Act 4 | SuqSC | STEP | Na hunaa Betiros ko Yohanis ngani yogɛsɛnɛa zugo lɔgɔye, gɔldangɛa doraa Tumu barara ko gulsaa zuga bhɛkkɛa doraa Tumu barara ko zuga kènno Sodhokka hoya na assa yɔk.

Acts 4

Lɔga Kɛ̀hɛyɛa Betiros Ko Yohanis Bhɛa Zuga Ayhudhi Kedhdhɛa Lɔgɔ

1 Na hunaa Betiros ko Yohanis ngani yogɛsɛnɛa zugo lɔgɔye, gɔldangɛa doraa Tumu barara ko gulsaa zuga bhɛkkɛa doraa Tumu barara ko zuga kènno Sodhokka ^{▼▼Zuga kènno Sodhokka a zuga lɔga ale bansanɛa :zugu rɛsɛyɔ ngayɛbhbhɛayo.} hoya na assa yɔk. 2 Na dɛbɛ goore ke ngaya Betiros ko Yohanis madhdhɛ zugo bhɛa ale Tumu ibbaniseonɛa zugo rɛsɛyɔ damiya bɔɔ ibbaniseonɛa Yesuse. 3 Na ibhigi na aytɛ doraa chibinuny na kɛtɛldi ngonu ko bhee bho arsɛ ke ngaya bho anɛ kɔrrɔye. 4 Na yɔk zuga shikkanɛa ngalɔkta madhɛsɛnɛ ꞉yɔkkuye ga yɛbhbhanɛa te mɛri. Na hunde kòtoy zuga maya sɔng ngani yɛbhbhanɛaye, heo anda a 5,000.

5 Na bhorre gulsachina Ayhudhi ko zuga Ayhudhi bibiyo ko ga madhdhɛa zugo Damiya Tumu bere kàjjɛa Muse muktɛ na mɛzzi Yerusalemɔ. 6 Yɔk bhɛa ngazuktonu mukkinyaye dha bere gɔldanga bo doraa Tumu barara kènno Hanas i ngonu. Na Kayama ko Yohanis ko Iskindir ko bhɛnɛna gɔldanga bo doraa Tumu barara gen dha bere ko yɔk ɛl toye. 7 Na yɔk ayɛ zugo lɔgɔ na kidhiganda Betiros ko Yohanis bhɛa ɛlɛa ꞉yɔkku. Na hunaa dhigandaye, ghini na seyɛsɛ, “Ngalɔkta bare messoye, messo barartina nini oo messo sara gigi?”

8 Na koo Betiros aynɛ ꞉Kuloya Tumu gidhdhing na yagɛsɛ na sɛɛsɛ, “Ngagulsachinda Isirayeliye, ko zuga bibiyoye, 9 agge mɛa hunde kìchillɛiy ngalɔkta chal bare kemesso bhɛa ngahirra ku anyakuwanday ko hunde ba ɛnɛngge, 10 ga kòyoktogung shɛɛ na taga ꞉iggeu ko zuga Isirayeli kumulɔng. Ngahirra basɛ sara hira Nazireti kènno Yesus Kirisos bɔɔ ilakko ꞉iggeu na ibbaniseono ꞉Tumu rɛsɛyɔ. Na aynde mɛa ngahirra chilɛ ngaya ke na bo challaye. 11 Yesus nɔng a hira hɛtta ko
“‘bɛa marro ꞉iggeu zuga kɔdhdho doriyo na ujjukko.
Na mɛa lɔgɔ bhɔttɛ na nɔng tɛhɛyɛ ko bɛa kègenggishionɛa dori sabbɔ.’ ^{▼▼Zuga Isirayeli doriyo kɔdhdhɛ bɛnne na aynde ɛlɛhɛnɛsɛnɛ Yesus huna bɛa marrɛa ꞉zuga kɔdhdhɛa doriyoye. Na nɔng agge damiya na, doriyo kɔ̀gɔn kɛnɛ. Na ko agge hunde kɛlɛhɛnɛsɛn Yesus kɛya dori ngairishshoo na marrɛa ꞉zuga kɔdhdhɛa doriyoye, a challi. Na yɔk ngalɔkta koo bhɔdhu :Tumu na Yesus tɛhɛyɛ ko kɛya dhandala irisho dori.}

12 “Hira bere ekkono ꞉Tumu na kabayɛ ꞉zugu a Yesusi dhɔnɛnɛ. Sarre bassɛ ꞉zugu lɔga gɛ gɛrsa bay ngaya, gena ninggɛ dhul.”

13 Na yɔk hunaa zuga kedhdhɛa lɔgɔ arta Betiros ko Yohanis hunde dhugunnonɛ lɔgɔ dibte, taga hunde a zuga ngani kɛdhɛmisɛayoye na iwachiyɛ. Na katta hunde dha a zuga bere ɛlla ko Yesus kariye. 14 Na hunaa orrɛa hira kìbbayseo hunde chillɛ ko yɔk kariye, rɛgɛ ꞉lɔkku na bhee chilɛ Betiros ko Yohanis garu. 15 – 16 Na ayɛ zugo lɔgɔ na kobhonisi bhɛa kègedhdhɛa lɔgɔ bhɔ. Na mɛzzi kɛngɔ na se, “Ngazukta maya kème ɛnɛng? Yɔk zuga Yerusalemi kumulɔng hunde bare ngazukta messɛ lɔga bo bararaye, gaɛyɔ. Na chɔɔ bhee kɛɛnganɛ ꞉aggeu ninggɛ. 17 Na mɛa ga kìbbaya yɔk na sara Yesusi zug gena ngayogɛsɛnɛ na lɔga gɛnyɛ ko ba ngahɛtinɛnɛ.”

