Gen 19 | SuqSC | STEP | Na hunaa bho barsaye, zuga ku ramman bare ekkono ꞉Tumu daga Sodom. Na nɔng Lot dha bere i ngaɔrronu waranɔ bay. Na aru ngazuktonu hunde honyde. Na bana na kalamayɔ. Na koo tɔgɔdhɛsɛ kɔmma na dhugumu

Genesis 19

Lɔga Kìdhiyɛa Sodom Ko Gomora

1 Na hunaa bho barsaye, zuga ku ramman bare ekkono ꞉Tumu daga Sodom. Na nɔng Lot dha bere i ngaɔrronu waranɔ bay. Na aru ngazuktonu hunde honyde. Na bana na kalamayɔ. Na koo tɔgɔdhɛsɛ kɔmma na dhugumu 2 na sɛɛsɛ, “Komortɛna ganyuye, hoya kago doraa nanu na tonydo jagarɛ na kàbhanyiseung na tunggi na bana bhelleyɔ hung.”

Na yɔk se, “Ay, any kùtunggo boloshɔ ngaya hung.”

3 Na nɔng tɔllɔhɛsɛ goore na ago na tunnugu doraa nɛnɛ. Na nɔng sɛɛsɛ zuga messɛa zinggo bhɛa nɛnɛ na aga lottay na ayɛsɛ na usigiyɛ. 4 Na hunaa kɔmɔn ngani kutunggaoye, tɛgɛn ko rɔra Sodomi kumulɔng hoya na baga doraa Loti. 5 Na eli Lot na ghini na seyɛsɛ, “Kɔmɔna gunyu maya wa dhiganani na seni kutunggi doraa nunu ngaya ɛl ori? Ga sɛɛ kobhonda na kɔ̀mɔktoyɔ!”

6 Na nɔng bhona bho na nyɔgu dori 7 na sɛɛsɛ, “Gochonginyaa ganyuye, ngalɔkta bu gɛrɛ ku ngangaye ngamesso. 8 Anye kɔlɔmi erroye ngahi ku ramman ngani ko zugo kutunggito. Na ga any kàung yɔk na mesigi damite hinnoye. Yɔk ngazukta hun kona ngamesso. A kɔmɔna ganyu.”

9 Na yɔk zugo tɔgɔ na seyɛsɛ, “Ogo! Inye ani hira ku kɔmɔni bortɔ ngani ziggoni! Na mɛa seni ken lɔga kenno kèmesso ꞉aggeu kɛ ɔng? Ale ngalɔkta kenno kèmesso bhɛa kɔmɔna gunyuye kubhugɛsɛno bhɛa nunu na a dhandali.” Na banda na ugunu Lot na kadaga gheru na kibhiigitɔ.

10 Na kɔmɔnaa ku ramman oyo tutug na ittono sɛnɔ bhɔ na tugurto Lot dori toye na nyɔgɔ tutug. 11 Na kɔmɔna Loti dhiyi tɛgɛn ko rɔraa ɛlla bhɔ kawarɛ na tutug ngani ngaorrɛo.

12 Na koo seyɛsɛ Lot, “Hunde ngaɔrra toye lɔ erroa gunyu maya ko ga ngaha ko kɔnichina gunyu ko bhɛnɛna gunyu genaye, obhonisi ke tiri. 13 Kenno kìdhiyto ngaɔrra mɛarrɛ ke ngaya lɔga gɛrsa messɛa :ngazukta anɛ dhandaliye. Na zuga tiranyɛa ꞉yɔkku bɔɔ artɛsɛa Tumu wuy na shikka. Na aynde ekkoniy agge na kidhiyto ngaɔrraye.”

14 Na Lot bana na koo ibbayu zuga dha bɔɔ tɔginɛnɛa sedhdhea gɛnyɛ na sɛɛsɛ, “Banda ke tiri na dhɔyɔ ngaɔrra! Se Tumu kidhiy ngaɔrra!” Na yɔk se kako tabhtɔ na tɛldi dhɛɛ.

15 Na bhelleyɔ zuga ekko ꞉Tumu ususugana Lot na seyɛsɛ, “Bana ke tiri na ibha tɛriya nunu ko ngasedhdheya guny ku rammande na jarayɛ! Na ngames tɛrr na ko inye kidhitteny ko ngaɔrra kari.”

16 Na Lot hunaa dhaginɛna ko hiniye, nɔng ko zuga gɛnyɛ chirbhisiu ꞉Tumu. Na zuga ekkono ꞉Tumu ibhigi sɛna Loti ko ga tɛriya nɛnɛ ko ga sedhdhea gɛnyɛ ku ramman na tugurto na yaga ɔr dheyyɔ. 17 Na hunaa aytɛa ɔr dheyyɔye, hira kèkkono kona sɛɛsɛ, “Ibbaysi rɛhiya gu na jara rɛsɛ kutulo! Na hunde hɛoye, wuru ngabhudhdho na mogiyɔ bhokkonnɔ ngachillo!”

