Act 6 | SuqSC | STEP | Na ngabɛrguonu zuga yɛbhbhɛa Yesus ago na te mɛri. Na kali kona zuga Ayhudhi gayɛa tuga Giriki mɛzzɛɛsɛ zuga Ayhudhi bhakkɛa Yudha girɔngichinne na seyɛsɛ, “Tii hunde ɛano tɛrroa Ayhudhi ku bhoyoga liwayeye, ga gayɛa tuga Giriki dhɛɛ gunynyo kɛ ɔng?”

Acts 6

Lɔga Kɛ̀bɛrranɛa Zuga Ku Issabbay Ɛanɛa Zugo

1 Na ngabɛrguonu zuga yɛbhbhɛa Yesus ago na te mɛri. Na kali kona zuga Ayhudhi gayɛa tuga Giriki mɛzzɛɛsɛ zuga Ayhudhi bhakkɛa Yudha girɔngichinne na seyɛsɛ, “Tii hunde ɛano tɛrroa Ayhudhi ku bhoyoga liwayeye, ga gayɛa tuga Giriki dhɛɛ gunynyo kɛ ɔng?” 2 Na yɔk zuga ekko ꞉Yesusi ku tɔmmɔn ko ramman mukta zuga yɛbhbhɛa lɔga Yesusi kumulɔng na seyɛsɛ, “Agge hunde kɔdhɔtto bhɛa kamadhɛo zugo lɔga Tumu na kɔɔrgɔrɛo zugo amissɛ sɔngge, i gɛrrɛng. 3 Na mɛa gochonginyaye, ga bɛrta zuga kàggaa bere kɔsɛna ꞉Kuloya Tumu na ɛsɛdhdhɛa lɔgɔ shɛɛ bhɛa nu gee ku issabbay. Na kayɛo gulsamo bhɛa ngalɔkta kɛ̀anɛ tɛrro amissɛɔye. 4 Na agge kɛ̀mɛttao na kàlliyɛo ko Tumu na kàmadhtɛsɛo zugo lɔga Tumu sɔng.”

5 Na hunaa zugo shikkɛa ngalɔktaye, hinisiya gɛ te hɔli. Na bɛrta hira yɛbhbha Tumu goore bere kɔsɛna ꞉Kuloya Tumu kèe Istibhanos. Na koo tɔrtɛ Bhilibhos ko Birokɔrɔ ko Nikarona ko Timona ko Barmena ko hira bhora anaa bere yɛbhbha kera Muse na wurtɔ yɛbhbha lɔga Yesusi kùhudhukkono Ansokiyagiye kènno Nikolas. 6 Na dhiganda na ogoldɛsɛ ꞉zuga ekko ꞉Yesusi Tumu na tattɛ sɛnɔ na ayɛ buyn.

7 Na lɔga Tumu tɛhɛtɛy ko ba. Na zuga yɛbhbhanɛa lɔga Yesusi Yerusalemɔ ago na te mɛri. Na gɔldangɛa doraa Tumu barara ga bo mɛra ko yɔk yɛbhɛ kamannaa Yesusi.

Lɔga Kàmagɛa Istibhanos

8 Na Istibhanos nɔng a hira chirbhiseo ꞉Tumu goore. Na aynɛ ɔnney na mesu lɔga bo dhandala barara kìwacheo bhɛa zugony. 9 Na dha bere ngonu lɔ zuga Ayhudhi honynyo Kerenagiye ko Iskindiriyagiye ko Kilkiyagiye ko Isiyagiye madhɛsɛnɛa zugo lɔgɔ doraa madhinɛnɛa zuga Ayhudhi lɔga Tumu kèleo “Doraa Zuga Kòbhonisisɛna Bhɛa Hɔla.” Na ngazukta gen yɔk tamara lɔga madhinɛnɛa ꞉Istibhanosi na ɛkkɛnyandɛ ko nɔng. 10 Na yɔk bhɛa senno kɔyayɛy nɔng bhɛa ngakuloyta mɛzziɛye, ngani ngaɔanɛo. Nɔng ga bho goore na lɔga madhɛsɛna zugo ajjɛ ꞉Kuloya Tumu.

11 Na yɔk kɔnkɔnɔ ꞉zug gena dari na kɛmɛzzi butomo na kese, “Ngahirra huna bere dhɔma Tumu ko Muse, bere kishikto.”

12 Na yɔk huy zuga Ayhudhi bibiyo ko ga madhdhɛa zugo Damiya Tumu bere kàjjɛa Muse ko gena kumulɔng. Na dɛbɛ na ago na ibhigi Istibhanos na dhiganda chɔɔ bhɛa kedhdhɛa ꞉zugu lɔgɔ. 13 Na koo dhiganda zuga ku butoga sɛgɛn na yɔk se, “Ngahirra taa dhɔma ngadoriya barar Tumuye ko Damiya Tumu tii na ngadhɔtao. 14 Chɔɔ bɔɔ kishikto hunde se kèe hira Nazireti kèe Yesus se ale usurran doraa Tumu barara na bhɔdh kera bere ajjiy ꞉Museye.”

15 Na zuga ɛlla bhɛa kègedhdhɛa lɔgɔ kumulɔng hunaa gunynyɛa muma Istibhanosi churrte, argi hunde hɛt ko hira ekkono ꞉Tumu tumɔye. ^{▼▼Hira ekkono ꞉Tumu mumɔ heo hɔldin na walat na terinyey huna gony.}