18 Na koo eliyo na ayɛ lɔgɔ na seyɛsɛ, “Igge lɔga Yesusi zugo ngamadhɛsɛno na sara gɛnyɛ zugo ngayogɛsɛno dhul!” 19 Na Betiros ko Yohanis yɔk seyɛsɛ, “Hunde kɔdhɔtto bhɛa kigomɛsɛno Tumu na kìgombogung igge, anda bhɛa Tumu a challi ka? Ga heo ngalɔkta kedhdhigi ꞉iggeu. 20 Nɔng agge lɔga bere kishikkano na korrono kawarre bhee kumunɛo ninggɛ, koyogɛsɛno zugo dhɛ dhɛ.”

21 Na gulsachina ibbaya yɔk ke dɛmney sɛgɛn na seyɛsɛ, “Wurtɔ nganga ngamesso!” Na ɔtta ke ngaya lɔkte chibɛ Betiros ko Yohanis ninggɛ na zugo kumulɔng orɛ hira kìbbayseo na eterrisanɛ Tumuye. 22 Nɔng ngahirronu kìbbaysi lɔga bo kìwacheoye dha bere oynyaa gɛnyɛ a zugo ramman ko gena.

Lɔga Ghinɛa ꞉Zuga Yɛbhbhɛa Yesus Tumu

23 Na yɔk hunaa kɔ̀ktaa na tewa ushaye, ago na assa gochonginyaa gɛ na yoktɛsɛ lɔga yogɛsɛnɛa ꞉gɔldangɛaa bibiyo doraa Tumu barara ko zuga Ayhudhi bibiyo kumulɔng. 24 Na yɔk hunaa shikkɛa ngalɔktaye, alliyɛ ko Tumu ke dhɔnɛ na se, “Komoruya nayo Tumu, inye ani na bere ghendoni ba ko tumu ko yirisi ko ahaa bhakkɛa toye kumulɔng. 25 Na ani na bere yogɛsɛni kokonga nayo kachinyi inye kènno Dawiy lɔgɔ Kuloyɔ na yokkono na senno,
“‘Zuga bhorinyaa anaa dɛmnɛ
na zuga Isirayeli se kabandagany hɔlɔng hung kɛ ɔng?
26 Yɔk komortɛn ko gulsachina bany dha muktɛ ke dhɔnɛ
na kabandɛsɛ Tumu ko Komoruya uhudhdho ꞉nɛa.’

27 “Yɔk ngalɔkta a dhere. Anna bere Heredios ko Bhenti Bhilatos mukkinyana ko bhorinyaa anaa ko zuga Isirayeli ngaɔrra toye na bansɛsɛnɛa hira ridhing ningginɛna uhudhi ꞉inyo na kachinyi inye kènno Yesus. 28 Yɔk ngalɔkta messɛ ꞉yɔkku na bhugnyɛsɛnɛye, a lɔga bere ɛsɛdhdhani ꞉inyo sabbaa nunu ko barartina nunu sabbɔ. 29 Na mɛa Komorue, ga gɔny dɛmneya ngazukta na aynɛ zuga kachinyɛa inye ɔnney na bho ngaɛngɛrsɛ na kamadhtɛsɛ zugo lɔga gunyu dhɛ dhɛ. 30 Na dhɔla yira nunu na kibbaysi zuga ilagassɛa na keme lɔga bo barara kìwacheo sara hira kachinyi inye ridhing ningginɛna kènno Yesus.”

31 Na hunaa alliyɛa ko Tumu na tewa ushaye, bhɛa muginɛnɛa ba chukɛɛ. Na yɔk aynɛ ꞉Kuloya Tumu gidhdhing kumulɔng na bho ngani ngaɛngɛrsɛo na yokto lɔga Tumu dhɛ dhɛ.

Lɔga Bhagɛa ꞉Zuga Yɛbhbhɛa Yesus Ba Ke Dhɔnɛ

32 Yɔk zuga yɛbhbhɛa Yesus kumulɔng dha bere hinisiya gɛ a dhɔnɛ na ahaa gɛ gunynyɛ ke dhɔnɛ hinisiya bo hɔla. 33 Na zuga ekko ꞉Yesusi yɔk tɔlɔmɔ barartina Tumu na koo madhtɛsɛ zugo lɔga bere bansanɛa ꞉Yesusi rɛsɛyɔ. Na te ga bo tuhinɛna na chirbhiseo ꞉Tumu kumulɔng. 34 – 35 Na chɔɔ bhɛa nɛ lɔkte gɛrsi ninggɛ ke ngaya zuga lɔmmɛa doriyo oo ba hunde kali kona talnɛnɛye, birinya honynyɛ na ajjɛ zuga ekko ꞉Yesusi na ngɛrɛsɛnɛ ga aha ningginɛnaye.

36 Nɔng dha bere lɔ hirre bhak Kobhoros kèe Yoseb. Na gettoa nɛnɛ bhɛa zuga Isirayeli a Lewi. Na yɔk zuga ekko ꞉Yesusi tɔgɔndɛsɛ sarre ke Barnabas. “Barnabas” a bhɛa kènɛa “Hira Irisho Zugo ^{▼▼Tuga Giriki se “...Liya Irisho Zugo...”}.” 37 Na ko nɔng Barnabas kali kona tallɛy baa nɛnɛ na kuyɛy birinya na aynɛ zuga ekko ꞉Yesusi.