18 Na Lot sɛɛsɛ, “Ala, komortɛna ganyuye, ga kutulo ngakɛhɛo! 19 Ngaya yellɛanyu gaymaya nu shɛɛ na senno ngakerɛ na chirbhisiyɛanyuye, chali goore. Nɔng bhee kojorɛ rɛsɛ kutulo, anye ninggɛ. A rɛni na ale sɔgɔtany teri. 20 Na kèe ɔrre chinyi godhe jaa ngaya ihe. Na igombogonyu na kàjar rɛsɛ ngaɔrronu hung.” 21 Na hira ekko ꞉Tumu igomɛsɛ na sɛɛsɛ, “A challi. Hunde seni ngangaye, ngaɔrra seniye ngakidhiiyo. 22 Na inye ko bhee dogɛ ngaɔrronu lɔk gena ngakemesiyo. Na jar ke tiri.” Na ngaɔrronu kɔ̀gɔndɛsɛ sarre kèe Zowar ke ngaya bere senɛ :Loti “a chinyiye.” ^{▼▼“Zowar” a bhɛa kèsenɛa “chinyi.”}

23 Na dha bere huna Lot dokko Zowar, su ujjonoyɔ. 24 Na Tumu ujjugɛsɛ Sodom ko Gomora go ko bɛna bo bhurruttɛa shushushuy. 25 Na nɔng dhiyu ngaoreonu kumulɔng ngadamita na bhayagu :go rang. Na zuga bhakkɛa ngonu ko horor ko kɛnɔ ko ahaa chillɛa kumulɔng garayɛ. 26 Na nɔng tɛriya Loti budhɛ na gɔnyu wuru. Na hunaa gunynyo wuruye, bhɔdhɛ ke shɔyya ku ula na shilu ngonu dhul.

27 Na Awuraham bana bhelleyɔ shaw na ogu bhɛa bare ɛlɛa ko Tumu. 28 Na hunaa dharɛsɛna Sodom ko Gomora ko darɔ karanɛye, aru bhurrey hunde bu bhuru huna goa kòtobɛa junyaye. 29 Na nɔng Tumu hunaa dhitta ngaoreonu rangge, kadha lɔga bare tɔllɔhɛsɛna ꞉Awurahami na obhoniseo Lot ngalɔkta bu gɛrɛse toye.

Lɔga Loti Ko Sedhdhea Gɛnyɛ

30 Na Lot bhɛa senno kabhagɛ Zowar tɛngɛru na nɔng ko sedhdhea gɛnyɛ ku ramman zɛgɛ kutulo na bhaga bhogo. 31 Na kali kona sedhdheya ku aw sɛɛsɛ na chinynyo, “Mɛa babaa na dhaa nyaggau na jaa ngaya zukte may gamiyɛ agge na kɔ̀lɔmmanɛ erro ninggɛ. 32 Na mɛa bhɛa kènno ngakudhuytɛy ga kàyɛ babaa na gimaya woynuny na kudhuti na kàtabhtɛsɛ ungo na kutunggi kari na kibhta erro.”

33 Na jhaynɔ ayɛ baba nɛ gimaya woynuny na dhuttiu. Na koo sedhdheya nɛnɛ ku aw assa na tunggi kari. Nɔng dha bere Lot dhutti goore na hunde hoynɛ kun na ungussɛ kari na bhono na kɔye, nɔng imaktɔ.

34 Na bhorroyɔ sedhdheya nɛnɛ ku aw sɛɛsɛ na chinynyo, “Anye wa barɔ kutunggo ko baba na. Na mɛa ngakalda koo kàyɛ gimaya woynuny sɛgɛn na kudhutiyɔ. Na ko inye assa na tunggi kari. Na agge rammane kìbhta erro bhɛa nɛnɛ na ngakudhuynɛ.” 35 Na jhayny ayɛ baba nɛ gimaya woynuny na dhuttiu sɛgɛn. Na koo sedhdheya nɛnɛ chinynyo assa na tunggi kari. Nɔng dha bere Lot dhutti goore sɛgɛn na hunde hoynɛ kun na ungussɛ kari na bhono na kɔye, nɔng imaktɔ.

36 Na yɔk sedhdhe ibhta erro kari bhɛa chɔgɔnɛ Loti. 37 Na sedhdheya nɛnɛ ku aw hudhugo erite may na tɔgɔdhɛsɛ sarre kèe Mɔab. Na nɔng ko mɛa a kokonga bhora Mɔabi. 38 Na na chinynyo hudhugo erite may na tɔgɔdhɛsɛ sarre ke Benami. Na nɔng ko mɛa a kokonga bhora Amoni.