Act 8 | SuqSC | STEP | Na ko nɔng Saol dha bere hinɛsɛn Istibhanos rɛsɛ. Na kala rɛsɛa ꞉Istibhanosi lɔgɔ te dhandali goore. Na zuga yɛbhbhɛa Yesus ɛlla Yerusalemɔ kumulɔng kɔ̀gɔrta na bhassayɛ. Na gena hanggɛ oriya ɛlla baa Samariya, gen hanggɛ oriya ɛlla baa Yudha. Na Yerusalemɔ dhɔttɛ ꞉zuga bere ekko ꞉Yesusi sɔng.

Acts 8

1 Na ko nɔng Saol dha bere hinɛsɛn Istibhanos rɛsɛ.

Lɔga Hangɛa ꞉Saoli Zuga Yɛbhbhɛa Yesus

Na kala rɛsɛa ꞉Istibhanosi lɔgɔ te dhandali goore. Na zuga yɛbhbhɛa Yesus ɛlla Yerusalemɔ kumulɔng kɔ̀gɔrta na bhassayɛ. Na gena hanggɛ oriya ɛlla baa Samariya, gen hanggɛ oriya ɛlla baa Yudha. Na Yerusalemɔ dhɔttɛ ꞉zuga bere ekko ꞉Yesusi sɔng. 2 Na zuga kachchɛa Tumu gen ojjigi Istibhanos. Na ibhigi duhu na turgi goore. 3 Nɔng dha bere Saol se kuhuga zuga yɛbhbhɛa Yesus. Na tunnugɛsɛn doriyo doriyo kumulɔng na ghurtono zuga maya ko ga ngaha kari na kɔɛ doraa chibinuny.

Lɔga Kàmadhɛa :Zuga Baa Samariya Kamannaa Challa

4 Na yɔk zuga bere yɛbhbhɛa Yesus na hangnɛna madhtɛsɛ zugo lɔga Tumu oriya bere hangnɛnɛa kumulɔng. 5 Na bhɛa ngazuktonu yɛbhbhɛ Yesuse, kona bere anna Bhilibhos. Na ogo ɔra iho baa Samariya konnɔ na madhɛsɛ zugo bhɛa Yesus anɛa hira kɛ̀bɛrrana ku Kirisos. 6 Na hunaa zugo shikkɛa lɔga gɛnyɛ na orrɛa hunde me lɔga bo bararaye, chirara shɛɛ ke dhɔnɛ kumulɔng. 7 Na mɛnɛnga bhonda bhɛa zuga bo mɛra na ara wuy goore. Na ko yɔk anyakuwandaa bo mɛra ko zuga chudhinɛna baya. 8 Na zuga ɛlla ngaɔrronu hinisi te hɔli goore.

Lɔga Hira Kèe Simon Ku Kay

9 Na dha bere ngaɔrronu lɔ hirre ku kay kèe Simon. Na kali kali dhɔng rɛ na se, “Anye kani hirre buye.” Na mannɛa ꞉zuga Samariya kumulɔng. 10 Na erro ko zuga bibiyo chirarrɛ nɔng shɛɛ kumulɔng na sennɛ, “Ngahirra anna bo barara na lɔ barartina Tumu.” 11 Na bhee chirarɛ nɔngge, a ngaya mesɛ lɔga bo barara na iwachinɛnɛ ꞉zugu bɛrgunyaa bere kinginyeye. 12 Na nɔng Bhilibhos hunaa madhɛsɛna zugo kamannaa challa ale lɔmɛiy ꞉Tumu ko lɔga sara Yesus Kirisosi na shikkɛaye, zuga maya ko ga ngaha kari yɛbhɛ lɔga yokkono ꞉Bhilibhosi na churtɛ ma. 13 Na ko nɔng Simon yɛbhu ngalɔkta na churtɛ ko yɔk kari. Na tɔru Bhilibhos na dhi kari gɔrre kɔɛye na iwachiu lɔga messo ꞉Tumu bo barara dhandala.

14 Na yɔk zuga ekko ꞉Yesusi ɛlla Yerusalemɔ hunaa shikkɛa zuga Samariya hunde dha yɛbhɛ lɔga Tumuye ^{▼▼Ngalɔkta Tumu yɛbhbhɛ :yɔkkuye a lɔga bere Yesusi rɛsɛiy agge na ujjugɛa lɔga ga gɛrsa.}, ibhta Betiros ko Yohanis na ege ngonu. 15 Na Betiros ko Yohanis koo ago na ogoldɛsɛ zuga Samariya Tumu na ko yɔk kɔgɛsɛ :Kuloya Tumu. 16 Yɔk zuga Samariya bere churnɛna sara Yesusi hung na chɔɔ hirre dhɔnɛ Kuloya Tumu ngani kɔgɛsɛayo. 17 Na Betiros ko Yohanis hunaa tadhdhɛa yɔk sɛnɔye, ɔgɛsɛ ꞉Kuloya Tumu.

18 Na Simon hunaa orro zuga ekko ꞉Yesusi hunde tadhɛ zugo sɛnɔ na kɔsɛn ꞉Kuloya Tumuye, nɔng ibha birinya na ayɛsɛ. 19 Na sɛɛsɛ, “Ko anye ayanyu bhɛa hunde katadhɛi zugo sɛnɔye kɔsɛna ꞉Kuloya Tumu.”

