Gen 34 | SuqSC | STEP | Na kali kona sedhdheya Ngaleya kènno Ngadina bana na ogo ɔr toye na kɔgɔny tɛrroa bhakkɛa ngonu.

Genesis 34

Lɔga Kùmunyɛa :Sedhdheya Yaykobi Kèe Ngadina

1 Na kali kona sedhdheya ^{▼▼Tuga Hibiru se, “...sedhdheya bere hudhukkono Ngaleya...”} Ngaleya kènno Ngadina bana na ogo ɔr toye na kɔgɔny tɛrroa bhakkɛa ngonu. 2 Na ngaɔrronu dha bere lɔ hirre kèe Sekem. Nɔng a eriya gulsaa ngabaonu kèleo Emor ku bhora Hiwa. Na nɔng aru Ngadina na magu gidhdhingɔ na assa. 3 Na hini ibhɛsɛ sedhdheya Yaykobi kèe Ngadina goore. Na dhagɛsɛ kali shɛɛ shɛɛ na kɛtɛhɛndɔ. 4 Na koo yogɛsɛ chɔgɔnɛ Emor na sɛɛsɛ, “Keni gamagany ngasedhdheyta!”

5 Na Yaykob shigu hunde hoynɛ dha bare kumunyuyɛye. Na nɔng ngakaldonu lusa gɛnyɛ dha bere iwonɛyɔ. Na ngalɔkta tɔlɔmu hinisɔ ko bhee wokkonɛ :yɔkku.

6 Na koo baba Sekemi Emor bana na kassa Yaykob na kojjigi lɔgɔ. 7 Na lusa Yaykobi hunaa shikkɛa ngalɔktaye, wakta bhɛa iwonɛnɛa. Na munyu na dɛbɛ goore ke ngaya Sekem mesɛ ngalɔkta bu gɛrɛ na ɛddɛɛ ngɔnɛ na dhɔmɛ zuga Isirayeliye.

8 Na Emor nɔng tɔllɔhɛsɛ Yaykob na sɛɛsɛ, “Eriya nanu Sekem hin sedhdheya nunu goore. Na aynɛ na kɔgɛ. ^{▼▼Tuga Hibiru se, “...kɔgɛ ke tɛriya nɛnɛ.”} 9 Na mɛa kìshiktɛ na kete zuga kagamnɛna taninya kari. Na agge kàgambo sedhdhea gu na igge gama sedhdhea gayo na kete kɔnichina. 10 Na kàbhaga ngabaya nayoye na kete baa na kari. Na tɛldi ngabaya shɛɛ na mesigi ngagaymo na tala ba damite hinɛoye, na kete baa nu hunde nayoye.”

11 Na Sekem sɛɛsɛ baba Ngadina ko gɔynggɛ, “Chirbhiseonyu na igombogonyu ngalɔkta kihiniye. Na ahaye hinnoye kàung hung. 12 Chɔɔ ahaa kagamɛi hunde hinno gee mɛriye, ghindonyu hung. Igombogonyu bhɛa keni kɔ̀gɛ ngasedhdheyta sɔng. Anye kihi kɔk na ahaye hinnoye kàung kumulɔng.”

13 Na lusa Yaykobi dakta dogina kùmunyɛa ngɔnɛ Ngadina na tabha Sekem ko chɔgɔnɛ 14 na seyɛsɛ, “Agge ngɔnaa nayo hira rɛa maya ngani kegedhdhoo ngakajjɛoyo. Hunde kajjɛoye, ale ujjukkaniyɛ :zugu na ajjiyɛ liya. 15 Nɔng hunde kìshiginɛnɛ bhɛa inye ko zuga ngaɔrra maya kumulɔng kedhdhɛo rɛhiya maya hunde nayoye, ngɔnaa nayo kajjunggɔ. 16 Chɔɔ hunde messo ngangaye, sedhdhea gayo hɛyɛo na ko agge kɛhɛyɛo ga gu na kan kɔnichina na kàbhak kari. 17 Na hunde marro ngalɔkta na rɛhiya maya ngakedhdhooye, ngɔnaa nayo kidhigannoyɔ.”

18 Na Emor ko hoynɛ ɛlɛhɛnɛ ngalɔkta na bhɛa nɛ te challi. 19 Nɔng dha bere Sekem bhɛa tua Emori anna bo ɛngɛrsɛa :zuga gɛnyɛ. Na nɔng hini chɔa ke ngaya hinɛ sedhdheya Yaykobi gooreye na lɔgaa yogɛsɛnɛa :yɔkku na senno keme, mesu shaw hung. 20 Na Emor ko hoynɛ banda na ago warana orony bhɛa mɛzziyɛa :zugu na yoktɛsɛ zugo lɔgɔ na seyɛsɛ, 21 “Ngazukta a zukte challi na any kàbhaga ngabaya ko agge kari ke na bo challa hung na kɔtɔ damite hinɛye. Nɔng baa na a bu kɛhɛtinɛnɛ hung. Na kète kɔnichina na kàgama sedhdhea gɛ na ko yɔk kagama ga ga. 22 Na yɔk bhee hinɛ :yɔkku na se kàbhaktɛ kari na kèteyɛ kɔnichinaye, se zuga ga maya kumulɔng maya kedhdhɛ rɛhiya maya hunde nɛye. Wa kishiginɛno nganga. 23 Mɛa hunde kèmesigi nganga, ngabea ko ngaahaya gɛyte kumulɔng ale agga ga! Na mɛa kìshiktɛ ko yɔk, na kàbhaga ke dhɔnɛ.”

24 Na zuga maya orony kumulɔng shigi ngalɔkta yokkono :Emori ko :Sekemiye na kedhdhigi rɛhiya maya.

25 Na hunaa saniyɛa ungo sizzi na ngɔdɔrɛna ngani keggiyaoye, erroa Yaykobi ku Ngadina gɔynggɛ kèe Lewi ko Simon, ibhta mashachina gɛ na dhuldɛsɛ zugo ɔr toye dari na tɔgɔdhɔ zuga maya rang. 26 Na koo tɔgɔdhɔ Emor ko Sekem na dhakta ngɔnɛa nɛ doraa Sekemi na dhiganayɛ. 27 Na lusa Yaykobi gena ago ngaɔrronu wa kɔ̀gɔdhdhɛ zugoye na tɔgɔnda ahaa ɛlla doriyo toye kumulɔng ke ngaya bɔɔ munyɛ ngonɛye. 28 Na beo ko mɛdɛrni ko sigiriya ko tena gɛ ɛlla ɔr toye ko ga dhaa bhonsɛa bhɔ, ibhta na tɔgɔ kumulɔng. 29 Na koo ibhta tɛrroa ngazuktonu wa kɔdhdhɛye ko erroa gɛ ko ahaa gɛ ɛlla doriyo toye kumulɔng na aytɛ.

30 Na Yaykob sɛɛsɛ Lewi ko Simon, “Urguytogonyu lɔgɔ na ale ngazukta bhakkɛ Kanan ko Bhɛrɛzande tamartanyɔ na chɔɔ hunde ale gunyonynyɛye bhɛa nɛ hiri ngani ngakaniyo. Agge kan muchugi. Na yɔk hunde kabanda kamman ke dhɔnɛ na kɔgɔndiyɔ, dheshaniyɛ ko zuga ga kumulɔng.”

31 Na yɔk ghini na seyɛsɛ Yaykob, “Na hunde messɛ eriya nayo gɛrrɛng gɛrrɛng huna hummenyde, seni kɛ̀tɛldo laay?”