ꞉Bhaulosi Rɛ Bhɛa Bhito

1Na nɔng Bhito hunaa kɔa chɔɔ Kesariya na iho ungo sizzi ngonuye, koo ogo Yerusalemɔ. 2Na ngonu assa :gɔldangɛaa bibiyo doraa Tumu barara ko gulsachina Ayhudhi na childɛ Bhaulos. 3Na tɔllɔsɛsɛ Bhito goore na kɔtɔr yɔk na kitton Bhaulos Yerusalemɔ. Yɔk dha se kutunggɛsɛ gɔrɔ na kinditɔ. 4Na nɔng Bhito sɛɛsɛ, “Nɔng Bhaulos a indonu kɛ̀bhɛk Kesariyagiye doraa chibinunyde. Na ko anye ale kowogi ngonu shaw. 5Na gulsachina gu gena any kìdhiyo ko anye Kesariyagiye kari. Na hunde dha bɔɔ Bhaulos ɛddɛu lɔk genaye, kichildɛ ngonu.”

6Na hunaa Bhito ɛlla ko yɔk ngonu ungo 8 oo 10 na tewa ushaye, shidhɛ Kesariyagiye. Na bhorroyɔ ogo na tɛa alleya nɛnɛ kedhdhɛa lɔgɔ. Na aynɛ zugo lɔgɔ na kidhiganda Bhaulos. 7Na hunaa kunnoye, likta ꞉zuga Ayhudhi honynyo Yerusalemɔ na childɛ lɔga bo dhandala chɔɔ zuga orrɛa kawarre ningginɛna.

8Na nɔng Bhaulos kɛngu rɛa nɛnɛ lɔkke na sɛɛsɛ, “Damiya Ayhudhi ko damiya doraa Tumu barara ko bhɛa komoruya Rome bo anye lɔk gen ngani kɛ̀ddɛo dhul.”

9Na nɔng Bhito tɛhɛnu bhɛa tɔrɛa zuga Ayhudhi na hinisi ke hɔli na sɛɛsɛ Bhaulos, “Bhɛa kɔyɛi Yerusalemɔ na lɔga gunyu kegedhdhɛi ꞉anyo ngonu, hiniyɔ oo mariyɔ?”

10Na nɔng Bhaulos yagɛsɛ na sɛɛsɛ, “Mɛa anye kani nganda wa kichilla bhɛa hira komoruya Rome bo kedhdho lɔga damiya zuga Rome. Na lɔkte kɛddɛi bhɛa zuga Ayhudhi ninggɛ. Chɔɔ ko inye gayɔ. 11Oo hunde dha bɔɔ kɛddɛwa lɔga kàttiyɛanyi rɛsɛyɔye, any kère. Na nɔng hunde kìchillɛany butomoye, inde ajjinɛnɛanyi ninggɛ. Yɔk lɔga ganyu any kishik ꞉komoruya Rome bo!”

12Na Bhito hunaa alliyɛa ko zuga ɛanɛa nɔng lɔkke na tewa ushaye, sɛɛsɛ, “Ngadamita senɛ, ‘Lɔga ganyu any kishik ꞉komoruya Rome boye,’ maya ale kɔ bhɛa nɛnɛ na lɔga gunyu shik ꞉nɛa.”

Lɔga Ghinɛa ꞉Bhito Komoru Agiriba

13Na sani ungge muchugi na nɔng komoruya kèe Agiriba ko ngɔnɛ Ngaberenike ago Kesariyagiye na kissa Bhito. 14Na hunaa ɛlla ngonu unga bo mɛraye, Bhito yogɛsɛ komoru Agiriba lɔga kìchibɛa Bhaulos na sɛɛsɛ, “Kɔlɔmi hira kìchibbo bere dhɔtta ꞉Bhilisi ngaya. 15Na huna bere kɔgɔi Yerusalemɔ, gɔldangɛa bibiyo doraa Tumu barara ko zuga Ayhudhi bibiyo anna bere chilɛa ngahirra bhɛa nanu na kàttiyɔ.

