Gen 12 | SuqSC | STEP | Na Tumu sɛɛsɛ Awuram, “Dhɔ ɔra nunu ko bhora nunu ko bhɛnɛna gunyu na zɛg baye kɔdhɔllaginy ꞉anyoye.

Genesis 12

Lɔga Kèliyɛa Awuram

1 Na Tumu sɛɛsɛ Awuram, “Dhɔ ɔra nunu ko bhora nunu ko bhɛnɛna gunyu na zɛg baye kɔdhɔllaginy ꞉anyoye.
2 Ale kutuheny na ani bhorre bu na kɛbhɛlliny na ashaa gunyu a mɛri.
Na toynɛn na zugo tuhinɛnɛinyɛ inye.
3 Na gee tuhenynyɛye ko yɔk kutuhiyɔ, gee chɔrrinynyɛye ko yɔk kɔchɔriyɔ.
Na ale bhorinya kumulɔng tuhinɛnɛinyɛ inye.”

4 Na nɔng bana na dhɔyu Karan na zɛgu damiyaa yogɛsɛna ꞉Tumu. Na dha bere huna ziggo, oynyaa gɛnyɛ a 75. Na ko nɔng Lot dha bere dhɛɛ kari. 5 Na Awuram ko tɛriya nɛnɛ Ngasaray ko eriya gɔynɛ Lot ibhta ahaa bere gɛ mukkanɛa Karanɔ ko gaymanyaa gɛ kari na zɛgɛ Kananɔ. 6 Na ago ko bhee dogɛ kɛya bo gore iho Sekemɔ jaa baa kènno More. Yɔk zuga Kanani dha bere bhakkɛ ngabaonu. 7 Na nɔng Awuram dhɔlɛsɛ :Tumu rɛ na sɛɛsɛ, “Baye ale kajjɛ ashaa gunyuye a nganda.” Na bhɛaa dhɔlɛsɛna :Tumu rɛ echɛɛsɛ ngawu. 8 Na bana na ogu chɔɔ kutuloa ɛlla ɔra kènno Betel gɔra yaluny na tɔgɔdhu dukuwa. Na bhɛa kɔdhdhɛa dukuwa, dha bere gɔra yaluny lɔ ɔrre kèe Ayi. Na nɔng Betel i gɔra kɛnkɛnuny. Na koo echiu ngawu na tɔgɔdhɛsɛ Tumu kɔmma. 9 Na bana na tɔyɛ ba na ogo chɔɔ korua kèe Negeb.

Kolea Ihɛa :Awurami Gibsigiye

10 Na kali kona Kananɔ ba te hozzo. Na hunaa hozzo mɛdhaaye, Awuram bana na kajar hozzo Gibsigiye na kabhak ngonu. 11 Na hunaa Gibsi tewa jaye, sɛɛsɛ tɛriya nɛnɛ, “Ngasaraye, inye ɛya nunu aniny challi. 12 Na ale hunde orinynyɛ :zuga Gibsiye sennɛ, ‘Na kèe nganda nɔng a tɛriya nɛnɛ’ na kɔdhdhanyɛ anye na inye dhɔttinyɛ basseyɔ. 13 Na inye sɛɛsɛ, ‘Kani ngɔnɛ’ na aynde ale hinnonyɛ na ngakɔdhdhanyɛoye.”

14 Na hunaa dokkɛa Gibsiye, lɔgaa ɛsɛdhdhɛa te dhere. Na zuga Gibsi argi tɛriya Awurami hunde chali gooreye. 15 Na hunaa gulsachina Gibsi orrɛaye dɛlɛ na ago na yoktɛsɛ komoru. Na ayɛsɛ na kete tɛriya nɛnɛ chinynyo. 16 Na komoruya Gibsi tɔlɔmu Awuram shɛɛ ke ngaya hinɛ Ngasarayte na aynɛ Awuram mɛdɛrni ko beo ko sigiriya ^{▼▼Tuga Hibiru se, “...ko sigiriya maya ko ga ngaha...”} ko galisenya ko gaymanyaa maya ko ga ngaha.

17 Na Tumu nɔng kuyɛy mutana bo dhandala na aynɛ komoruya Gibsi ko zuga gɛnyɛ ke ngaya kɔɛ tɛriya Awuramiye. 18 Na komoru eliu Awuram na ghinu na sɛɛsɛ, “Ngalɔkta mesɛany ngangaye a lɔkte kunɛnɛng? Hunde a tɛriya nunuye, ngayokogonyoye lɔ ɔng? 19 Inye hunde bare seagany, ‘A ngɔnaa nanu’ na kɔgɛyɛo i ɛnɛng? Ngamɛa tɛriya nunu a nganda. Dhigana ɔgɛ!” 20 Na aynɛ gulsachina gɛnyɛ lɔgɔ na kuchugu Awuram. Na koo gulsachina ayɛ Awuram lɔgɔ na kibha tɛriya nɛnɛ ko ahaa gɛnyɛ kumulɔng na kɔdhɔ Gibsi na kɛzɛktɔ.