20 Na sɛɛsɛ ꞉Betirosi, “Ok na gara ko birinyaa gunyu kari ke ngaya seni talɛ lɔga ajjiy ꞉Tumu hɔlɔng birinyaye! 21 Na nɔng inye bhee jɔanɛ bhɛa kayɛy Tumu ninggɛ, ke ngaya kɛnga nunu bhɛa Tumu anɛ gɛrsiye. 22 Na mɛa inye ga ujjuk ngalɔkta bu gɛrɛse na waga gɔra Tumu na ogol nɔng. Kako ale ujjuk ngalɔkta gɛrɛ ɛsɛdhi ꞉inyo hinisɔye na sennaginy, ‘Any kagarayɛ.’ 23 Anye koriny hunde hinisa nunu kɔchinɛ goore na chibbenyɛ ꞉lɔga gɛrsaye.”

24 Na nɔng Simon yagɛsɛ na sɛɛsɛ, “Ogoldogonyu Tumu na ngalɔkta yokkogonyu ꞉iggeuye ngakodokkoni!”

25 Na yɔk hunaa yoktɛsɛa zugo lɔga bere orronɛa kawarre messo ꞉Komoru Yesusi na madhtɛsɛa kamannaa nɛnɛ na tewa ushaye, ago oriya ɛlla Samariyagiye na madhtɛsɛ zugo kamannaa challa gɔrɔ gɔrɔ na waga Yerusalemɔ.

Lɔga Madhɛa ꞉Bhilibhosi Hira Itiyobiya

26 Na kali kona hira ekkono ꞉Tumu sɛɛsɛ Bhilibhos, “Bana ok ganggua iho ba karanɛ ^{▼▼Ba karanɛ a bhɛa kèsenɛa “dɛbub” gɔlachin.} korugiye shidhnyɛsɛna Yerusalem kɔa ɔra kèe Gaza.” 27 Na bana na ogo. Na hunaa ngani kɔaye, itinynyandɛ ko gaymaya komoruya Itiyobiya lɔmma buyn. ^{▼▼Ngahirra a hira hɛtta ko biya kùjjo bhura na mɔga ngahinnoo na ngahirra kajjɛ buyn na bhɛk ahaa komoruyny.} Nɔng a hira ku gulsaa ibhbho birinyaa komoruya Itiyobiya ngaha kènno Hindeke. Nɔng ngagaymaytonu dha bɔɔ kɔ Yerusalemɔ na keterrisan Tumu. 28 Na huna wokko ɔra nɛnɛ, dha bere i kɛga kòwoyɛa ghurtɛa ꞉harteyau na toyi dadaba bere kɔdhdhana ꞉hira yogɛsɛna zugo lɔga dhugunono ꞉Tumu kèe Isayas. 29 Na nɔng Kuloya Tumu sɛɛsɛ Bhilibhos, “Bana ok bhɛa ngahirronu wo kɛga ghurtɛa :harteyauye na itinynyandɛyɔ.”

30 Na Bhilibhos ngeu na uturbhanu. Na shigu hunde toyi dadaba Isayasiye, na ghinu na sɛɛsɛ, “Ngangaye, ngadadabta toyiye hologun gayɔ?”

31 Na nɔng yagɛsɛ na sɛɛsɛ, “Hunde hirre madhdhaganyi ninggɛye, ale ngalɔkta kagga ɛnɛng? Ga irrɔga tundɔ gɔrra kihɛ :anyoye na kɛtɛldi kari.” Na irrɔgu.

32 Na dadaba bere toyeo dha bere toyi bhee se,
“Nɔng bere kɔ̀tɔkka huna mɛdɛra kènno kìndiyɛ.
Na tɛhɛyɛ ko mɛna hunde kegedhdhana chɔrɛye iho laay.
Na lɔgɔ ngani koyogoo dhul.
33 Na maktɛsɛ ꞉zugu butomo na kɛ na lɔga gɛnyɛ shɛɛ ngani ngakedhdhɛo.
Na hunde basseya nɛnɛ a nganda wa garɛsɛa baye,
Ale lɔga ashaa gɛnyɛ zugo kɔbhɛsɛn ꞉noy?”

34 Na nɔng hira ku gulsa ghinu Bhilibhos na sɛɛsɛ, “Ga yogogonydɔ, ngangaye Isayas dha bere yokkono lɔga gigi? Dha bere yokkono ga gɛnyɛ oo gee ana?” 35 Na nɔng Bhilibhos imimishiyo lɔga ɛlla dadabaa gina na madhɛsɛ hiri kamannaa Yesusi challa.

36 Na hunaa ngani hɛaye, dakta bhee lɔ ma. Na gulsa seu, “Yɔk ma a ngagiya ni. Na hunde kùchurrɛ, ahite kanyɛanyi ihe?” 37 Na nɔng Bhilibhos yagɛsɛ na sɛɛsɛ, “Hunde yɛbhi hinisɔ dhereye, churnɛndɔ.” Na gulsa seu, “Yesus hunde a eriya Tumu bere kɛ̀bɛrrana ku Kirisose, kɛyɛbhiyɔ ^{▼▼Dadabinyaa Lɔga Tumu tuga Giriki gena ngalɔkta ɛl 37ɔye ninggɛ.}.” 38 Na sɛɛsɛ hira tɔkka hartey na kichilɛ hartey. Na koo Bhilibhos ko gulsa yɔk bhonda na ago chɔɔ bhɛa ɛlɛa ma. Na Bhilibhos churu gulsa ma. 39 Na hunaa ngani bhonsanɛa bhɛa manyde, Bhilibhos ɔgɛ ꞉Kuloya Tumu dari hɛb hung. Na hira ku gulsa Bhilibhos sɛgɛn ngani ngaorro. Na ogu ke na bo hini hɔla. 40 Na Bhilibhos nɔng kargi Azotosɔ na madhɛsɛ zugo kamannaa Yesusi oree kumulɔng gɔrɔ gɔrɔ ko bhee dogɛ Kesariya.