16“Na anye koo kesɛɛsɛu, ‘Hunde hira kìchilɛa ngani koyogo lɔga kɛngɛa rɛ bhɛa zuga chilɛaye, ko kera Rome ngagannɛo.’ 17Na zuga chilɛa Bhaulos hunaa kidhiyano kari chɔɔ ngayaye, bhɛa keni ngakutugurɛ lɔga gɛnyɛ dirr, anye bhorroyɔ kokka alleya nanu kegedhdhɛi lɔgɔ na kaynɛu zugo lɔgɔ na kidhiganda Bhaulos. 18Na yɔk zuga chilɛa nɔng hunaa yokkonɛa lɔga ɛddɛa ꞉nɛaye, kamarakka na lɔkte gɛrsi chilɛ nɔng ninggɛ. 19Lɔkte ɛkkɛnyannɛnɛ ꞉yɔkkuye a lɔga yɛbhaa nɛ. Na yɔk ngazukta sennɛ hira bere rɛsa kènno Yesus ngani kabanao, na nɔng Bhaulos se bere banaa na mɛa i basseyɔ. 20Na bhɛa keni kàmaragɛ ngalɔkta shɛɛ na kègedhdhɛ, anye rɛktanyɔ. Na kighinna Bhaulos na kesɛɛsɛu, ‘Bhɛa kɔyɛi Yerusalemɔ na kegedhdhɛi lɔga gunyu ngonu, hiniyɔ oo mariyɔ?’ 21Na nɔng seagany, ‘Lɔga ganyu any kishik ꞉komoruya Rome bo.’ Na anye kaynɛu lɔgɔ na ko bhee dhiganɛ ꞉zugu Romegiye nɔng kɛtɛ doraa chibinuny ngaya.”

22Na nɔng Agiriba sɛɛsɛ Bhito, “Ko anye lɔkte yokkono ꞉ngahirraye keni kìshiktɔ.” Na nɔng yagɛsɛ na sɛɛsɛ, “Ee, rogonɔ bhorroyɔ shigiyɔ ni.”

Lɔga Kɛngɛa ꞉Bhaulosi Rɛ Bhɛa Komoru Agiriba

23Na bhorroyɔ Agiriba ko Ngaberenike malugu ruminyaa gɛ komorumo na hoya ko gulsachina bholisuny bibiyo ko gulsachina orony kari ga bo dhɔngngɛa ꞉zugu na tunnugu doraa bo ojjɛa ꞉zugu lɔgɔ. Na Bhito egu zugo na kidhiganda Bhaulos. 24Na Bhaulos hunaa kunnoye, Bhito seu, “Komoru Agiriba ko ngazukta ɛllo ngaya kumulɔngge, ngahirra a hira bɔɔ tɔllɔhaganyɛa ꞉zuga Ayhudhi bhakkɛa Yerusalem ko Kesariya kumulɔng na chilɛa na arrɛa wuy na sennɛa, ‘Ngahirra maya basseyɔ ngaiho.’ 25Na anye kamarakka na chɔɔ lɔkte ɛddɛ ꞉nɛa na kattiɛ rɛsɛyɔ ngani ngakorɛsɛno dhul. Na nɔng ngadamita bɔɔ senɛ, ‘Lɔga ganyu any kishik ꞉komoruya Rome boye,’ kɛsɛdhdha na kitton Romegiye. 26Nɔng anye lɔkte ku dhere bere ɛddɛ ꞉ngahirra na kɔgɔdhdhɛsɛn komoru dadab ninggɛ. Na mɛa komoru Agiribaye, wa kidhiganau ngahirra bhɛa nu na maraga ꞉iggeu ko bara gunyu. Na hunde jɔɛsɛo lɔga ɛddɛaye, kɔ̀gɔdhɛsɛ komoruya Rome bo lɔgɔ dadabɔ. 27Hunde kibhbhana hira kìchibbo na shɛɛ ngani kàmaragato na kìdhigan bhɛa komoruya Rome boye, heo a dallemo.”